BolgeXeber.Com » Müsahibə-Reportaj » "Azərbaycan millisində hər kəs rusca danışır" - Rüfət Dadaşov

"Azərbaycan millisində hər kəs rusca danışır" - Rüfət Dadaşov

17-10-2018, 16:36

Oxunub: 4 442

Millətlər Liqasında Farer adaları (3:0) və Malta (1:1) ilə qarşılaşmada yığma komandamızın formasını geyinən Rüfət Dadaşov klubu "Proyssen”in düşərgəsinə qayıdıb

Matç.az saytı xəbər verir ki, 27 yaşlı hücumçu Almaniyaya dönər-dönməz yerli mətbuata müsahibə verib.

O, həm milliyə dönüşü, həm də geridə qalan iki matçla bağlı danışıb.

- Uzun səfərlərdən sonra yorğunluğunuz varmı?

- Xeyr, hər şey qaydasındadı.

- Yığmada son oyununuz oktyabrın 14-də oldu. Almaniyaya yalnız indi qayıtmağınız təəccüblü deyil?

- Bakıdan Frankfurta, ordan isə Münsterə gəldim. Ardından da diş həkiminə getməli idim.

- Dərhal məşqlərə qoşuldunuz. Daha bir gün dincəlmək istəməzdiniz?

- Xeyr. Hücumçulara bugünkü məşqdə çox iş düşmədi. Mənim üçün kollektivə tez qoşulmaq yaxşıdı.

- Azərbaycan yığmasının heyətində beynəlxalq arenada iki yaxşı oyun keçirdiniz...

- Orda olduğum müddətdə futbolçulardan, məşqçilərdən yalnız müsbət fikirlər eşitdim. Mən də olduqca məmnunam. Əlbəttə ki, Malta ilə heç-heçə etdiyimiz (1:1) üçün məyus oldum. Çox qol vəziyyəti yaratdığın matçda qələbə qazanmaq məcburiyyətindəsən.

- Sizin qol vəziyyətləriniz çox oldu?

- Şəxsən mənim də imkanlarım oldu. Bir epizodda özümə əsəbləşdim. Çünki iki metrlik məsafədən topu qapıdan keçirə bilmədim. Bu məni çox narahat etdi.

- Milliyə qayıtmaq necə hissdi? Anlaşma baxımından problem yaşamadınız?

- Əlbəttə, gözəl hissdi. Rusca danışıram, orda hamı bu dildə danışır. Hətta baş məşqçimiz də, demək olar ki, həmişə rusca danışır. Alman dilində danışan tərcüməçilər var. Bunlar daha çox Dmitri Nazarova görədi.

- Nazarov 2012-2013-cü illərdə "Proyssen”də çıxış edib. Onunla söhbət etdinizmi?

- Əlbəttə, qısa söhbətimiz oldu. Burda çox şeyin dəyişdiyini dedi.

- Hər iki matçda 90 dəqiqə çıxış etdiniz. Bu, əvvəlcədən razılaşdırılmışdı?

- Xeyr, belə bir şey olmamışdı. Yəqin ki, məşqlərdəki hazırlığıma görə, oyunları başdan sona qədər keçirdim. Mən belə düşünürəm. Fikrimcə, pis təsir bağışlamadım. Əlbəttə ki, yenidən yığmaya çağırılacağıma ümid edirəm.

- Növbəti matçlar üçün dəvət nə vaxt olacaq?

- Yəqin ki, növbəti oyunlardan 2 həftə əvvəl.

- Himn səslənərkən oxudunuzmu?

- Xeyr.

- Farer adaları ilə oyun zamanı deyəsən hava soyuq idi...

- Çox soyuq idi, bu, dəlilikdi. Süni örtükdə çıxış etdik. Stadionun ətrafında tikinti sahəsi var idi. Hava isə yağışlı və küləkli idi. Ora fərqli bir dünya idi.

- Amma Bakı isti olardı...

- Bəli. Almaniyadakı kimi, Bakıda hava mülayim idi.

- Oyundan əvvəl, xüsusən də, Azərbaycan mətbuatı sizdən müsahibə almaq istəsə də, hamısını rədd etdiniz. Niyə?

- Oyunöncəsi çox danışmaqdan xoşlanmıram. Bütün diqqətimi matça yönəltməyə çalışdım. Dəvətdən məmnun qaldım və oyunumla mənə olan etimadı doğrultmaq istədim.

- Azərbaycan yığmasının heyətində qol vura bilmədiniz. İndi "Proyssen”in baş məşqçisi "Vyurtsburqer”lə matçda sizdən qol gözləyir. Stress varmı?

- Doğruru. Mən də özümdən bunu gözləyirəm.

- Bəs qol vurmasanız?

- Əgər qələbə qazansaq, hər şey qaydasında olacaq.

Çox Oxunanlar