BolgeXeber.Com » Ölkə » "Azəryolservis"in işçiləri bələdiyyə ilə əl-ələ verərək vətəndaşlara fırıldaq gəliblər? - Buzovnada qanun pozuntusu

"Azəryolservis"in işçiləri bələdiyyə ilə əl-ələ verərək vətəndaşlara fırıldaq gəliblər? - Buzovnada qanun pozuntusu

30-06-2015, 12:29
Oxunub: 3 283 "Azəryolservis"in işçiləri bələdiyyə ilə əl-ələ verərək vətəndaşlara fırıldaq gəliblər? - Buzovnada qanun pozuntusuRedaksiyamıza Xəzər rayonunun Buzovna qəsəbəsi, Koroğlu küçəsi, ev 55 ünvanında yaşayan birinci qrup əlil Quliyeva Firəngiz Hüseyn qızı tərəfindən şikayət məktubu daxil olub

Respublikanın güc strukturlarının rəhbərlərinə və surəti redaksiyamıza ünvanlanmış məktubu olduğu kimi təqdim edirik:
«Azərbaycan Respublikasının prezidenti cənab İ.Əliyevə!
Baş Proku ror cənab Z.Qaralaova!
Milli təhlükəsizlik naziri cənab E.Mahmudova!
Xəzər rayon prokuroru cənab F.Ələsgərova!
Surəti: “Təzadlar” qəzeti redaksiyasına!
Xəzər rayon Buzovna qəsəbəsi, Koroğlu küçəsi, ev 55 ünvanında yaşayan birinci qrup əlil Quliyeva Firəngiz Hüseyn qızı tərəfindən
Şikayət ərizəsi
Bildirirəm ki, 2010-cu ilin aprel-may aylarında Dövlət Əmlak Komitəsinin Əli adlı işçisi (soyadını bilmirəm) gəlib bizə bildirdi ki, ölkə başçısının sərəncamı ilə bizim torpaqlar dairəvi yolun çəkilməsi ilə bağlı plana düşür. O, həm də əlavə etdi ki, kimin sənədi varsa təqdim etsin, olmayanlara da sənəd düzəldiləcək. Əli müəllim torpaqla bağlı bütün sənədləri, torpaq üzərindəki tikililərin şəkillərini çəkib özü ilə apardı və dedi ki, kimin nə sözü varsa, qəsəbə icra nümayəndəliyindəki komissiyaya müraciət etsin. Biz qəsəbə icra nümayəndəliyində olduq və buradakı komissiyadan bildirdilər ki, bu torpaqlar onların balansında deyil. Halbuki ərazinin söküntüsündə Xəzər Rayon İcra Hakimiyyətinin, qəsəbə sovetinin, “Azvirt” MMC-nin nümayəndələri iştirak edirdilər. Komissiyanın sədri olan keçmiş qəsəbə sovetinin Kamal adlı işçisi bizim sənədləri 6 ay özündə saxladı və sonra özümüzə qaytardı. Sənədlərimizi alıb gedəndə Buzovna bələdiyyəsinin işçisi Mətanət Əkbərova həyat yoldaşım Ağasadıq Əliyevlə rastlaşır və bu xanımın şirin dilinə aldanaraq ona inanır. Mətanət “Torpağınızın pulunu almaqda sizə kömək edəcəm, sənədləri verin mənə” - dedi. 2011-ci ildən bizim sənədlər Mətanət Əkbərovanın əlindədir. O vaxtdan bu günə kimi bizə torpaqlarımız üçün ayrılan pul məbləğini ala bilmirik. Biz bəzi orqanlara şikayət edəndən sonra Mətanət Əkbərova bizə bildirdi ki, məhkəməyə müraciət etmək lazımdır. Biz məhkəməyə 13.06.2013-cü ildə müraicət etdik. 