BolgeXeber.Com » Gündəm » Hacıbala Abutalıbov istintaqa cəlb oluna bilər

Hacıbala Abutalıbov istintaqa cəlb oluna bilər

6-04-2021, 10:07
Oxunub: 2 576 Bakı Şəhər İcra Hakimiyyəti (BŞİH ) başçısının müavini vəzifəsi səlahiyyətlərinin icrası həvalə edilən, BŞİH başçısının Aparat rəhbəri vəzifəsində işləyən Rasim Quliyevin həbsinin təfərrüatları məlum olub.

Musavat.com xəbər verir ki, rəsmi məlumata görə, Rasim Quliyev Nəsimi rayonu, Dilarə Əliyeva küçəsi 141 ünvanında yerləşən yaşayış binalarının, habelə yerli əhəmiyyətli mədəniyyət abidəsi kimi dövlət tərəfindən mühafizə olunan yaşayış evinin sökülməsi və yeni yaşayış binalarının tikintisinə dair “FF-2011" Mənzil Tikinti Kooperativinə qanunsuz icazə verib.

R.Quliyev həmin ərazidə ofis və yaşayış binalarının tikilməsinə dair 31 may 2018-ci il tarixli 346 nömrəli sərəncamı şəxsən imzalayıb.

Ona qarşı Cinayət Məcəlləsinin 308.2-ci (vəzifə səlahiyyətlərindən sui-istifadə) və 314-2.3-cü (qanunla müəyyən olunmuş qaydaları pozmaqla tikinti və ya quraşdırma işlərinin aparılmasına icazə vermə ağır nəticələrə səbəb olduqda) maddələri ilə ittiham elan edilib.

Rasim Quliyev “Səs” qəzetinin baş redaktoru Bəhruz Quliyevin qardaşıdır.

Bəhruz Quliyev qardaşına qarşı irəli sürülmüş ittihamlarla razılaşmır.

“Ürəyim, idealım, canım, qardaşım Rasim Quliyevin həbsinə görə şokdayam. İnanmazdım ki, bu qədər ləyaqətli, təmiz, gözütox, imanlı, vətənpərvər, dövlətçi, nümunəvi bir insan həbs olunar və həm də dövlətçilik naminə heç bir xidməti nəzərə alınmadan. Tanıyanlar bilir ki, biz 90-cı illərin Xalq hərəkatından gəlmişik, dövlətçilik uğrunda çox çətinliklər, türmələr görmüşük, amma nəfsimizə görə ittihamı qəbul etmirik. Heç kim şərdən sığortalanmayıb. Mən bu həbsin detalları və məzmunu ilə tanışam. Əminəm ki, tezliklə əsil cinayətkarlar ortaya çıxacaq, haqq-ədalət öz yerini tapacaq. Mən Allahın və dövlətimizin ədalətinə inanıram” - deyə Bəhruz Quliyev qardaşının həbsinə münasibət bildirərkən deyib.

Bəhruz Quliyev əlavə edib ki, qardaşı rüşvətxor və korrupsioner deyil: “Qardaşımı tanıyanlar və tanımayanların sosial şəbəkələrdə, saytlarda yazıb dəstəkləyirlər. Nə qədər zənglər olur mənə. Çoxsaylı dostların narahat olduğunun şahidi oldum, Rasimin bu illərdə nə qədər hörmət, nüfuz qazandığını bir daha anladım. Bizi tanıyanlar bilir ki, biz üç qardaş və bacılarım bir həyətdə və sadə Azərbaycan vətəndaşlarının orta yaşayış həddində yaşayırıq. Bu gün də hər şeyə görə Allahımıza şükür edirik. Mən qardaşımla fəxr edirəm”.

Rəsmi məlumatdan da görünür ki, Bəhruz Quliyevə qarşı irəli sürülən ittiham Hacıbala Abutalıbovun Bakı meri vəzifəsindən çıxarılmasından sonraya təsadüf edir. Eldar Əzizov yeni mer təyin olunana qədər qeyd edilən məlum sərəncamın verildiyi bildirilir.

R.Quliyev 1970-ci ildə Naxçıvan MR-in Şahbuz rayonunda doğulub. Azərbaycan Neft Akademiyasını bitirib.1992-ci ildən Yeni Azərbaycan Partiyasının üzvüdür. 1994-1996-cı illərdə AMEA Geologiya və Geofizika İnstitutunda mühəndis işləyib.

1996-2001-ci illərdə “Səs” qəzetində müxbir, siyasət şöbəsinin müdiri, baş redaktorun müavini, eyni zamanda Yeni Azərbaycan Partiyasının Mərkəzi Aparatında “Beynəlxalq əlaqələr və siyasi partiyalarla iş” şöbəsində təlimatçı işləyib və siyasi partiyaların Məşvərət Məclisində YAP-ı təmsil edib. 2000-ci ildə 29 saylı Səbayel seçki dairəsinin sədri olub.

2001-ci il fevralın 13-dən Bakı Şəhər İcra Hakimiyyəti “Ərazi idarəetmə orqanları ilə iş” şöbəsinin müdiri, 2010-cu il yanvarın 6-dan 2018-ci il sentyabrın 20-nə kimi BŞİH Aparatının rəhbəri vəzifəsində çalışıb. Həmin müddətdə ona dövlət qulluğunun müşaviri və dövlət qulluğunun baş müşaviri dərəcəsi verilib. BŞİH-in Aparat rəhbəri vəzifəsindən çıxarılandan sonra - 2018-2019-cu illərdə Bakı Şəhər İcra Hakimiyyətinin Xarici Əlaqələr Departamentinin sədri işləyib. R.Quliyev 2019-cu ilin aprel ayından YAP Mərkəzi Aparatında işə təyin olunub.

Rasim Quliyevin həbsində bir neçə maraqlı məqama diqqət etmək lazımdır. Ona qarşı irəli sürülən ittihamdan aydın olur ki, qeyd edilən tikintiyə icazə verilməsi Hacıbala Abutalıbovun işdən çıxarılmasından bir ay sonraya təsadüf edir (Hacıbala Abutalıbov 2018-ci ilin aprelində işdən çıxarılıb. Rasim Quliyevin isə 2018-ci ilin mayında qeyd edilən sərəncama imza atdığı göstərilir red.). Tikinti sektorundan az-çox anlayışı olan hər kəs bilir ki, yaşayış binalarının, ofislərin tikintisi üçün belə qısa bir müddətdə icazənin verilməsi mümkün deyil. Prosesin Hacıbala Abutalıbovun zamanından başlaması şübhəsizdir. R.Quliyevin cinayət işi üzrə davam edən istintaq müddətində Hacıbala Abutalıbovun ən azından şahid kimi dindirilməsi gözlənilir. O zaman Hacıbala Abutalıbovun baş verənləri necə izah etməsi əsas təfərrüatları üzə çıxaracaq. Əgər səhhəti imkan versə, xaricdən gələ bilsə...