BolgeXeber.Com » Gündəm » Bu gün TİA.AZ-ın 5 yaşı tamam olur

Bu gün TİA.AZ-ın 5 yaşı tamam olur

2-10-2014, 12:25

Oxunub: 3 883

Sayt rəhbərliyi maraqlı layihələr olacağını deyir

Bolgexeber.com bildirir ki,bu gün Tribuna İnformasiya Agentliyinin 5 yaşı tamam olur. Artıq 5 ildir ki, www.tia.az saytında mütəmadi yenilənən internet qəzet müstəqil informasiya siyasəti həyata keçirən media orqanıdır. 2009-cu il oktyabrın 2-dən fəaliyyətə başlayan tia.az saytında Azərbaycanın və dünyanın siyasi, sosial-iqtisadi, ictimai mədəni həyatında olan yeniliklər haqqında operativ və obyektiv xəbərlər oxuculara çatdırılır. Həmçinin saytda müxtəlif sahələrdən bəhs edən müsahibələr, təhlillər, reportajlar, müəllif yazıları işıqlandırılır.
Qeyd edək ki, tia.az bu ilin oktyabrından tamamilə yeni formatda yenilənməkdədir. Həmçinin saytın kollektivində də müəyyən dəyişikliklər var. Saytın qurucusu və rəhbəri Əlişir Əhəd bildirib ki, əvvəlki kollektivdən bir-iki əməkdaş saxlamaq şərtilə, əksəriyyət dəyişib: “İndi ölkənin tanınmış jurnalistləri ilə işləyirik. Sentyabrın 1-dən etibarən müntəzəm yenilənməyə başlamışıq. Saytı bir növ portal halına gətirmişik. Ölkə mətbuatında gedən ən maraqlı xəbərləri, məqalələri saytda paylaşırıq. Bundan əlavə, sosial, siyasət, iqtisadiyyat sahələrində peşəkar jurnalistlər cəlb etmişik, özəl xəbər və mövzularımız olur”.

Əlişir Əhəd: "5 ildə cəmi bir dəfə məhkəməyə verilmişik"

