BolgeXeber.Com » Xəbərlər » Balakən gömrüyündə hər bəhanə ilə pul yığırlar... - ŞİKAYƏT VAR

Balakən gömrüyündə hər bəhanə ilə pul yığırlar... - ŞİKAYƏT VAR

3-08-2015, 15:26
Oxunub: 3 114 Balakən gömrüyündə hər bəhanə ilə pul yığırlar... - ŞİKAYƏT VARDaimi oxucularımız bilir ki, bizlər haqq tərəfdarı olaraq, redaksiyamıza hansısa qurum barədə ünvanlanmış şikayət və məlumatları hər dəfə işıqlandırmağa və gündəmə gətirməyə çalışırıq ki, ən azından şikayətçilərə problemlərinin həllində yardımçı olaq. Həmçinin hansısa qurumda edilən qanunsuzluqlara son qoyulsun. Elə bu gün redaksiyamıza şikayət məktubu ünvanlanıb ki, həmin şikayəti də dərc etməyi özümüzə borc bildik.

İlk olaraq qeyd edim ki, redaksiyamıza daxil olan şikayət Elşad Həmidov tərəfindən ünvanlanıb. Şikayətçi məktubunda qeyd edir ki, 18 İyul 2015-ci il tarixində biz üç yaxın dost yəni mən Həmidov Elşad Cavanşir oğlu, Həmzəyev Səbuhi və Hacıyev Oqtay Kamil oğlu Gürcüstanın Lagodexi sərhəd keçid məntəqəsindən Azərbaycana Balakən sərhəd keçid məntəqəsinə minik avtomobili ilə daxil olduq. Gürcüstan keçid məntəqəsində təxminən 2 dəqiqə ərzində yoxlanılmaqla Respublikamızın sərhəd keçidinə daxil olduq. Bu müddətdən sonra bizləri şoka salan hadisələr yaşadıq. Belə ki, Respublikamızın Balakən rayon sərhəd keçid məntəqəsində minik avtomobilimiz 5 saat qeyri-qanunsuz olaraq saxlanıldı. Avtomaşının sərhəd keçid məntəqəsindən buraxılmamasının səbəbi bizim Gürcüstan Respublikasından 380 lari (yəni 180 azn) və 200 lari (100 azn) dəyərində aldığımız velosipedlər olmuşdur. Əlbəttə ki, sürücünün minik avtomobilinin saxlanılması qeyri-qanuni bir əməldir. Biz bunun şahidi olduq və bütün baş verən özbaşınalıq halını tam detallı şəkildə videogörüntüyə aldıq. Videogörüntüdə Sərhəd Keçid məntəqəsinin dirnaqarası (növbə rəisi) "Mayoru" Sədi Sədilinin qeyri qanuni əməlləri danışıqları qeyd olunmuşdur. Yuxarıda adını qeyd etdiyim dövlət məmuru bizdən 115 azn tələb etdi və əlbəttəki bunun qeyri-qanunsuz olduğunu nəzərə alaraq öz etirazımızı bildirdik. Cavabında Dövlət məmuru: "burda belədir, 115 azn ödəyin özünüzə problem yaratmayın sakitcə keçin cavabını verdi". Biz bir anlıq özümüzü cinayətkar hesab etdik, halbuki, bu dırnaqarası Dövlət məmuru Azərbaycan Respublikası Nazirlər Kabinetinin ¹ 305 Qərarından bixəbərdir. Qanuna əsasən, 2. Fiziki şəxslər tərəfindən gömrük sərhədindən istehsal, yaxud kommersiya məqsədləri üçün nəzərdə tutulmayan mallar keçirilərkən, gömrük ödənişlərinin alınmasının sadələşdirilmiş qaydası - 2.1. Fiziki şəxslər tərəfindən təyinatı istehsal, yaxud kommersiya məqsədləri üçün nəzərdə tutulmayan hesab edilmiş aşağıda göstərilən mallar (aksizli mallar və avtonəqliyyat vasitələri istisna olmaqla) güzəştli qaydada (gömrük ödənişlərini ödəmədən) gömrük sərhədindən keçirilə bilər. 2.1.1. səfər zamanı fiziki şəxsin zəruri ehtiyaclarının ödənilməsi üçün nəzərdə tutulan şəxsi əşyalar. 2.1.2. bu Qaydaların 2.1.1-ci yarımbəndində göstərilən mallar istisna olmaqla, Azərbaycan Respublikasının gömrük ərazisinə (bundan sonra gömrük ərazisi) gətirilən ümumi gömrük dəyəri 1500 ABŞ dolları ekvivalenti məbləğindən (müşayiət edilən hər bir yetkinlik yaşına çatmamış fiziki şəxsə görə əlavə 500 ABŞ dolları ekvivalenti məbləğindən) artıq olmayan mallar. Şikayətçi qeyd edir ki, Balakən sərhəd keçid məntəqəsində olduğumuz zaman bir çox qanunsuzluqların şahidi olduq. Buna misal olaraq məndən 115 azn, mütəmadi olaraq bizə yaxınlaşan sərhəd keçid məntəqəsinin işçiləri, monopolistlərin bizi həmin məbləği verməyə razı salmaq, saatlarla insanların keçid məntəqəsində incidilməsi (yəni əsasız olaraq gözlədilməsi), bizə məmurların hədə-qorxu gəlməsi (burda elə oğlanlar deyib vermirik lakin sonda razılaşıb), saatlarla sürücülərin qapıda gözlədilməsi (halbuki, keçid məntəqəsində məmurların oturub siqaret çəkdiyinin şahidi olmuşuq), soruşduqda bizə cavab olaraq lazım gəldikdə çağıracağıq. Bizi o dərəcəyə gətirib çatdırdılar ki, biz aldığımız velosipedlərin burada saxlanma məntəqəsinə verilməsini istədik lakin bizə saxlanma məntəqəsi bağlıdır, səhərə qədər gözləməlisiniz cavabını verdilər. Bundan başqa bizdən istənilən məbləği verməmək üçün Gürcüstana geri dönüb digər keçid məntəqəsindən daxil olmağı istədik lakin, buna belə icazə verilmədi. Cibimizdən halal pulla aldığımız, əziyyət çəkib gətirdiyimiz əşyaları hansısa savadsız dövlət məmuruna görə sərhəd keçid məntəqəsindən keçirə bilmirik, sizcə bu acınacaqlı hal deyilmi? Kim bunlara bu səlahiyyəti verir? Nə üçün qanunlarımıza riayət olunmur? Bu şəxslər kimlərə güvənir? Başqa keçid məntəqələrini deyə bilmərəm, lakin Balakən sərhəd keçid məntəqəsində hadisələr çox acınacaqlıdır.

