BolgeXeber.Com » Xəbərlər » Gədəbəy İcra Hakimiyyəti döyülən şəxsin xəstəxanaya yerləşdirilməsini yasaqlayıb

Gədəbəy İcra Hakimiyyəti döyülən şəxsin xəstəxanaya yerləşdirilməsini yasaqlayıb

2-05-2016, 20:56
Oxunub: 2 258 Gədəbəy İcra Hakimiyyəti döyülən şəxsin xəstəxanaya yerləşdirilməsini yasaqlayıbNatiq Ələkbərov: “Məmmədov qardaşları pullarına, İcra Hakimiyyətinə arxayın olub istədikləri qanunsuzluğu edirlər”

Gədəbəyin Arıqıran İnzibati Ərazi Dairəsində(İƏD) yaşayan Natiq Yaqub oğlu Ələkbərovu döyüb, boğublar. Onu döyənlərin əlindən zorla çıxan N.Ələkbərov sonrdan daha böyük haqsızlıqlarla üzləşib. N.Ələkbərov redaksiyamıza etdiyi şikayətdə bildirir ki, onu öldürmək istəyən Məmmədov qardaşlarının arxasında dayananlar Gədəbəyin İcra Hakimiyyətinin rəhbərliyində təmsil olunurlar:

“Aprelin 28-də Rabil və Əli Məmmədov qardaşları məni döydülər. Boynuma kəndiri salıb boğmaq istədilər. Məni öldürmək istəyirdilər. Zorla əllərindən çıxa bildim. Daxili İşlər Nazirliyin 102 xidmətini yığmaq istədim, telefonumu əlimdən alıb palçığın içinə atdılar. Bundan 2 gün əvvəl isə üstümə maşın sürmüşdülər. Döyüldüyüm gün birtəhər evə gəldim. Qardaşım oğlu təcili yardım çağırdı. Gədəbəy Rayon Xəstəxanasına aparıldım, orada yardım göstərdilər. Vəziyyətim ağır olsa da, xəstəxanada məni saxlamaqdan imtina etdilər. Bizimlə düşmənçilik edənlər Rabil, Əli, Ramil və Akif Məmmədov qardaşlarıdır. Atam Yaqub Ələkbərov balıq gölü düzəltmək üçün Arıqıran İnzibati Ərazi Vahidliyində torpaq sahəsi almışdı. Torpağımızı İcra Hakimiyyətindəki havadarları vasitəsi ilə zəbt elədilər. Bundan əvvəl mən meşədə gözətçi işləyirdim. Həmin vaxt meşə ərazisində Rabil Bəybala oğlu Məmmədov ”budka" tikirdi. Meşənin ərazisi olduğuna görə qanunsuzluq barədə Meşə Təsərrüfatı İdarəsinə məlumat verdim. Bildirdim ki, tikintinin dayandırılması haqda tələblərimi saymırlar. Məlumatı verdiyimə görə Rabil Məmmədov və qardaşları Əli, Ramil və Akif bizimlə düşmənçilik aparmağa başladılar. Məni və atamı təhqir etməyə, söyməyə başladılar. Məni 2 dəfə döydülər".

Natiq Ələkbərov deyir ki, Məmmədovların Rayon İcra Hakimiyyətinin rəhbərliyi ilə yaxşı münasibətləri var və xəstəxanaya qəbul olunmamasını xəstəxanaya icra hakimiyyətindən verilən göstərişlə izah edir: “Məmmədovların böyük qoyun sürüləri var, sahibkardırlar. 4 qardaşın 3-ü dövlətdən heç bir əsas olmadan pensiya alır. Arıqıran İƏD-in sədri Zahir Qarayev Məmmədovların xalası oğludur. Onun vasitəsi ilə bizə məxsus torpaqda göl düzəldirlər. Biz də şikayət edirik. Mənə Məmmədovlar açıq şəkildə deyirlər ki, pul bizdə, adam bizdə, İcra Hakimiyyəti bizim arxamızda. Mən də xəstəxanaya getdim, qəbul etmədilər. Ərizə yazıram baxmırlar. Görürəm ki, Məmmədovların dedikləri düz çıxır. Pulları da var, adamları da. Bizim kimi kasıb adamları əzirlər, haqqımızı yeyirlər. Gədəbəy xəstəxanasında məni qəbul etmədilər, məcbur olub Şəmkir Rayon Xəstəxanasına getdik. Orada da məni götürmədilər. Yəqin ki, buranın icrasından tapşırmışdılar deyə götürmədilər”.

Natiq Ələkbərov deyir ki, onu 2015-ci ilin yanvarında işdən çıxarıblar: “Meşə gözətçisi idim. Yazdılar ki, guya iş vaxtı ərazidə olmamışam. Halbuki yanvar ayında Gədəbəy meşələrində 1 metr qar olur. Həmin şəraitdə meşədə hansı qanunsuzluq ola bilər? Məni Məmmədovlar İcra Hakimiyyətindəki adamları vasitəsi ilə işdən çıxarıblar. Bu adamlar Gədəbəyin İcra Hakimiyyətinə arxayın olub istədikləri qanunsuzluğu edirlər. Məni döyüblər, boğublar, atamı təhqir ediblər, torpağımızı əlimizdən alıblar, Gədəbəyin hüquq-mühafizə orqanları şikayətlərimizə baxmır. Döyülməyimlə bağlı ərizəmi alıblar, amma heç bir tədbir görmədilər. Deyirlər ki, guya 2 qardaş məni döyəndə onlara daha ağır xəsarət yetirmişəm. Mən 2 nəfəri necə döyə bilərəm? 3 övladım var, biri əsgərlikdədir, vətəni qoruyur. Bu vətəndə bizim haqqımız, hüququmuz yoxdurmu?”

Natiq Ələkbərov hüquq-mühafizə orqanlarından üzləşdiyi qanunsuzluqla bağlı ölçü götürülməsini, obyektiv araşdırılma aparılmasını xahiş edir.

Musavat.com