Bizimlə əlaqə | Reklam
BolgeXeber.Com » Xəbərlər » Meyxana televiziyalardan niyə yığışdırıldı?

Meyxana televiziyalardan niyə yığışdırıldı?

5-02-2016, 16:17
Oxunub: 5 302 Meyxana televiziyalardan niyə yığışdırıldı?Bir müddət bir-birinin ardınca müxtəlif televiziya kanallarında meyxana yarışları keçirilirdi

Bunlar ANS-də “De gəlsin”, ATV-də “Sözüm var”, Space TV-də “Sözümüz-sözdür” verilişləri idi. Kifayət qədər reytinq qazanıb, ictimaiyyətin marağına səbəb olan, aylarla efirlərdən düşməyən bu verilişlərdə bəzən söyüş tipli, bayağı, vulqar ifadələr səsləndiyindən tez-tez tənqid obyektinə də çevrilirdi. Tanınmış meyxanaçılar belə bu verilişlərdə meyxananın səviyyəsiz şəkildə təqdim edilməsindən şikayətlənir, buna qarşı senzura qoyulmasını, hətta efirlərdən yğışdırılmasını tələb edirdilər.
Son dövrlər isə həmin meyxana verilişləri efirlərdə gözə dəymir. Səbəb nədir?
Məsələ ilə əlaqədar televiziya kanalları ilə əlaqə saxladıq. Space TV-nin icraçı direktoru Kamil Şahverdi səbəbi bu cür açıqladı:
“Sonuncu verilişlərə elə də böyük maraq olmadı, reytinq əldə edə bilmədik, ona görə davam etdirmədik”.
Kamil Şahverdi onu da vurğuladı ki, yaxın gələcəkdə də Space TV-də meyxana tipli verilişin olacağı gözlənilmir.
ATV televiziyasının mətbuat xidmətinin rəhbəri Vaqif Aydınoğlu isə qeyd etdi ki, “Sözüm var” meyxana yarışı verilişinin dayandırılması səslənən tənqidlərlə bağlı deyil:
“Məlum olduğu kimi, televiziyada proqram siyasəti bir-iki günün içində yaranan iş deyil. Adətən mövsüm ilə əlaqədar televiziyanın rəhbərliyi tərəfindən mövsümlük proqram tərtib olunur. Hansısa layihə efirə çıxanda bu o demək deyil ki, o davamlı olmalı, bir neçə ili əhatə etməlidir...
Amma zaman-zaman meyxanaçılar televiziyanın hansısa şou proqramlarında, verilişlərində iştirak edirlər”.
Vaqif Aydınoğlu da qeyd etdi ki, gələcəkdə bu tipli verilişin olacağı gözlənilmir.
ANS Şirkətlər Qrupu prezidentinin media üzrə müşaviri Mais Məmmədov isə yaxın gələcəkdə meyxana yarışmasının yeni kollektivlə yenidən efirə gedəcəyini deyib:
“Ümumiyyətlə, televiziya verilişləri elədir ki, bir il keçdikdən sonra onu dəyişdirmək lazımdır. Müzakirə edirik, verilişə baxış çoxdur, ya yox. Bundan sonra onun yenidən gələn ilin proqramına da də salırıq. Həmin verilişdə müəyyən düzəlişlər, yeniliklər edirik”.
Bir müddət ANS-də “De gəlsin” meyxana yarışmasının iştirakı olan Vüqar Biləcəri də məsələyə öz münasibətini bildirib. Meyxanaçı səslənən tənqidlərlə razılaşmadığını deyib:
“Orda təhqiredici sözlər, söyüşlər olmayıb. Sadəcə yüngülvari şirin kəlmələr var, zarafatlar var idi. Yəni, çərivədən kənara çıxmalar ola bilməz.
Meyxana elə bir sənətdir ki, bu, hər adama verilən qabiliyyət deyil. Bu, ilahi istedaddır. Əsl sənətkarı, yəni şairi xalq özü istəsin gərək. Şərt o deyil ki, səhərdən-axşamadək efirdə qalasan. Bilirsiz ki, belə sənətkarlar var, onlar bütün günü efirdədilər. Lakin el şənliklərində, məclislərində onları görmək olmur. Çünki o sevgini qazana bilməyiblər”.Musavat.com
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]