Astroloqdan proqnoz: "Bu məmurlar işdən çıxarılacaq, devalvasiya isə…"

Astroloqdan proqnoz: "Bu məmurlar işdən çıxarılacaq, devalvasiya isə…"

Astroloqdan proqnoz: "Bu məmurlar işdən çıxarılacaq, devalvasiya isə…"Artıq 2019-cu ilin ikinci yarısıdır. İlin əvvəlində elan olunduğu kimi, astroloji baxımdan 2019-cu il sarı donuz ili hesab olunur.

Bəs, ilin ikinci yarısında bizi nələr gözləyir? Donuz ilinin sonu ölkəmizə nələr vəd edir?

"Qoroskop" qəzetinin baş redaktoru, tanınmış astroloq Səbuhi Rəhimli bu barədə proqnozlarını Modern.az-a açıqlayıb. Onun sözlərinə görə, ilin əvvəlindəki hadisələrdən aydın olduğu kimi, qaban ili nisbətən sakit və barışdırıcı ildir:

"Münaqişələrə nöqtə qoyulan, qarşıdurmalarda qalibin qalibiyyət elan etdiyi vaxtdır. İntriqalardan qaçan, dürüst, ağıllı, zəhmətkeş insanların ilin ikinci yarısında da bəxti gətirəcək, onlar daha şanslı olacaqlar. Qətiyyətli, ötkəm, həqiqətpərəst olmaq lazımdır. Astroloji bilgilərə görə, su və od ünsüründən olan bürclər bütün il boyu şanslı bürclərdir. Başda isə qoç və əqrəb gəlir, çünki ilin planeti Marsdır, o iki bürc də Marsın himayəsindədir. Bilməyənlər üçün deyim ki, od ünsürü qoç, şir, oxatan, su ünsürü isə xərçəng, əqrəb və balıqlardır. İllərin də uğurluları var ki, 2019-cu ildə qaban, pişik, keçi – bəzən buna donuz, dovşan, qoyun da deyirlər – şansı illərdir. Əslində dediyim uğurlu, uğursuz məsələsi də doğru olmaz, çünki ilin özünün dürüst olmaq, fikrini açıq demək kimi kodları, şifrələri var. Hansı ildə doğulmağından asılı olmayaraq, kim nəbzi tutsa, onun üçün bütün il yaxşı keçəcək”.

Rəhimli hazırda davam edən qaban ilinin ruzi-bərəkətli il olduğunu diqqətə çatdıraraq qeyd edib ki, 12 zodiak ili arasında ən az boşanma məhz bu ildə olur:

"Bu il insanların daha çox doğulduğu ildir. Bəzi illər var, bətndə uşağın yetişməsi, hamiləlik çox çətin keçir, bəzən pozulmalara gətirib çıxarır. Qaban ilində adətən belə olmur, dünyaya sağ-salamat, güclü uşaqlar gəlir. Yeri gəlmişkən, elə ilin birinci yarısında Azərbaycanın 10 milyonuncu sakini doğuldu. Bunu da cari ilin müsbət hadisələrindən biri kimi yadda qaldı”

Astroloq 2019-cu ilin ikinci yarısında Azərbaycanında siyasi cəhətdən gözləniləcək məqamları da açıqlayıb:

"İlin ikinci yarısında da böyük rəqabətlər olacaq. Müxtəlif siyasi dairələrdə daxilən gizlədilmiş, bilinməyən rəqabətin, qarşıdurmanın şahidi olacağıq. İlin birinci yarısında olduğu kimi ikinci yarısında da bəzi məmurların (onların sayını bilirəm) vəzifəsindən uzaqlaşacağını müşahidə edə bilərik. Qarabağla bağlı isə nisbətən sakitlikdir, halbuki döyüş əməliyyatları aparmaq üçün şanslı vaxtlar da var. Şanslı vaxt hər zaman olur, sadəcə ondan istifadə edib-etməmək qalır. Fevral və may ayı bu məsələ üçün uğurlu hesab edildi. İlin ikinci yarısında isə avqust ayının uğurlu olacağı gözlənilir. Hərbi əməliyyat aparıb torpaqların azad olunması naminə o dövrdən istifadə etmək olar. İlin əvvəlində qeyd etmişdim ki, 5 əsr nə qədər qaban ili var, hamısını araşdırmışam, çünki statistika insanda təsəvvür yaradır. Qaban ilində elə bir müharibə olmayıb. İl başlamadan Ukrayna-Rusiya və ya NATO-Rusiya qarşıdurması yaşanırdı, Avropada, Balkanlarda gərginlik başlamaqda idi, Suriyada da qarışıqlıq müşahidə olunurdu. Bunların hamısı ilin əvvəlində həll olundu. İlin ikinci yarısında da eynilə sabitlik gözlənilir”.

Səbuhi Rəhimli cari ilin ikinci yarısı insanların maliyyə durumunun necə olacağı sualını da cavablandırıb:

"2019-cu il başlayan kimi söz-söhbət var idi ki, növbəti devalvasiya olacaq. Ancaq mən ilin əvvəli verdiyim müsahibədə astroloji hesablamalarıma dayanaraq ilin birinci yarısı devalvasiyanın olmayacağını əminliklə qeyd etdim. Proqnozum təsdiqini tapdı. Lakin bizdə gedişat zaman-zaman dəyişə bilir, gərək o prosesin növbəti mərhələsi gələ ki, proqnozlaşdıra bilək. İlin ikinci yarısında da maliyyə məsələləri ilə bağlı ciddi dəyişikliklər gözlənilmir”.
30-07-2019, 15:03
Geri qayıt