7 ay məhkəmə davam etdikdən sonra Mətanət gəlib bildirdi ki, “Azəryolservis” Açıq Səhmdar Cəmiyyətinin işçi qrupunun direktoru Faiq Məmmədov deyir ki, sənədləri məhkəmədən geri götürsünlər, pulları ödəyəcəkdir... Bizimlə bərabər məhkəmədə iştirak edən “Azəryolservis”in hüquqşünası Şaiq müəllim də təsdiqlədi ki, Faiq müəllim deyirsə, verəcək. Beləliklə, məhkəmə işə baxmayıb sənədləri qaytardı. Bizim xəbərimiz olmadan məhkəməyə verilmiş ərizələrdə əlavə dörd nəfərin də adını gördük. Bu vətəndaşların kim olduğu məlum deyildi. Faiq Məmmədovun istəyini Mətanət bizə gəlib bildirdi ki, “Azəryolservis” belə bir şərt qoyur: alacağımız məbləğin 50 faizi onların, 50 faizi sizin olacaq və onun adamı olan Abbasov Sarvan Yusif oğluna pullarımızın alınması üçün etibarnamə verməyimiz lazımdır. Torpaq pulunu almayan 7 nəfərdən 4 nəfəri bu şərtlə razılaşdı, qalan üç nəfər isə razılaşmadı. Biz Sarvan Abbasova pulların alınması üçün etibarnamə verdik. Mən məhkəmədən sənədləri geri götürəndə bizim sənədlərə qatılmış tanımadığımız dörd nəfərin də sənədi var idi. Baxıb gördüm ki, bizim torpaqlarımızın çertyojlarının üzü çıxarılaraq bu dörd nəfər üçün də təsdiq edilib. Bizimlə bərabər həmin dörd nəfər də Sarvan Abbasova etibarnamə vermişdir. Tanımadığımız, burada torpağı belə olmayan 4 nəfərdən biri Buzovna Bələdiyyəsinin sədri Mətləb Əliyevin qohumu Telman Qəniyev idi. Bu, əslində, sənəd saxtalaşma idi… Onu da əlavə edim ki, Mətanət Əkbərova məndən məhkəmə gedən ərəfədə 1000 manat pul da almışdır. Bu məbləği alanda bildirdi ki, məhkəmə xərclərinə lazımdır.
Beləliklə, bizim yenidən şikayətçi olduğumuzu görəndən sonra Mətanət Əkbərova 2014-cü il oktyabrın 3-də, axşam 19:00 radələrində Buzovna Bələdiyyə sədri Mətləb Əliyevin maşını ilə bizə gəldi. Qapıdan içəri girən kimi dedi ki, Mətləb müəllimlə gedib pulu aldım. Mətanət dedi ki, 30 min manatı Mətləb müəllimə verdim, 30 min manatı da sənə verirəm. Oktyabrın 5-də camaatın və sənin qalan pulunu gətirib verəcəm. Mətanət 30000 manatı mənə verəndə qəbz də yazdı, öz əl xətti ilə və yazdı ki, sənə 42000 manat da borcum qaldı. İmzası ilə də təsdqiləyib getdi.
Artıq bir il olar gözləyirik. Sonradan Mətanət məni hədələməyə başladı ki, camaata deyəcəm ki, sən pulu almısan. Hələ də mən Mətanət Əkbərovadan sualıma cavab ala bilmirəm ki, sənədim əlimdə ola-ola o pullar ona haradan verillib? Pulunu almayan vətəndaşlar isə evimə zəng edir, ailəmi və özümü narahat edir, nalayiq sözlərlərlə təhqir edirlər. Mətanət indi də bəhanələr gətirir ki, bəs Faiq müəllim sizin pullarınızı almaq üçün çalışır, amma Maliyyə Nazirliyi torpağın pullarını ödəmir.
