BolgeXeber.Com » Siyasət » Malik Həsənov: "44 günlük Vətən müharibəsində dünyaya səs salan “Dəmir yumruğ”umuz yerindədir"

Malik Həsənov: "44 günlük Vətən müharibəsində dünyaya səs salan “Dəmir yumruğ”umuz yerindədir"

22-07-2021, 13:54
Oxunub: 3 296 “44 günlük İkinci Qarabağ müharibəsində tarixi Zəfəri ilə bölgədə yeni reallıqlar yaradan və dünya siyasətində dəyişikliklərə yol açan  Azərbaycanın hazırda əsas hədəfi  regionda dayanıqlı sülhün təmin edilməsi, iqtisadi əlaqələrin qurulması, bir sözlə, tarixə qovuşan Dağlıq Qarabağ münaqişəsi ilə bağlı  yeni səhifənin açılmasıdır. 10 noyabr 2020-ci il üçtərəfli Bəyanatda  və 11 yanvar 2021-ci ildə keçirilən üçtərəfli görüşdə əldə olunan razılaşmada da bu kimi məqamlar öz əksini tapıb. Azərbaycan  təkmil sülh modelini ortaya qoyub və qarşı tərəfə sülh razılaşmasını qəbul etmək zamanı olduğunu bildirib. İyulun 20-də Rusiya Federasiyasının Prezidenti Vladimir Putinin dəvəti ilə Moskvaya işgüzar səfər edən  dövlət başçısı İlham Əliyevin rusiyalı həmkarı ilə görüşündə də diqqət göstərilən əsas məsələlərdən biri  regionda vəziyyətin nizamlanması oldu. Azərbaycanın ötən səkkiz ayda postmüharibə dövrünün problemsiz keçməsi istiqamətində  səyləri Rusiya Prezidenti tərəfindən yüksək dəyərləndirildi.” Bu fikirləri Milli Məclisin deputatı Malik Həsənov bildirib.
M.Həsənov qeyd edib ki, Azərbaycanın xarici siyasətində qonşu dövlətlərlə əməkdaşlıq  xüsusi yer tutur. Azərbaycan-Rusiya münasibətləri bunun bariz nümunəsidir: “Strateji tərəfdaşlıq səviyyəsinə çatmış bu münasibətlər  bütün sahələri əhatə edir. Hər iki tərəf  əlaqələrin  inkişaf  səviyyəsindən  məmnundur. Siyasi, ticari-iqtisadi, humanitar sahələrdə fəal  əməkdaşlıq edilir. Nəqliyyat və energetika sahələrində yaxşı perspektivlər var. Ümumiyyətlə, əlaqələr  çoxşaxəlidir. Hazırkı vaxtda  regionda təhlükəsizliyin möhkəmləndirilməsi məsələləri üzrə  məsləhətləşmələrə, müzakirələrə   ehtiyac olduğu bildirilir.”
 Qədim dostluq və mehriban qonşuluq  ənənələrinə söykənən Rusiya-Azərbaycan münasibətlərinin tarixi Zəfərimizin yaratdığı yeni reallıqlara uyğun  hazırkı inkişaf səviyyəsindən bəhs edən millət vəkili onu da bildirib ki, hər iki ölkə başçısı  10 noyabr  2020-ci il  tarixli birgə Bəyanatda nəzərdə tutulmuş məsələlərin icrası ilə bağlı vahid mövqe nümayiş etdirir, bu razılaşmaya əsasən   bütün kommunikasiyaların, o cümlədən  Azərbaycanın əsas hissəsi ilə Naxçıvan MR arasında nəqliyyat dəhlizinin  - Zəngəzur dəhlizinin açılmasına  xüsusi  önəm verir: “Zəngəzur dəhlizinin region ölkələri, türk dünyası üçün əhəmiyyətinin geniş təhlilə  ehtiyacı yoxdur.  Azərbaycan Naxçıvan Muxtar Respublikası vasitəsilə Türkiyə, Orta Asiya Avropa ilə birləşir. Yeni nəqliyyat dəhlizi yaranmaqdadır. Azərbaycan tərəfi daim bildirir ki,  əgər Ermənistan kommunikasiyalarla bağlı çətinliklərə son qoymaq,  tranzit ölkə olmaq üçün hər hansı imkana malik olmaq istəyirsə, yeni reallıqlarla barışmalıdır.”
 Ermənistanın Zəngəzur dəhlizinin yaradılması ilə bağlı məsələlərin reallaşdırılmasına süni əngəl törətmək cəhdinin  yolverilməzliyini, bu dəhlizin təkcə dəmir yolu deyil, həm də paralel şəkildə avtomobil nəqliyyatının hərəkətini nəzərdə tutduğunu  xüsusi qeyd edən M.Həsənov  vurğulayıb ki,  10 noyabr razılaşmasının icrasına mane olmaq istəyən kənar qüvvələr mövcuddur və onlar  regionda sabitliyin, təhlükəsizliyin və sülhün bərqərar olmasında, qarşılıqlı etimad mühitinin yaradılmasında maraqlı deyillər: “Belə cəhdlər heç zaman nəticə verməyəcək.  Həmin qüvvələr unutmasınlar ki, 44 günlük Vətən müharibəsində dünyaya səs salan “Dəmir yumruğ”umuz yerindədir.  Ermənistan atəşkəsi pozmaqla, təxribatlar törətməklə dünyaya guya Dağlıq Qarabağ münaqişəsinin davam etdiyini çatdırmağa,  Rusiyanın sülhyaratma missiyasına kölgə salmağa çalışsa da reallıqlar başqa mənzərəni  ortaya qoyur. İstər dövlət başçısı İlham Əliyevin rusiyalı həmkarı ilə görüşündə, istərsə də  bu günlərdə ölkəmizdə səfərdə olan Avropa İttifaqı Şurasının Prezidenti Şarl Mişel ilə birgə keçirdiyi  mətbuat konfransında  postmüharibə dövrünün reallıqlarına uyğun məsələlərin müzakirə olunması,  Avropa İttifaqı rəsmisinin qurumun  Azərbaycan və Ermənistan arasında sərhədlərin delimitasiyası və demarkasiyası prosesinin, iki ölkə arasında etimad quruculuğu tədbirlərinin başlanmasına dəstək verməyə hazır olduğunu bildirməsi də  münaqişənin artıq tarixə qovuşduğunun  və  tam mənada rəsmi  Bakının mövqeyinin dəstəkləndiyinin  nümayişidir.”