BolgeXeber.Com » Ölkə » “Təzə Bazar” MMC-nin sahibi nazir Ramil Usubova müraciət etdi – Keçmiş başçıdan nazirə şikayət

“Təzə Bazar” MMC-nin sahibi nazir Ramil Usubova müraciət etdi – Keçmiş başçıdan nazirə şikayət

7-04-2015, 13:55

Oxunub: 6 569 “Təzə Bazar” MMC-nin sahibi nazir Ramil Usubova müraciət etdi – Keçmiş başçıdan nazirə şikayət

İndiyədək V.Şıxəliyev tərəfindən mənə və kollektivimə qarşı edilən çoxsaylı qanunsuz hərəkətlərin mahiyyətində süni qarşıdurma, dava və münaqişə yaradılmasının dayandığını açıq şəkildə görmüşəm

Xəbər verildiyi kimi, aprelin 5-də, saat 16:30 radələrində “Bakı Mərkəzi Bazar” MMC-nin sahibi Vaqif Şıxəliyevin tapşırığı ilə bir qrup şəxs həmin ərazidə fəaliyyət göstərən və sonuncuya şərik olan- “Təzə Bazar” MMC-nin sahibi Məmmədağa İbrahimova məxsus əraziyə hücum çəkərək bazarın işlək ərazisində qərəzli şəkildə, qanunsuz qazıntı apararaq iş fəaliyyətini pozmuş, sahibkarlarla qazıntı aparanlar arasında ciddi qarşıdurma yaranmışdır. Bu barədə qəzetin rəsmi internet səhifəsində məlumat verilmişdir.
Dünən “Təzə Bazar” MMC-nin sahibi Məmmədağa İbrahimov tərəfindən redaksiyamıza daxili işlər naziri cənab Ramil Usubova, surəti “Təzadlar” qəzeti redaksiyasına ünvanlı müraciət daxil olmuşdur. Aşağıda heç bir şərh vermədən həmin müraciəti təqdim edirik:
Azərbaycan Respublikasının daxili işlər naziri, general-polkovnik cənab Ramil Usubova!
Çox hörmətli cənab nazir!
Sizin dövlətçiliyimizin müdafiəsi və ölkəmizdə qanunçuluğun daha da möhkəmləndirilməsi yolunda bütün fədakar fəaliyyətinizi həmişə diqqətlə izləmişəm, Azərbaycan polisinin yüksək nüfuzunun Sizin şəxsinizdə daha da yüksəlməsini ən yüksək dəyərlə qiymətləndirmişəm. Bilirəm ki, Siz haqqın nahaqqa qurban verilməsi ilə heç vaxt barışmamısınız, ədalətin bərqərar olması üçün əlinizdən gələni etmisiniz. Bu isə Sizə olan ictimai inam və etibarı həmişə yüksəkdə saxlamış, hamı Sizi daxili işlər naziri olaraq özünə güvənc yeri bilir.
Bu müraciətimin də mahiyyətində həmin inam və etibar, güvənc hissi dayanır. Çünki mənim də gözləmədiyim ünvandan, təsis etdiyim “Təzə Bazar” MMC-yə şərikim etdiyim Vaqif Şıxəliyevin tərəfindən sonralar başıma müsibətlər gətiriləndə və mən yaxın qohumluq əlaqəsinə görə səbrlə susanda Sizi düşünmüşəm. Bilirsiniz ki, Vaqif Şıxəliyev H.Əliyevin 14 avqust 1995-ci il tarixli fərmanı ilə işdə yol verdiyi ciddi nöqsanlara görə Sabirabad rayon İcra hakimiyyətinin başçısı vəzifəsindən azad edilmişdir. Dəqiq bilirəm ki, Ulu Öndərin kursunu dəstəkləyən, dövlətçiliyimizə sadiq olan bir nazir kimi Siz heç vaxt V.Şıxəliyev kimi bir şəxsi dəstəkləyə bilməzsiniz.
Hörmətli Ramil müəllim!
Bu müraciətimdə məqsədim bir məsələyə aydınlıq gətirilməsinə çalışmaqdır. Məsələ ondadır ki, Vaqif Şıxəliyev indiyədək başımıza gətirdiyi, bazarda törətdiyi bütün qanunsuz hərəkətlərini məhz Sizin adınızla bağlayıb. Təbii ki, buna heç vaxt inanmamışam… Təfsilatına getmək istəmirəm, amma bir neçə məsələni qeyd etməklə diqqətinizi Sizin adınızdan sui-istifadəyə necə rəvac verilməsinə yönəltmək istərdim. Çünki indiyədək mən onun qanunsuz hərəkətlərinə cavab olaraq məhz səbrimi basıb təmkinlə hərəkət etmişəm. Məsələn, V.Şıxəliyev 2012-ci ildə 40 nəfər qoluzorlu ilə bazara basqın edərək mənə məxsus ərazidə sahibkarlıq fəaliyyəti ilə məşğul olan 12 nəfərə bədən xəsarəti yetirdirəndə, onlardan biri daha ağır xəsarət aldığı üçün xəstəxanada uzun müddət müalicə olundu. Lakin polisdə aparılan təhqiqat işi sonda bütün cəhdlərimizə baxmayaraq ört-basdır edildi. Nəticə bu oldu ki, qarşı tərəf növbəti özbaşınalığına daha da ruhlandı.