Bu günə qədər bilmirik ki, bu qara camaatın pulunu kimlər yeyib? M.Əkbərova 2012-ci ildə mənə aid olan Azərbaycan Respublikası Abşeron rayon İcra Hakimiyyəti üzrə sərəncamından çıxarışı, 770 nömrəli 22 noyabr 1993-cü il tarixli sənədin əslini, şəxsiyyət vəsiqəmin, I qrup əlillik vəsiqəmin surətini alıb və üzərindən bir-iki ay keçəndən sonra qaytarıb mənə bildirdi ki, sənədləri itirib. Mən sənədlərin itməsinə inanmıram və xahiş edirəm ki, mənim adıma həmin sənədlərlə bankdan pul alınıb-alınmaması barədə yoxlama aparılsın. Mən və həyat yoldaşım “Azəryolservis”in işçisi Faiq müəllimin yanında olduq, o, bizi qəbul etsə də, amma heç nədən xəbəri olmadığını deyərək boyun qaçırdı. Mətanəti tanımadığını və pulları haradan aldığını guya bilmir. Mətanət bizim evə 30000 manatı gətirəndə isə Sarvan Abbasov ona telefonla zəngi etdi və camaatın pulunu verib-vermədiyi ilə maraqlandı. Biz dəfələrlə Sarvan Abbasovu tapmağa çalışmışıq. Bizim adlarımıza nə qədər pul alıb, amma bu insan bizimlə üz-üzə gəlmir, bizdən qaçır. Bircə onu bildirir ki, Mətanət hər şeyi bilir, ondan soruşun. O, “Azəryolservis”in dəllalıdır. Mən “Kapital bank”ın rabitə şöbəsində oldum və kimlərin adına pulların alındığı ilə maraqlandım. Bank bu haqda mənə məlumat vermədi. Bildirdilər ki, Sarvan Abbasovla gəlməliyəm. Mən I qrup əlil olaraq xahiş edirəm, mənə kömək edəsiniz. Buzovna Bələdiyyəsinin sədri Mətləb Əliyevin, “Azəryolservis”in əməkdaşlarının, Mətanət Əkbərova və Sarvan Abbasovun bizi aldadaraq torpaq pullarımızı hansı yollara əl ataraq mənimsədiyini araşdırasınız. Bu insanlar bizi aldadıblar və haqqımız olan pulları yeyiblər.
Hörmətlə: Quliyeva F.H.”
***
Şikayətlə tanış olandan sonra redaksiyamız araşdırma aparmağa başladı. Şikayət məktubunda adları qeyd olunan insanlarla əlaqə saxladıq. Əvvəlcə şikayətdə adı ən çox hallanan Buzovna bələdiyyəsinin müfəttişi Mətanət Əkbərova ilə əlaqə saxladıq. M.Əkbərova telefon zəngimizdən narahat oldu və sorğumuza cavab vermək istəməyərək, telefonu qapatdı. Bircə onu dedi ki, F.Quliyevanın şikayəti əsassızdır, onların torpaqları qanunsuzdur və o, heç kimin pulunu yeməyib və s. Təkrar zəngimizə isə M.Əkbərova cavab vermədi. Xeyli keçəndən sonra zəng edənin kimliyini və haradan olduğunu dəqiqləşdirmək üçün M.Əkbərova özü bizə zəng etdi. Kordinatları götürəndən sonra bildirdi ki, o, F.Quliyeva barədə aidiyyəti orqanlara müraciət edəcək. Buna onun hüququnun olduğunu bildirərək, M.Əkbərovadan torpaq pullarının nə üçün verilməməsini soruşduq. O, yenə də bildirdi ki, F.Quliyevanın şikayətinin heç bir əsası yoxdur, çünki onun torpağının sənədi saxtadır. Məcbur olub M.Əkbərovaya əlimizdə olan və Azərbaycan Respublikası Prezidenti İşlər İdarəsinin Kənd Təsərüfatı Müəssisəsinin 21 may 2003-cü il tarixli 28 saylı əmrdən çıxarışın sürətini xatırlatdıq. Orada direktor İ.M.Zeynalovun imzası ilə açıq-aydın yazılıb ki, “Baş plana uyğun olaraq fərdi mənzil tikintisi üçün nəzərdə tutulmuş ərazidən Əliyev Ağasadıx İbrahim oğluna 0,10 hektar hesabı ilə həyətyanı torpaq sahəsi ayrılsın”.
