BolgeXeber.Com » Xəbərlər » Mingəçevirdə məcburi köçkünlər yolu bağladılar

Mingəçevirdə məcburi köçkünlər yolu bağladılar

15-09-2015, 17:45
Oxunub: 2 724 Mingəçevirdə məcburi köçkünlər yolu bağladılarSentyabrın 14-də Mingəçevirdə bir qrup məcburi köçkün yolu bağlayaraq etiraz aksiyası keçirməyə cəhd ediblər

Musavat.com-un əldə etdiyi məlumata görə, buna səbəb məcburi köçkünlər üçün tikilən mənzillərdə onlara ev verilməməsidir. Tikilən yeni binalardan mənzil ala bilməyən məcburi köçkünlər buna etiraz olaraq yolu bağlayıblar. Polisin müdaxiləsindən sonra etirazçılar ərazidən uzaqlaşdırılıb.

Məlum olub ki, etiraz edən məcburi köçkünlər Mingəçevir şəhərində qeydiyyatda olmayanlardır. Hazırda ev verilən köçkünlər isə Mingəçevirdəki yataqxanalarda qeydiyyatda olanlardır. Etirazçılar isə sonradan başqa rayonlardan gələrək Mingəçevirdə yerləşən yataqxanalarda məskunlaşıblar. Buna görə də onlara yeni mənzillər verilməyib.

Son iki gündür məcburi köçkünlərin yeni mənzillərə köçürülməsi həyata keçirilir.

Qeyd edək ki, Mingəçevirdə 2011-ci ilin sonundan başlayaraq məcburi köçkünlər üçün yaşayış komkompleksi inşa edilirdi. Şəhərcikdə 10 ədəd 9 mərtəbəli bina ilə yanaşı, 480 yerlik məktəb, 50 çarpayılıq uşaq baxçası, klub ictimai mərkəz və inzibati bina tikilib. Ümumilikdə 502 məcburi köçkün ailəsinin yerləşdirilməsi nəzərdə tutulan mənzillərdən 36-sı bir, 259-u iki, 180-i üç, 27-si isə dörd otaqlıdır.

Bolgexeber.com