BolgeXeber.Com » Bölgə » Şirvan sakinləri yayın istisində suya həsrət qalıblar

Şirvan sakinləri yayın istisində suya həsrət qalıblar

13-06-2014, 20:30

Oxunub: 2 385

“Mən Qorxmazın adamıyam” deyib istənilən məsulliyətdən boyun qaçıra bilir. Bir sözlə, həmişə olduğu kimi, məmur özbaşınalığı davam edir”

Şirvan şəhərinin sakinlərinin “su davası” haqda yazmışdıq. Hələ may ayından Şirvan sakinləri prezidentə müraciət edərək su istədiklərini, eyni zamanda “Azərsu” ASC-nin sədri Qorxmaz Hüseynovu Şirvana göndərməsini xahiş etmişdilər. Sakinlərin su deyib imdad istəmələrinə rəğmən problem çözülməmiş qalıb.
“Şikayətim yaşadığım Əli Bayramov küçəsinin içməli suya olan tələbatının ödənilməməsindən, sakinlərin su sarıdan korluq cəkməsindəndir”. Bu sözləri “Azadlıq” radiosuna Şirvan şəhəri, Əli Bayramov küçəsinin sakini Elçin Mehtiyev yazıb. Şikayətçi bildirir ki, bu barədə şəhər rəhbərliyinə, Şirvan su-kanal idarəsinə, hətta prezidentə də məktub ünvanlayıblar. Ancaq heç bir nəticəsı hasil olmayıb: “İdarənin rəisi Mirmuxtar Məmmədov sakinlərin istəklərinə məhəl qoymayaraq özbaşınalıqlar edir, su çəkilişi üçün ayrılmış vəsaiti yeyib talayır. İndi hansı zamandır ki, su üzünə həsrət qalmışıq... Həm də Kür çayının 200 metirliyində olan bir ərazidə... Sutkalıq gücü 6000 m3 su istehsal etmə qabiliyyətinə malik olan Şirvan Kür-su idarəsi nədənsə öhdəsinə düşən funksiyanı yerinə yetirmir. Mirmuxtar Məmmədov iş görmək əvəzinə istirahət edir. Artıq heç bir hədədən qorxub-çəkinmyən bu məmur “Mən Qorxmazın adamıyam” deyib istənilən məsulliyətdən boyun qaçıra bilir. Bir sözlə, həmişə olduğu kimi, məmur özbaşınalığı davam edir”.
Elçin Mehtiyevin şikayəti bununla bitmir. O bildirir ki, Mirmuxtar Məmmədov kürəkənini şəxsi sürücüsü işinə götürərək idarənin büdcəsindən ona 1200 manat əməkhaqqı təyin edib:

Kürə yaxın yerləşən Şirvan şəhərini susuz qoyan Mirmuxtar Məmmədovun bu əməllərini işıqlandırmağını xahiş edirəm. Bu boyda problemləri qoyub ilin-günün bu vədəsində istirahət üçün məzuniyyətə çıxan səhlənkar müdirə başqa nə ad vermək olar?”
“Azərsu” ASC-nin mətbuat xidmətinin rəhbəri Anar Cəbrayıllı şikayəti araşdırdığını deyib: “Bizim işçiləri onun yaşadığı ünvana yollamışıq. İşçilərimiz baxış keçiriblər və məlum olub ki, bu adamın evində su gəlir. Sadəcə, ora-bura dayanmadan yazmağı, ona-buna böhtan atmağı xoşlayır”. Anar Cəbrayıllı həmçinin “Facebook” səhifəsində də Şirvandan olan başqa şikayətlərə reaksiya verib. O yazıb ki, şikayət edən tərəf həmişə özünün yaratdığı problemləri qabartmır, bütün günahları qarşı tərəfdə görür: “Şirvan şəhərində mexaniki sayğacların smart tipli sayğaclarla dəyişdirilməsi qanunvericiliyin tələblərinə tam uyğun qaydada aparılır: “İstifadə olunan suyun dəqiq uçotunun aparılması üçün 2012-ci ilin may ayından etibarən smart tipli su sayğaclarının quraşdırılmasına başlanılıb. Bu sayğaclar əhali abunəçiləri üçün dövlət vəsaiti hesabına, qeyri-əhali abunəçiləri üçün isə onların vəsaiti hesabına quraşdırılır. İlkin mərhələdə Bakı və Sumqayıt şəhərləri, Abşeron rayonunda başlanan proses artıq ölkənin bütün ərazisini əhatə edir.
Anar Cəbrayıllı yazıb ki, Şirvan şəhərində ilk növbədə mexaniki sayğacları işləməyən və debitor borcu olan obyektlər smart tipli sayğacla təmin olunurlar və bu proses bütün abunəçiləri əhatə edəcək:

“Qeyd edim ki, smart tipli su sayğaclarının quraşdırılması Azərbaycan Respublikası Prezidentinin 05.09.2012-ci il tarixli, 2421 nömrəli sərəncamının 24-cü (kommunal xidmətlərin təkmilləşdirilməsi) bəndinin, 24.1 (elektrik enerjisinin, təbii qazın və suyun istehlakı və haqqının ödənilməsi sahəsində smart kart tipli sayğacların quraşdırılması prosesinin başa çatdırılması) yarım bəndinə əsasən həyata keçirilir”.

Çox Oxunanlar