Məlumat üçün qeyd edək ki, Ağasadıx Əliyev şikayətçi F.Quliyevanın həyat yoldaşıdır. Sitat gətirdiyimiz sənədə baxmayaraq, Mətanət Əkbərova bizimlə razılaşmadı və öz mövqeyndə qaldı ki, F.Quliyeva haqsızdır. Guya o da, bizə sənəd göstərəcək ki, F.Quliyevanın sənədləri saxtadır.
Qərara gəldik ki, M.Əkbərova ilə görüşək və onun təqdim elədiyi sənədlərlə də tanış olaq. Ancaq M.Əkbərova bizimlə görüşünün vaxtını özü təyin edəcəyini bildirdi. Cünki şikayət etdiyi orqanlardan onun hər hansı bir mətbuat orqanı ilə təmasını məsləhət görmürlər.
Vaxtı boşa verməmək üçün şikayət məktubunda “Azəryolservis”in rəsmisi kimi adı keçən Faiq Məmmədovla zəngləşib görüşdük. Bizimlə görüşündə F.Məmmədov bildirdi ki, o şikayətçiləri mən də qəbul etmişəm və onlara ağsaqqal kimi böyük hörmətlə yanaşmışam: “Ancaq pulların 50%-nın bizə 50%-nin də vətəndaşlara verilməsi barədə mənim adımdan səslənən təklifin heç bir əsası yoxdur və mən ümumiyyətlə, bu barədə heç kəsə heç bir söz deməmişəm. Kim mənim adımdan belə şey uydurubsa, qətiyyətlə bildirirəm ki, bu, nəinki mənim, bütövlükdə “Azəryolservis”in adına atılan şər və böhtandır. Mən sizə deyə bilərəm ki, onların torpaq pullarının verilməsi üçün yaradılan komissiyada bu şikayətçilərin adı yoxdur. Görünür, sənədləri vaxtında verməyiblər, ya da başqa səbəblər var. Hər halda, onlar bu barədə məhkəməyə müraciət etməlidirlər. Sarvan Abbasovun adına pulların alınması üçün etibarnamə verilməsini təklif etməyim barədə yazılanlar da əsassızdır”.
Bu yerdə şikayətçinin məktubundan və bizə dediklərindən çıxış edərək F.Məmmədovdan soruşduq ki, axı bu iş məhkəməyə verilib, amma deyilənə görə, sizin o 50-nin 50-yə təklifinizdən sonra şikayətçilər iddia ərizəsini geri götürüblər və Xəzər rayon Məhkəməsində 07.2014-cü il tarixli, hakim Rəşad Həsənovun sədrliyi ilə keçən iclasda məhkəmə işi baxılmamış saxlayıb, bunu necə başa düşək?
F.Məmmədov: «Bir daha bildirirəm ki, belə bir söhbət olmayıb, məhkəmənin keçirilməməsinin səbəbini də bilmirəm. Yenə qeyd edirəm ki, bu şikayətçilərin adı dairəvi yola düşən və buna görə kompensasiya alan vətəndaşların arasında yoxdur. Qalan məsələ isə bizlik deyil. Mən bu barədə sizə rəsmi arayış da verə bilərəm ki, bu adamlara tərəfimizdən pul ayrılmayıb. Mənim adımdan çıxış edən Mətanət Əkbərovanı isə tanımıram, sadəcə, adını eşitmişəm”.

Mətanət Əkbərovanı «yumşaldan” səbəb...

F.Məmmədovla görüşdən sonra yenə Mətanət Əkbərova ilə telefon əlaqəsi saxladıq. Bu dəfə M.Əkbərova bizimlə sakit danışdı. Bildirdi ki, F.Quliyevadan başqa adları keçən digər 6 nəfərin heç biri şikayətçi deyil, hamısı da inanır ki, onların kompensasiyaları veriləcək. Bu yerdə M.Əkbərovadan F.Quliyevanın şikayətində göstərdiyi «Mətanət bizə 30 min manat verib və imzası ilə də təsdiq edib ki, 42 min manat qalıb” məsələsinə aydınlıq gətirilməsini istədik. M.Əkbərova əvvəlcə bildirdi ki, o, hökmətin verdiyi puldur, qalanı da veriləcək... Bir az söhbətdən sonra isə söylədiklərinin tərsini deyərək bildirdi ki, «Mən o pulu cibimdən vermişəm...”.