V.Şıxəliyev 2013-cü ildə daha bir özbaşınalıq edərək bazarda çalışanlar arasında süni münaqişə yaratdı, özünün işçiləri olan 74 nəfəri üzümə durquzdurdu ki, guya mən onlardan yığılan dövlət rüsumunu büdcəyə mədaxil etməmişəm. Hətta mənim işçilərimə təzyiq və hücum edərək yenə də süni qarşıdurma yaratmağa cəhdlər edildi. Amma sonradan məlum oldu ki, bu şər və böhtan imiş. Mən yenə də səbrimi basdım, təmkinli yol tutdum. Amma polis əməkdaşları bu dəfə də V.Şıxəliyevin tərəfində oldu.
Bu ilin aprelin əvvəlində isə V.Şıxəliyevin uzun müddətdir üzərində çalışdığı daha bir qarşıdurma niyyəti ortaya çıxdı. Onun adından gələn bir qrup adam mənə məxsus, Abşeron rayonunun Novxanı kəndindəki bağ evimə gecə saatlarında hücum edildi, bağımda ailəsi ilə birgə yaşayan R.Ağayevə qarşı zor tətbiq olundu. Dərhal DİN-nin 102 xidmətinə məlumat verildi, hadisə yerinə polislər gəldi, sonra Abşeron RPŞ-də araşdırmalara başladılar. Lakin bu günə kimi heç bir nəticə yoxdur. Amma səbrlə gözləyirəm.
Nəhayət, iki gün əvvəl-aprelin 5-də, V.Şıxəliyevin 30-a yaxın işçisi öyrədilmiş şəkildə mənə məxsus bazara hücum edərək guya neçə il əvvəl yerə basdırılmış yüksək gərginlikli elektrik xətti üçün nəzərdə tutulmuş istifadəsiz kabeli qazıb çıxarmalıdırlar. Bakı Elektrik Şəbəkənin funksiyasına aid olan bu məsələ ilə bağlı atılan qanunsuz addım təbii ki, bazarda sahibkarların iş fəaliyyətini iflic etməyə, yenə də süni qarşıdurma yaratmağa xidmət edirdi. Əllərində heç bir texniki şərt və razılıq sənədi olmayan 30 nəfərin əhalinin gur vaxtında bazarın mərkəzini qazaraq kabel “ovuna” çıxması, təbii ki, yenə də şəxsi mülkiyyətim olan ticarət mərkəzində edilən ən böyük qanunsuz hərəkət idi. Məlum oldu ki, onlar V.Şıxəliyevin tapşırığını yerinə yetirirlər, çox aqressiv davranırlar. Yenə də DİN-nin 102 xidmətinə müraciət etdik. Post-patrul xidmətinin əməkdaşları gəldilər, lakin beş dəqiqə sonra heç bir tədbir görmədən ərazini tərk etdilər, bizim əməkdaşları bu azğınlaşmış dəstə ilə üz-üzə qoydular.
Cənab nazir! Amma bu dəfə səbrimi basa bilmədim və Sizə müraciət etməli oldum. İndiyədək V.Şıxəliyev tərəfindən mənə və kollektivimə qarşı edilən çoxsaylı qanunsuz hərəkətlərin mahiyyətində süni qarşıdurma, dava və münaqişə yaradılmasının dayandığını açıq şəkildə görmüşəm. Güman yerimiz-qanunlarımızı və hüquqlarımızı qorumağı etibar etdiyimiz pols əməkdaşları tərəfindən bizə qarşı laqeydliyi, V.Şıxəliyevə qarşı isə istədiyini etməsi üçün şərait yaradılmasını görəndən sonra dərindən araşdırma apardım. İctimailəşmiş bu müraciətimdə dilə gətirə bilmədiyim bir fakt qarşısında susmalı oldum: Vaqif Şıxəliyev indiyədək bütün etdiklərini Sizin adınızdan istifadə edərək törətmişdir!
Çox hörmətli Ramil müəllim!
Əvvəl dedim, indiyədək baş vermiş çox şeyə görə səbrimi basmış, dözmüşəm. Lakin artıq görəndəki bu məqamda susmağım nəinki qızıl deyil, hətta mənim daha çətin problemlərlə üz-üzə qalmağım deməkdir, onda susmaqdan imtina etməli oldum. Elə bu niyyətlə də Sizə indiyədək məni qəbul etməyiniz üçün 2 dəfə teleqram vurmuşam, lakin cavab olmadığı üçün bu dəfə mətbuat vasitəsilə Sizə müraciət ünvanlamaqdan başqa yol görmədim. İnanıram ki, arzuladığım görüş baş tutacaq və ictimailəşən bu müraciətimdə deyə bilmədiklərimi diqqətinizə çatdırmaq imkanı qazanacağam.
Dərin hörmətlə:
Məmmədağa İbrahimov,
“Təzə Bazar” MMC-nin sahibi
Bakı şəhəri, 06 aprel 2015-ci il

Çox Oxunanlar