Bizimlə əlaqə | Reklam

BolgeXeber.Com » Xəbərlər » Cəbhə bölgəsi olan Füzuli sakinlərinə şad xəbər – daşınmaz əmlakın qeydiyyat xidmətləri sizə daha yaxın oldu

Cəbhə bölgəsi olan Füzuli sakinlərinə şad xəbər – daşınmaz əmlakın qeydiyyat xidmətləri sizə daha yaxın oldu

5-10-2018, 16:53

Oxunub: 2 785

Daşınmaz əmlakla bağlı qeydiyyat xidmətləri cəbhə bölgəsinə daha yaxın oldu

Artıq Füzuli rayon sakinlərinin qeydiyyatla əlaqədar digər bölgələrə getməsinə ehtiyac qalmadı. Belə ki, 5 oktyabr tarixində Horadiz şəhərində Əmlak Məsələləri Dövlət Komitəsinin qeydiyyat xidmətlərini göstərən yeni inşa edilmiş ərazi ofisi istifadəyə verildi. Bu imkanın yaradılması cəbhə bölgəsindəki sakinlərin daha rahat şəkildə qeydiyyat xidmətlərindənfaydalanmasına və bu sahədə əlçatanlığın təmin olunmasına yönəlib. Qeydiyyatla bağlı bu xidmət məkanı Füzuli rayonunun işğaldan azad olunmuş 1 şəhər, 12 qəsəbə, 20 kəndini əhatə edəcək. Belə ki, burada yaşayan 50 mindən artıq sakinə daşınmaz əmlakın qeydiyyatı ilə bağlı xidmətlər göstəriləcək. Bununla da həmin ərazidə yaşayan sakinlər uzaq məsafə qət etmədən operativ şəkildə əmlaka dair çıxarış və texniki sənədlərini ala biləcəklər, digər xidmətlərdən yararlanacaqlar.
Qeyd edilməlidir ki, bu xidmət məkanı Əmlak Məsələləri Dövlət Komitəsi yanında Daşınmaz Əmlakın Dövlət Reyestri Xidmətinin daxili imkanları hesabına inşa edilib. Qeydiyyat ofisi müasir dizayn üslubunda tikilib, ərazi idarəsinin ətrafında göz oxşayan yaşıllıq da salınıb. Bu isə rayonun memarlıq görünüşünə daha bir gözəllik qatır.
Binada ümummilli lider Heydər Əliyevlə bağlı guşə yaradılıb. Guşədə ulu öndərin Füzuli rayonuna səfərlərini, rayonda keçirdiyi görüşləri və tədbirləri əks etdirən fotostendlər qurulub. Eyni zamanda ölkə başçısı İlham Əliyevin də buraya gəlişini, vətəndaşlarla ünsiyyətini əks etdirən fotostendlər yer alıb.
Əhaliyə keyfiyyətli xidmətin göstərilməsi və şəffaflığın təmin edilməsi məqsədilə burada müasir üslubda xidmət zalı fəaliyyət göstərir. Vətəndaşlara çevik xidmətlərin göstərilməsi üçün bir neçə pəncərə istifadədədir. Daşınmaz əmlakın qeydiyyatı ilə bağlı hüquqi prosedurları izah edən elektron monitor quraşdırılıb. Quraşdırılmış monitorda daşınmaz əmlakın qeydiyyatı ilə bağlı zəruri sənədlərin siyahısı, habelə elektron xidmətlərlə bağlı məlumatların əyani surətdə əks olunması təmin edilib. Həmçinin burada vətəndaşlar əmlakın qeydiyyatı üçün tələb olunan xidmət haqları və rüsumlar barədə məlumat əldə edə bilir.
Bundan başqa fəaliyyətin müasir və modern əsaslarla qurulması diqqət mərkəzində saxlanılıb. Belə ki, mükəmməl fəaliyyət prosesi üçün müvafiq informasiya sistemləri, kommunikasiya avadanlıqları və texnologiyaları tətbiq edilir. Qeydiyyat xidmətləri isə ixtisaslı və peşəkar kadrlar tərəfindən göstərilir.
Elə həmin gün sakinlərə qeydiyyat xidmətləri də göstərilib. Vətəndaşların bəzisi əmlaklarına dair çıxarış alıb, bir qismi isə ilkin sənədlərini təqdim ediblər.
Sakinlər də yaradılan bu imkanlardan razılıqlarını bildiriblər. Qeyd ediblər ki, yaşadıqları rayonda belə ərazi idarəsinin olması əlavə ünvanlara getmədən əmlaklarının rahatlıqla qeydiyyata alınmasına şərait yaradacaq.
Bolgexeber.com

Çox Oxunanlar

Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00

[email protected]