-Bəs nəyə görə hökumətin pulunu cibinizdən verirsiniz?- sualına M.Əkbərova bu dəfə belə cavab verdi:
-Bilirsiniz, mən sizə demək istəmirdim. O hökumətin pulu deyil, mən onlardan torpaq sahəsi almaq istəyirdim. Firəngizgilin bir neçə yerdə torpaq sahəsi var. 72 min manata danışmışdıq, 30 min manatını verdim, danışdıq ki, 42 min manatını da sonra verərəm. Lakin sonra qalan pulu düzəldə bilmədim. İndi də verdiyim 30 min manatı geri ala bilmirəm. Amma o pulu onlardan alacağam...
Məcbur olub yenidən F.Quliyeva ilə görüşməli olduq. Çünki qarşı tərəf bir gündə az qala dörd fərqli söz deyirdi... Bu dəfəki görüşümüz qızının, həmçinin şikayətçinin həyat yoldaşı Ağasadıx Əliyevin iştirakı ilə oldu. Hər üçü dönə-dönə bildirdilər ki, “M.Əkbərova yalan danışır, o, 2014-cü ildə oktyabrın 3-də, saat təxminən 19:00 radələrində bizə gəldi və gülə-gülə dedi ki, görürsünüz, deyirdiniz Mətanət bizi aldadır, budur, sizə pul gətirmişəm. M.Əkbərovanın çantasında 200 min manat pul var idi. Oradan 100 minlik “paçka”nın birini cıraraq açdı və bizə 30 min manat pul verdi.

«Mətanət bizimlə söhbətində bildirdi ki, 30 min manatı da bələdiyyə sədri Mətləb Əliyevə qohumunun adına olan torpağa görə vermişəm”

Əli ilə də yazdı ki, qalan 42 min manat pulu 3 günə verəcəyəm. Artıq bir ilə az qalıb, lakin hələ də qalan puldan səs-soraq yoxdur. Mətanət bizimlə söhbətində bildirdi ki, 30 min manatı da bələdiyyə sədri Mətləb Əliyevə qohumunun adına olan torpağa görə vermişəm. Elə pulu da özünün dediyinə görə Mətləbin maşını ilə gətirmişdi. Çünki Mətanətə Mətləb tez-tez zəng vururdu ki, tez gəl. Elə həmin ərəfədə Sarvan da zəng vurub Mətanətdən soruşub ki, vətəndaşların pullarını paylayırsanmı? O da, cavab verdi ki, bəli, paylayır. Mətanət də gedəndə bildirdi ki, gedirəm o biri şikayətçilərin pullarını verməyə. Sonradan məlum oldu ki, Mətanət o şikayətçilərə 500, 1000, 1500 civarında pullar verib. Biz pulların alınması üçün Mətanətin göstərişi ilə Sarvan Abbasov adlı görmədiyimiz, tanımadığımız bir nəfərə etibarnamə vermişik. İndi biz bilmirik S.Abbasov kimdir, haradadır və bankdan nə qədər pul çıxardıb? Axı həmin büdcədən verilən pula Mətanətin nə aidiyyəti var?”.
Göründüyü kimi, burada bir çox qaranlıq məqamlar var. Doğrudanmı, M.Əkbərova çantasında 200 min manat gətirib? Doğrudanmı, S.Abbasov bankdan o qədər pul çıxardıb? Bu suallara cavab tapmaq üçün bir neçə gün zənglərdən və axtarışlardan sonra Laçın rayonunun Mığıdərə kəndində 1968-ci ildə anadan olmuş Abbasov Sarvan Yusif oğlunu tapdıq. Zəngləşib onu redaksiyamıza dəvət etdik. Bizimlə görüşündə S.Abbasov bunları bildirdi: “Yol tikintisi işləri ilə əlaqədar Mətanət Əkbərovanı tanıyıram. İndi mən o sahədə işləmirəm. Ancaq qətiyyətlə bildirirəm ki, mən bankdan 1 manat da olsun pul götürməmişəm. Düzdür, şəxsiyyət vəsiqəmin surətini adıma etibarnamə alınması üçün vermişəm. Ancaq mən etibarnamə görməmişəm. Xahiş edirəm, şikayətçidən zəng edib soruşun və görün etibarnamənin əsli kimdədir. Çünki etibarnamənin əsli mənə gəlib çatmayıb. Etibarnamənin də banklar yalnız əslini qəbul edirlər, surəti ilə isə heç bir bank 1 manalıqda olsa, əməliyyat apara bilməz”.
