BolgeXeber.Com » Gündəm » İcra başçısı qəzəblənib

İcra başçısı qəzəblənib

21-01-2013, 10:20
Oxunub: 4 536 Dünən Gəncə şəhərində 20 yanvar şəhidlərinin anım tədbirində qalmaqal olub.

Moderator.az saytının məlumatına görə, Gəncə Şəhər İcra Hakimiyyəti tərəfindən təşkil olunan mərasimdə şəhər ictimaiyyətinin nümayəndələri ilə yanaşı şəhid ailələri də qatılıb.

Ancaq icra başçısı Elmar Vəliyevin çıxışından sonra qalmaqal yaranıb. Moderator.az-a verilən xəbərə görə, şəhid analarından biri mikrofonu alaraq, Gəncədə şəhid ailələrinə qarşı təzyiqlərdən və diqqətsizlikdən gileylənib. Çıxış edən şəhid anası Gəncədə şəhid ailələrinin adına olan mağazaların uçurulması, şəhərin bəzi yerlərindəki yaşayış binalarında olan barelyef və bulaqların sökülməsinə etirazını bildirib. Moderator.az xəbər verir ki, şəhid anasının çıxışı Elmar Vəliyevi qəzəbləndirib. İcra başçısı dərhal yüksək səslə “bu nə təxribatdır? Polis rəisi, prokuror hardadır” deyə onları axtarıb. İcra başçısının bu reaksiyasından sonra qadını ərazidən uzaqlaşdırıblar. Elmar Vəliyev üzünü tədbir iştirakçılarına tutaraq, qadının çıxışının təxribat olduğunu və bunun ciddi araşdırılacağını bəyan edib. Şahidlərin sayta verdiyi məlumata görə, icra başçısı şəhid anasının başqaları tərəfindən öyrədildiyini deyib.

Deyilənlərlə bağlı E.Vəliyevin və ya onun nümayəndəsinin mövqeyini dərc etməyə hazırıq.