Bizimlə əlaqə | Reklam
BolgeXeber.Com » Gündəm » Keçmiş OMON-çular ədalətli qərar istəyirlər

Keçmiş OMON-çular ədalətli qərar istəyirlər

6-05-2013, 10:40
Oxunub: 4 751 80 ömürlük məhbus Əli Hüseynlinin təklifinə baxılacağına ümidlidir

Aclıq aksiyası keçirən məhbusların cəzalarına yenidən baxılması məsələsi açıq qalır. Qobustan həbsxanasında cəza çəkən, ömürlük azadlıqdan məhrum olunmuş 80 məhbus intizarla parlamentin komitə sədri Əli Hüseynlinin bir müddət öncə səsləndirdiyi fikrin qanunda əks olunacağı günü gözləyirlər. Ə.Hüseynli ötən il ömürlük məhbusların cəzalarının dəyişdirilərək 15 illə əvəz olunması xahişinə baxıla biləcəyini söyləmişdi.
Lakin bu günə qədər məsələ açıq qalıb.

Nəzərə çatdıraq ki, hazırda ömürlük məhkumlar cəzalarına yenidən baxılması tələbi ilə aclıq aksiyası keçirirlər.

Bu həbsxanada əvvəllər də eyni tələblərlə aksiyalar keçirilib. Məhbuslar dəfələrlə dövlət başçısı İlham Əliyevə də həyatlarını dəyişəcək məsələnin həlli üçün müraciət ediblər.

Bu yaxınlarda isə vəkil Elçin Sadıqov Qobustan həbsxanasında saxlanılan, ömürlük həbs cəzası almış keçmiş OMON-çular Elçin Əmiraslanov, Arif Kazımov və Səfa Poladovun əfv olunmaları üçün prezident İlham Əliyevə və Əfv Komissiyasına müraciət edib. Bununla bağlı qəzetimizə açıqlamasında vəkil demişdi ki, OMON-çuların işi ilə bağlı ədalətli məhkəmə araşdırması aparılmayıb: “Bundan başqa, həmin vaxt qanunda ölüm cəzasının 15 və ya 20 ilə qədər əvəzlənməsi məsələsi var idi. Yəni OMON-çuların cəzası ömürlüklə əvəzlənə bilməzdi. Məhkəmələr ölüm hökmü ləğv olunanda səhv olaraq OMON-çuların cəzasını ömürlüklə əvəz ediblər. Həmin qərar qanunsuz olub. Məhkəmələr həmin qərarı verərkən 10 fevral 1998-ci il tarixli qanuna istinad ediblər. Həmin qanun isə 10 sentyabr 2000-ci ildə qüvvədən düşüb. Yəni həmin qərar ləğv olunmuş qanunla verilib”.

Vəkil 18-ci ildir həbsdə yatan OMON-çuların həbsi ilə bağlı Avropa və Azərbaycan Ali Məhkəməsinə müraciət etdiklərini də xatırlatmışdı. Ümumiyyətlə isə illərdir dartışılan bu məsələnin həlli çox böyük bir humanist addım hesab oluna bilər. Çünki ömürlüklərin böyük əksəriyyəti cəmiyyət və dövlət üçün heç bir təhlükə kəsb etmirlər. Onlar müraciətlərində etdiklərindən səmimi peşman olmalarını dəfələrlə vurğulamaqla islah yoluna qədəm qoyduqlarını da bəyan edirlər.
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]