BolgeXeber.Com » Xəbərlər » İşdən çıxarılan nazir müavini və Dövlət Xidmətinin rəisi kimdir? - DOSYE

İşdən çıxarılan nazir müavini və Dövlət Xidmətinin rəisi kimdir? - DOSYE

9-05-2020, 16:27
Mayın 9-da Prezident İlham Əliyev iki yüksək vəzifəli məmuru işdən çıxarıb. Rafiq Bayramov Mədəniyyət nazirinin müavini vəzifəsindən, Zakir Sultanov isə Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi vəzifəsindən azad edilib.

Qeyd edək ki, hər iki eks-məmurun Dövlət Təhlükəsizliyi Xidmətinin (DTX) dünən Mədəniyyət Nazirliyində keçirdiyi əməliyyat-istintaq tədbirləri zamanı saxlanıldığı bildirlir.

DTX-nin İctimai əlaqələr şöbəsinin yaydığı məlıumata görə, Mədəniyyət Nazirliyinin vəzifəli şəxsləri öz səlahiyyətlərindən qəsdən qulluq mənafeyinə zidd olaraq istifadə edib cəmiyyətin və dövlətin qanunla qorunan mənafelərinə mühüm zərər vuran coxsaylı qanunazidd əməllərə yol veriblər.

Modern.az saytı işdən çıxarılan eks-məmurların dosyesini təqdim edir:


Rafiq Yasin oğlu Bayramov 10 noyabr 1972-ci il tarixində anadan olub.

1989-cu ildə Bakı şəhərinin 10 saylı orta ümumtəhsil məktəbini bitirib, 1990-1995-ci illər ərzində Bakı Dövlət Universitetində təhsil alıb. 1995-1997-ci illər ərzində ordu sıralarında – Azərbaycan Respublikasının Milli Qvardiyasında müddətli hərbi xidmətdə olub.

1993-1998-cu illər ərzində qeyri-hökümət gənclər təşkilatlarında, Gənclər Təşkilatlarının Milli Şurasında fəaliyyət göstərib.

1998-1999-cu illər ərzində Bakı şəhəri Nizami rayon İcra Hakimiyyətinin Gənclər və İdman İdarəsində, 1999-2001-ci illərdə Bakı şəhəri İcra Hakimiyyətinin Aparatın ictimai-siyasi şöbəsində məsul vəzifələrdə işləyib. 2001-2003-ci illərdə Azərbaycan Respublikasının Gənclər, İdman və Turizm Nazirliyində baş təlimatçı, 2003-2006-ci illərdə Gənclər, İdman və Turizm Nazirliyində nazirin köməkçisi vəzifələrində çalışıb.

2006-2014-cü illər ərzində Mədəniyyət və Turizm Nazirliyində nazirin köməkçisi vəzifəsində işləyib.

2014-cü ilin iyul ayından 2018-ci ilin iyun ayınadək Mədəniyyət və Turizm Nazirliyinin Aparat rəhbəri vəzifəsində çalışıb.

2018-ci ilin iyun ayında Mədəniyyət nazirinin müavini vəzifəsinə təyin olunub.

2011-ci ildə “Dövlət qulluğunda fərqlənməyə görə” medalı, 2018-ci ildə isə Mədəniyyət və Turizm Nazirliyinin “Fəxri mədəniyyət işçisi” medalı ilə təltif olunub.

Ailəlidir, 3 övladı var.


***

Zakir İmran oğlu Sultanov 11 aprel 1968-ci ildə Bakı şəhərində anadan olub.

1985-ci ildə Bakı şəhərində 6 nömrəli orta məktəbi bitirib. 1985-1992-ci illərdə Azərbaycan İnşaat Mühəndisləri İnstitutunun inşaat fakültəsində ali təhsil alıb.

1986-1988-ci illərdə hərbi xidmətdə olub.

1991-2006-cı illərdə Xətai Rayon İcra Komitəsində və Xətai Rayon İcra Hakimiyyətində, Bakı Şəhər İcra Hakimiyyətinin Memarlıq və Şəhərsalma Müfəttişliyində, Azərbaycan Respublikasının Müdafiə Nazirliyinin Mənzil İstismar İdarəsində müxtəlif vəzifələrdə işləyib. 2006-2008-ci illərdə Mədəniyyət və Turizm Nazirliyinin “Bərpa-tikinti, İnkişaf və İnvestisiya Layihələrinin İdarə Olunması Agentliyi”nin direktoru, 2008-2014-cü illərdə Mədəniyyət və Turizm Nazirliyinin Tikilən Obyektlərin Birləşmiş Müdiriyyətinin rəisi vəzifəsində işləyib. Bu təşkilatlara rəhbərlik etdiyi dövrdə Azərbaycan Respublikasının Mədəniyyət və Turizm Nazirliyinin tabeliyində olan mədəniyyət sarayları və teatr ocaqlarında, musiqi məktəblərində, o cümlədən Heydər Əliyev Sarayında, Bakı şəhəri, "Milli Park" ərazisində "Muğam Evi"ndə, Azərbaycan Dövlət Akademik Milli Dram Teatrında, Azərbaycan Dövlət Gənc Tamaşaçılar Teatrında, Azərbaycan Dövlət Film Fondunda, Azərbaycan Dövlət Rus Dram Teatrında, Azərbaycan Dövlət Kukla Teatrında, Azərbaycan Dövlət Xalça Muzeyində, Bakı şəhərində Milli İncəsənət Muzeyində, Şəki şəhərində “Aşağı Karvansaray”da, Şəki Dövlət Dram Teatrında, Qəbələ Mədəniyyət Evində, Azərbaycan Dövlət Musiqili Komediya Teatrında, Ağdam Dövlət Dram Teatrında, Bərdə şəhərində Uşaq İncəsənət Məktəbində və demək olar ki, Azərbaycanın əksər rayonlarında mədəniyyət ocaqları və uşaq incəsənət məktəblərində tikinti, əsaslı təmir, bərpa-yenidənqurma və konservasiya işləri həyata keçirilib.

2014-cü ildə Mədəni İrsin Qorunması, İnkişafı və Bərpası üzrə Dövlət Xidmətinin rəisi vəzifəsinə təyin olunub.

Azərbaycan Respublikasında tikinti kompleksinin inkişafında xidmətlərinə görə "Tərəqqi" medalı ilə təltif edilib.