Məmurların insanlarla rəftarı tam etik qaydalara ziddir. Keçid məntəqəsində məmurlar insanların rahat gediş-gəlişini təmin etmək əvəzinə vətəndaşlara əziyyət verir, səbəbsiz gözlətdirir, qeyri-qanuni nəsə tələb edir, dayanacağa daxil olan hər bir avtomobilə elə hücüm çəkir ki, elə bil cinayətkar tutublar. Bizim avtomobilin sürücüsü Hacıyev Oqtay Kamil oğlu bu hadisənin şahidi olub, məmurlara "ay kişi dayanın nə edirsiz, nə baş verir? mən terrorist deyiləm, gəzməkdən gəlirəm" ifadəsini işlədib. Beş saat uzun gözləntidən sonra bizdən istənilən məbləğin verməyəcəyimizi başa düşərək bizə GMO (Gömrük mədaxil orderi) hazırladılar. Bu GMO tam əsassız, qeyri-qanuni, velosipedlərin qiyməti 220 azn qeyd edilmiş (əlimizdə malın satınalma qəbzləri oluğu halda), şişirdilmiş qiymətlər əks etdirən qanunsuz sənəd hazırlamışlar. Mən ödəyəcəyim məbləğin artıq hər hansı bir məmurun cibinə deyil, dövlət büdcəsinə keçəcəyini bildiyim üçün 90,48 azn məbləğin ödənilməsinə razılıq verdim. Razılıq verməmin səbəbi də, şənbə günü heç bir dövlət qurumlarının ( Gömrük Komitəsinin qaynar xətti, Korrupsiyaya dair mübarizə idarəsi, Prezident Aparatı, və digər güc strukturlarının) işləmədiyi üçün olmuşdur. Şikayətçi Elşad Həmidov yuxarıda qeyd olunan qanunsuzluqları nəzərə alaraq şikayətinə baxılmasını istəyir. O qeyd edir ki, haqlı olduğum sübuta yetirilərsə ödədiyim əlavə 90.48 azn məbləğin mənə geri verilməsində mənə köməklik edəsiniz. Həmçinin bilməyinizi istərdim ki, mən və dostlarım bütün güc strukturlarına bu özbaşınalıqla bağlı rəsmi məktub yazacağıq. İnanırıq ki, haqq və ədalət öz yerini tapacaq.