Bizimlə əlaqə | Reklam
BolgeXeber.Com » Müsahibə-Reportaj » Prezident “Hilton-Bakı”nın lentini kəsdi

Prezident “Hilton-Bakı”nın lentini kəsdi

3-10-2011, 16:05
Oxunub: 7 693 Bakının mərkəzində yerləşən “Hilton Bakı” otel kompleksinin açılışı olub

Bu gün Bakının mərkəzində yerləşən “Hilton Bakı” otel kompleksinin açılışı olub. Bolgexeber.com xəbər verir ki, Prezident İlham Əliyev və xanımı Mehriban Əliyeva açılış mərasimində iştirak edib. Azərbaycanın birinci xanımı Mehriban Əliyevaya gül dəstəsi təqdim olundu. Prezident İlham Əliyev otelin rəmzi açılışını bildirən lenti kəsdi.

Məlumat verildi ki, “Hilton Bakı” otel kompleksi 2007-ci ildə “İSR Kapital Menecment” MMC və “Hilton Worldwide” şirkətləri arasında imzalanan müqavilə əsasında inşa olunmuşdur. Türkiyənin “Koray İnşaat” şirkəti tərəfindən 2010-cu ilin əvvəlindən inşasına başlanan 25 mərtəbədən ibarət oteldə ümumilikdə 309 otaq vardır. Otaqların 231-i standart, digərləri isə xidmət çeşidlərinə görə fərqlənən otaqlardır. Ən yüksək standartlara cavab verən otaqlardan həm şəhərimizə, həm də Xəzər dənizinə gözəl mənzərə açılır. Oteldə Finlandiya istehsalı olan beş müasir lift quraşdırılıb.

Dövlət başçısı burada “Şəkər-Lanç” və 200 nəfərlik “Silantro” restoranları ilə tanış oldu. Qeyd edildi ki, restoranlarda müştərilərə yerli və dünyanın tanınmış mətbəxlərinin ləziz yeməkləri təqdim olunacaq.

Otelin 25-ci mərtəbəsindəki şəraitlə tanış olan Prezident İlham Əliyevə məlumat verildi ki, Azərbaycanda ilk dəfə məhz burada bir saat ərzində 360 dərəcə fırlanan dairəvi istirahət yeri yaradılmışdır. Burada qonaqlara müxtəlif iaşə xidmətləri göstəriləcək. İlin isti aylarında qonaqların açıq havada istirahətləri üçün lazımi şərait yaradılmış kompleksin ən yuxarı mərtəbəsindən Bakının mənzərəsini seyr etmək mümkündür.

Dövlət başçısı otelin 24-cü mərtəbəsindəki “Sky Grill” restoranı ilə tanış oldu. Bildirildi ki, qonaqlara geniş çeşiddə iaşə xidməti göstəriləcək. Otel kompleksindəki SPA və Fitnes Mərkəzində örtülü hovuz, masaj hovuzu, türk hamamı, 8 müalicə otağı, VİP SPA otağı yaradılmışdır. İdman mərkəzindəki bütün avadanlıqlar ABŞ-dan gətirilib.

Kompleksin 21-ci mərtəbəsindəki Prezident nömrəsi ilə tanışlıq zamanı məlumat verildi ki, burada dünya otel biznesində mövcud olan ən yüksək xidmət göstəriləcək.

Məlumat verildi ki, ikinci və üçüncü mərtəbələrdə müxtəlif səviyyəli tədbir və görüşlərin keçirilməsi üçün ən son informasiya-kommunikasiya texnologiyaları ilə təchiz edilmiş 18 zal fəaliyyət göstərir. İkinci mərtəbədəki 750 nəfərlik böyük konfrans zalında beynəlxalq və respublika əhəmiyyətli tədbirlərin keçirilməsi üçün lazımi şərait yaradılmışdır. Rəsmi görüş və qəbulların yüksək səviyyədə təşkili üçün ayrıca otaq da vardır.

Prezident İlham Əliyev otelin kollektivi ilə görüşdü, onları təbrik etdi.

“ISR Holdinq” şirkətlər qrupunun prezidenti İsgəndər Xəlilov və “Hilton Worldwide” şirkətinin vitse-prezidenti Maykl Kollini dövlətimizin başçısına və Azərbaycanın birinci xanımına minnətdarlıqlarını bildirdilər.

Sonda xatirə şəkli çəkdirildi. Prezident İlham Əliyev görülən işləri yüksək qiymətləndirdi, kollektivə uğurlar arzuladı.

AzərTac
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]