Elə S.Abbasovun yanındaca şikayətçi F.Quliyevaya zəng edib, həm özü, həm də qızı ilə danışdıq. Onlar təsdiq etdilər ki, etibarnamənin əsli özlərindədir, amma həmin etibarnamənin əslini bir il Mətanət özündə saxlayıb, sonra geri qaytarıb. Belə çıxır ki, o, Bank əməkdaşları ilə şübhəli əlaqədə olub... Bu yerdə onları uzun müddət axtardıqları Sarvan Abbasovla calaşdırdım və telefonla bir xeyli söhbət etdilər, şikayətçilər verdikləri suallara qismən cavab aldılar. Sonda belə qərara gəldilər ki, görüşüb birlikdə banka getsinlər və öyrənsinlər görək, ümumiyyətlə, S.Abbasovun adına pul götürülüb, ya yox?
Artıq S.Abbasovla da məsələ aydınlaşdı. Qalırdı bircə bütün bu məsələlərin başında duran Mətanət Əkbərova ilə görüşmək. Bu müddət ərzində bir neçə dəfə M.Əkbərova ilə telefon əlaqəsi saxlayıb ortaya çıxmış növbəti suallara münasibətini öyrənirdik. Onu da eşitmişdik ki, M.Əkbərovanın adında məhkumluq var. Bu barədə M.Əkbərova telefonda bizə bildirdi ki, “o, bir yanlışlıq idi və mənim üzərimdən məhkumluq çoxdan götürülüb. Görüşəndə sizə bu barədə məhkəmənin qətnaməsini göstərərəm” və sair.
Nəhayət, neçə vaxtdan bəri telefonla danışdığımız M.Əkbərova ilə görüşdük. O, telefonda bizə bildirmişdi ki, “F.Quliyeva sizinlə görüşəndə söz vermişdi ki, qalan şikayətçiləri də gətirəcək və siz onları dinləyəcəksiniz. Onda mən sizə demişdim ki, o şikayətçilər Firəngizdən narazıdırlar və bizimlə görüşə gəlməyəcəklər (doğrudan da F.Quliyeva, həyat yoldaşı A.Əliyev və qızları Aygün xanımla görüşərkən, söz versələr də şikayətçilər gəlməmişdilər - red.). Ancaq onları mən sizinlə görüşə gətirəcəyəm ki, görün haqlı kimdir, haqsız kim?”
M.Əkbərova ilə görüşümüzə Sücai Qızxanım, Hüseynova Hürünün oğlu Şahlar və bələdiyyə sədri Mətləb Əliyev də qatılmışdı. Şahlar ayaqüstü, necə deyərlər, 2 dəqiqəlik gəlib-getdi və bircə onu dedi ki, Mətanət xanım hər şeyi bilir. Nə etmək lazım olduğunu bilir və edəcək. Sücai Qızxanım isə F.Quliyevadan narazılıq etdi və bildirdi ki, bizim Mətanət xamından heç bir şikayətimiz yoxdur. Bu barədə şikayətçinin özü və qızı Aygün xanımla telefonda danışarkən Aygün xanım bunları dedi: “Mətanət sizinlə görüşə saxta şikayətçilər gətirib. Mən Şahlarla danışmışam, o, həmin gün ümumiyyətlə evdən bayıra çıxmayıb. Sizinlə görüşdə Mətanət deyir ki, guya Akif də olub. Onunla da əlaqə saxladıq, o da görüşə gəlməyib. Mətanət, Allah bilir sizinlə görüşə kimləri gətirib”.
