BolgeXeber.Com » Dünya » Suriyada Əsəd rejimindən insanlıq cinayəti - kimyəvi hücum nəticəsində ölənlərin sayı 72 nəfərə çatıb

Suriyada Əsəd rejimindən insanlıq cinayəti - kimyəvi hücum nəticəsində ölənlərin sayı 72 nəfərə çatıb

5-04-2017, 14:26

Oxunub: 2 635

Suriyanın İdlib əyalətində kimyəvi hücum nəticəsində həlak olanların sayı 72 nəfərə çatıb

Britaniyada yerləşən İnsan Haqlarının Müdafiəsi üzrə Monitorinqin Suriya Mərkəzi ölənlər arasında 20 uşağın və 17 qadının olduğunu bildirib.

Bolgexeber.com xəbər verir ki, hüquq müdafiəçiləri hadisə nəticəsində itkin düşənlər olduğundan həyatını itirənlərin sayının artacağını güman edirlər.

Xatırladaq ki, aprelin 4-də səhər saatlarında Xan-Şeyhun şəhəri ağır bombardmana məruz qalıb. Suriyalı fəalların verdiyi məlumata əsasən, ölkənin şimal-qərbində yerləşən şəhərə ya hökumət qüvvələri, ya da Rusiyaya məxsus aviasiya hücum edib. Bombardmanın ardından insanlar boğulmağa və qusmağa başlayıb, bəzilərinin ağzından köpük gəlib.

TASS informasiya agentliyinin yaydığı xəbərdə bildirilir ki, Rusiya və Suriya hərbçiləri insidentdə iştiraklarını təkzib ediblər. Bir müddət sonra RF Müdafiə Nazirliyi Xan-Şeyhunun şərq ətrafına Suriya aviasiyasının zərbə endirdiyini açıqlayıb. Rusların məlumatına əsasən, bombardman nəticəsində yaraqlıların zəhərli maddələrdən istifadə etməklə silah-sursat hazırladıqları sex dağılıb.

Britaniya və Fransa İdlib əyalətində kimyəvi silahdan istifadə olunmasını qınayan qətnamə layihəsini BMT-nin Təhlükəsizlik Şurasına çıxarıb. Təhlükəsizlik Şurası Xan-Şeyhun şəhərindəki insidentlə bağlı bu gün axşam saatlarında açıq iclas keçirəcək.

Çox Oxunanlar