BolgeXeber.Com » Xəbərlər » Hacı İbrahim Nehrəmlinin qardaşına qarşı mülki iddia qaldırılıb

Hacı İbrahim Nehrəmlinin qardaşına qarşı mülki iddia qaldırılıb

28-11-2018, 14:32

Oxunub: 2 181

Bu gün Bakı Ağır Cinayətlər Məhkəməsində Diasporla İş üzrə Dövlət Komitəsinin keçmiş sədri Nazim İbrahimov və iş adamı Hacı İbrahim Nehrəmlinin qardaşı Sahib İbrahimovun cinayət işi üzrə məhkəmənin hazırlıq iclası davam etdirilib

“Report”un xəbərinə görə, hakim Ramella Allahverdiyevanın sədrliyi ilə keçirilən prosesdə zərərçəkmiş Etibar Allahverdiyevin vəkili Xəqani İmanov mülki iddia qaldırıb.

O, 162 min 400 dollar maddi ziyanın və 50 min manat isə mənəvi ziyanın ödənilməsini istəyib.

Məhkəmə mülki iddianı icraata götürüb.

Daha sonra vəkil X.İmanov vəsatət qaldırıb. O, S.İbrahimovun barəsində seçilmiş ev dustağı qətimkan tədbirinin həbs qətimkan tədbiri ilə əvəz edilməsini tələb edib.

Vəsatət təmin edilməyib.

Məhkəmənin baxış iclası dekabrın 5-nə təyin olunub.

Qeyd edək ki, S.İbrahimov Cinayət Məcəlləsinin 178.3.2-ci (dələduzluq; külli miqdarda törədildikdə) və 308-ci (vəzifə səlahiyyətlərindən sui-istifadə) maddələri ilə ittiham olunub. Məhkəmənin qərarı ilə S.İbrahimov barəsində həbs qətimkan tədbiri seçilmişdi. Daha sonra onun barəsində ev dustaqlığı qətimkan tədbiri seçilib və azadlığa buraxılıb.

Xatırladaq ki, mətbuatda daha əvvəllər də S.İbrahimovun tikinti şirkətinin vətəndaşları aldatması ilə bağlı şikayət məktubları yer alıb. Belə ki, şikayətçilər müqavilə əsasında şirkətə pul ödəsələr də, mənzillərin onlara verilmədiyini bildiriblər.

Cinayət işində 52 zərərçəkmiş var. Ümumilikdə isə onlara 2 milyon manat ziyan dəyib.

Məlumata görə, S.İbrahimov zərərçəkmişlərə dəymiş zərərin bir qisimini ödəyib.

Çox Oxunanlar