Ə.Əhəd qeyd edib ki, 5 il ərzində tia.az-ın ərsəyə gəlməsi, ayaqda durması, operativliyini təmin etməsi üçün xeyli əziyyət çəkiblər. “Heç bir iş asan başa gəlmir. Xəbərçilik, informasiya ilə təmin etmə məsələsi isə olduqca ağır və məsuliyyətlidir. Çünki bir xəbər agentliyi olaraq, oxucunu ölkədə və dünyada baş verən bütün hadisələrlə məlumatlandırırsan. Müasir dünya düzənində bunun nə qədər çətin olduğuni deməyə gərək yoxdur. Zövqlər, maraqlar, hər şey bir-birindən fərqlənir. Belə olanda, şübhəsiz əziyyətlərimiz də artır. Amma buna baxmayaraq, xeyli zövqlü və maraqlı işimiz var”.
Tia.az-ı ən minimal imkanlar hesabına yaratdığını deyən portal rəhbəri vurğulayıb ki ilk dəfə bu ideyanı reallaşdıranda iradlarla rastlaşıb: "Mənə deyirdilər ki, boş işlərlə məşğul olursan. Amma zaman keçdi, 5 ildən sonra həmin dostlarım, tanışlarım bu gün özləri xəbər portallarına rəhbərlik edirlər və ya orada işçi kimi çalışırlar. Kiçik resursla bu gün ölkənin sayğın, seçkin bir saytı olmuşuq. Təbii ki, bu günkü durumumuzla razı deyilik. Daha güclü, daha böyük auditoriyanı əhatə etməyə çalışırıq”.
Ə.Əhəd bildirib ki, yeni layihələrin üzərində çalışırlar. Onun sözlərinə görə, hazırda bir neçə yeniliklər ediblər. “Bir neçə yeniliklər etmişik. Bu yaxınlarda tia.az-ın yeni formatını hazırlamışıq, artıq istfadədədir. Bundan əlavə, bir sıra maraqlı layihələr də həyata keçirməyə hazırlaşırıq. Bu gün ölkə mətbuatında sayt bolluğu olsa da, bir sıra boşluq var. Məsələn, hazırda analitik yazılar və araşdırmaların sayı həddindən artıq azdır. Bu boşluğu doldurmaqda iddialıyıq. Dünyada və ölkədə baş verən proseslərin mobilliyini nəzərə alaraq, daha operativ xəbər yayımlamaq üçün yeni vasitələrdən istifadə edirik. Eləcə də, digər məsələlərdə də ciddi şəkildə öndə olmaq niyyindəyik”.
Əlişir Əhəd həmçinin internet medianın mövcud problemlərindən də danışıb. O deyib ki, faktiki olaraq həmin problemləri aradan qaldırmaq tək bir saytın imkanları daxilində deyil: “Bu gün saytların yaşaması, fəaliyyət göstərməsi üçün ciddi maliyyə resursuna ehtiyac var. Bu da əsasən reklam bazarı hesabına formalaşan bir məsələdir. Təəssüf hissi ilə qeyd etməliyəm ki, Azərbaycanda uzun illərdir reklam bazarı formalaşmayıb. Daha dəqiqi, burda da inhisar var. Həmçinin, bəzi dələduzlar peyda olub və onlar pul qazanmaq üçün bütün vasitələrdən istifadə edirlər. Məsələn, bu gün nüfuzlu, çoxsaylı oxucusu olan saytların adından sui-istifadə edən bir şəbəkə mövcuddur. Onlarla heç hüquq-mühafizə orqanları belə bacara bilmir. Belələrini, mətbuatdan rədd etmək lazımdır. Çünki belə adamlar mətbuatın normal qaydada inkişa etməsinin başlıca əngəlləridir”.
Sayt rəhbəri maraqlı bir məqama da toxunub. O deyib ki, indiyə qədər tia.az yazdıqlarına görə, cəmi bir dəfə məhkəməyə verilib. “5 il ərzində yazdıqlarımızdan dolayı cəmi bir dəfə məhkəməyə verilmişik. Bu hər sayta nəsib olan hal deyil. Ona görə yox ki, heç nə yazmadıq deyə, bizi məhkəməyə çəkməyiblər. Və ya Azərbaycanda məmurlar mətbuatla “mehriban” davranırlar. Əksinə, biz maksimum çalışmışıq ki, bütün tərəflərin mövqeyini verək ki, kimsə bizi məhkəmlərə verə bilməsin. Yəni, dürüst, dəqiq və obyektivliyimizdən dolayı başımız ağrımayıb”.
Ə.Əhəd qeyd edib ki, tia.az tərəfsiz fəaliyyə göstərəcək: “Bu, həmişə belə olub, indi də belə olacaq. Heç bir məmura, quruma bağlılığımız yoxdur. Siyasi tərəfkeşliyimiz də həmçinin. Tia.az-da müxalifətin də mövqeyi əksini tapır, hakimiyyətin də. Hər iki tərəfin fəaliyyətini əks etdirən xəbərlərə saytımızda yer ayırırq. Məqsədimiz oxucunu bir mənbədən informasiya ilə təmin etməkdir”.
Sayt rəhbəri Bolgexeber.com-a onu da bildirib ki, yaxın zamanlarda sayta yeni əməkdaşlar cəlb olunacaq: “Yeni layihələrimiz də olacaq. Düzdür, hazırkı rəqabətli şəraitdə bu, çətin olacaq, amma çalışacağıq ki, saytımız öncüllərdən olsun. Yazılarımızda, xəbərlərimizdə obyektivliyə, tərəfsizliyə xüsusi önəm verəcəyik. Ölkənin qayda-qanunları çərçivəsində fəaliyyət göstərəcəyik”.
Redaksiya Azərbaycanda fəaliyyət göstərən bütün dövlət qurumlarını, siyasi partiyaları, QHT-ləri "Kiv haqqında" qanunun müddəalarına uyğun olaraq əməkdaşlığa dəvət edir.
Bolgexeber.com olaraq Tia.az-ın rəhbəri Əlişir Əhədi və saytın kollektivini təbrik edirik. Onlara bol-bol uğur və müvəffəqiyyətlər arzu edirik.

Çox Oxunanlar