Biz şikayətçiləri şəxsən tanımadığımızdan, təbii ki, dəqiq bir söz deyə bilməzdik (Lakin sonradan telefonla şahidlər Akif və Şahlarla danışdıq, bildirdilər ki, onlar həmin görüşdə olmayıblar, adlarından sui-istifadə olunub...).
M.Əkbərova görüşümüzdə onun məhkumluğu barədə də söhbət etdik. Bununla bağlı, yəni məhkumluğunun adından götürülməsi barədə bizə məhkəmə qətnaməsini göstərdi.
Bələdiyyə sədri Mətləb Əliyev də söhbətə qoşularaq bildirdi ki, “M.Əkbərovanın heç bir günahı yoxdur, pullar hələ verilməyib. O, çalışır ki, camaatın halal haqqı olan pulları verilsin. O ki qaldı Mətanətin mənə 30 min manat verməsi, bu, cəfəng fikirlərdir. Mənim bildiyimə görə, onlara verilən 30 min manat pul Mətanətin onlardan hansısa torpaq almasına görə verilən puldur. Məni tanıyanlar bilir ki, mən halal və düz adamam. Özüm də Həcc ziyarətinə gedib-gəlsəm də, mənə Hacı deyilməsinə razı olmuram. Mən həmişə çalışmışam ki, insanlara yaxşılıq edim. Heç kəsə heç vaxt yalan danışmıram. Ona görə də mənə heç bir böhtan və şər yapışmır. Bu, tamamilə yalan söhbətdir”.
Mətanət Əkbərova isə öz növbəsində bildirdi ki, onda heç vaxt 200 min manat pul olmayıb: “Firəngizgil bunu harada görüblər, necə sübut edə bilərlər? Guya hələ Sarvan da mənə zəng vurub həmin ərəfədə pulların necə paylanmağını soruşub. Bu, ağ yalandır. Bəli, mən onlara 30 min manat vermişəm. Bu da qeyd etdiyim kimi, onlardan almaq istədiyim torpağın pulu idi. Mənim adımı nahaqdan hallandırıblar və mənə şər-böhtan atıblar. Ona görə də onları məhkəməyə verəcəyəm”.
Doğrudan da maraqlı mənzərə alınır. Biri deyir 200 min manat pulla evimizə gəlib, o biri isə deyir ki, belə şey olmayıb. Ona görə də elə M.Əkbərovanın yanında F.Quliyevaya zəng vurub özü və qızı Aygün xanımla danışdıq. Aygün xanım bildirdi ki, telefonu ver Mətanətə deyiləcək sözüm var. M.Əkbərova isə Aygünün də eşitdiyi səslə bildirdi ki, “mənim onlarla heç bir görüşüm və danışığım ola bilməz. Haqqımda məhkəməyə şikayət versinlər, onlarla məhkəmədə görüşəcəyəm və hər şeyi orada danışacağam. Onda məlum olacaq ki, haqlı kimdir, haqsız kim?”.
Telefonla Firəngiz xanım və qızı Aygün xanım nə qədər cəhd etsələr də, M.Əkbərova onlarla danışmadı, ancaq onun uca səslə dediklərinin demək olar hamısını eşidirdi və fikirlərini mənə bildirirdilər ki, M.Əkbərova tamamilə yalan danışır.
***
Ancaq bzim üçün bir çox məsələlər yenə qaranlıq qaldı. Onlardan biri və ən vacibi bu idi ki, məlum kompensasiyalara Buzovna Bələdiyyəsinin sədri Mətanət Əkbərovanın nə aidiyyəti var idi? O, kənardan tanıdığı adama, konkret halda, Firəngiz Quliyevaya birdən-birə 30 min manatı nəyə görə verirdi: necə deyərlər, qara qaşına, ala gözünə, yoxsa...
Yəqin ki, bu məsələni Baş Prokuror Yanında Korrupsiyaya Qarşhı Mübarizə İdarəsi araşdırıb hüquqi nəticəyə gələcək.
Redaksiya bütün prosesi sonadək izləyəcək. \\ tezadlar.az \\
(Davamı var)