BolgeXeber.Com » Ölkə » Bankın rəhbəri işçisinin pulunu verməkdən imtina edir

Bankın rəhbəri işçisinin pulunu verməkdən imtina edir

20-04-2015, 09:09
Oxunub: 3 939 Bankın rəhbəri işçisinin pulunu verməkdən imtina edir"Yeddi aydır işsizəm. Özümün başqa banklara borcum var. Dost-tanış pul yığıb, kreditlərimi ödəyirlər"

Orxan Tağıyev adlı Ağstafa sakini musavat.com saytına müraciət edərək şikayətinin olduğunu bildirib.

O.Tağıyevin sözlərinə görə, işlədiyi bankın rəhbəri onunla ədavətə girib və ona qarşı haqsızlıq edir: "Mən "Dəmirbank"ın Qazax filialında işləyirdim. Keçmiş müdirimlə heç bir problemim olmayıb. Sonradan isə rəhbərlik dəyişdi və Fuad Qurbanlı bizim yeni müdirimiz oldu. Bundan sonra aramızda problemlər yaşanmağa başladı.

Şikayətçi deyir ki, hər şey iş yoldaşının maaşını almaq istərkən başlayıb: "İş yoldaşım xəstə idi və bülleten götürmüşdü. Məndən xahiş etdi ki, onun kartındakı pulu çıxarım və ona verim. Mən də razılaşdım. Sonra isə kartı itirdim. Yeni kart sifariş verdim, amma pulu çıxara bilmədim. Dedilər ki, kartın sahibinin, yəni iş yoldaşımın qardaşının banka borcu var. Ona görə də bu karta blok qoyulub. Hesabdakı pul çıxarılcaq ki, qardaşının kredit borcu ödənilsin. Bu isə qanunsuzdur. Bunu edən isə Fuad Qurbanlı idi.

Fuad Qurbanlı ilə görüşdüm və bunun səbəbini soruşdum. Dedi ki, kartı masandan mən götürmüşdüm, onun qardaşının borcu var. Mən də dedim ki, kartı ver, aparıb özünə verim, arada mən qalmayım. Qaytarmadı. Həmin iş yoldaşım özü borc pul tapdı, ödədi və kartını götürdü. Bu məsələ hər şeyin başlanğıcı oldu".

O.Tağıyev bildirir ki, F.Qurbanlı onu qanunsuz olaraq polisə verib: "Gördüm ki, belə getməz. İşdən ayrılmaq qərarına gəldim. Amma məni buraxmadı. Əvvəlcə xoş sözlərlə, sonra hədələrlə məni işdə saxlamaq istədi. Mən isə çıxmaq istəyirdim. Ötən ilin noyabr ayında məndən Ağstafa polisinə şikayət edib ki, guya 30 nəfərin ödənişini götürüb xərcləmişəm. Xahiş edib, həmin pulların ona qaytarılmasına polis köməklik göstərsin. Belə bir şey isə olmayıb. Olsa belə, bunu polis həll etməli deyil.

Mən dekabr ayından bu günə kimi get-gəldəyəm. Saxta şikayət əsasında girinc olmuşam. Çünki adlarını verdiyi həmin adamların heç biri belə bir şikayət etməyib. Bir nəfər də demir ki, Orxan məni aldadıb, pulumu "yeyib". Çünki elə şey olmayıb".

O.Tağıyev iddia edir ki, F.Qurbanlının Qazax yox, Ağstafa polisinə müraciət etməsinin də səbəbləri var: "Bundan əlavə bizim bank Qazax rayonundadır, şikayət isə Ağstafaya edilib. Hansı ki, Qazax polisi bizim bankın demək olar ki, düz yanındadır. Onun Ağstafa polisinə şikayət etməsinin səbəbi budur ki, oranın icra başçısı bununla tanışdır. Bütün səbəb də budur".

Şikayətçi deyir ki, məsələnin bu yerə çatmasına səbəb puldur: "Mən kredit şöbəsində çalışıram. Təbii ki, gecikmələr var. Onların da işi məhkəmədədir. Bunun mənə aidiyyəti yoxdur. Bu şəxs istəyir ki, gecikmələr olmasın və o, bonus alsın. Amma burada mən də itirirəm. Mən də bonus almıram. O, istəyir ki, gecikmələri mən ödəyim. Niyə?"

O.Tağıyev bildirdi ki, ona ödənilməli olan məzuniyyət pulu hələ də verilməyib: "Mənim məzuniyyət pulumu da vermir. Mənə 900 manat ödənilməlidir. Amma ala bilmirəm. Bir dəfə dedi ki, 900 manatla mənim bankdan kredit götürən qohumumun borcları silinsin. Mən də təbii ki, razılaşmadım. Həmin adam öz kreditini vaxtlı-vaxtında ödəyir. Üstəlik, ondan mənə nə? Belə şey harada görünüb?"

Şikayətçi məhkəməyə müraciət edəcəyini deyir: "Mənə iftira atdığına görə onu məhkəməyə verəcəyəm. Sadəcə polisin araşdırmasının bitməsini gözləyirəm. İndən sonra heç kim məni işə də götürməyəcək. Çünki haqqımda ağılasığmaz şayiələr yayıblar. Gah deyir ki, Orxan pulu ödəməmək üçün Ukraynaya qaçıb, gah da başqa yalanlar... Mənim heç kimə borcum yoxdur. Heç bir yerə də gedəsi deyiləm".

O.Tağıyev 7 aydır ki, işsiz olduğunu deyir: "Yeddi aydır işsizəm. Özümün başqa banklara borcum var. Dost-tanış pul yığıb, kreditlərimi ödəyirlər. Tələbim budur ki, mənim 900 manatımı versinlər və əmək kitabçama uydurma yox, işdən uzaqlaşmağımın əsl səbəbini yazsınlar".
BOLGEXEBER.COM