BolgeXeber.Com » Bölgə » Cəlilabad bu kəndini susuzluqdan belə məhv edirlər-FOTO

Cəlilabad bu kəndini susuzluqdan belə məhv edirlər-FOTO

21-07-2015, 15:33

Oxunub: 5 347

Cəlilabad rayonunun ən böyük yaşayış məntəqələrindən olan Günəşli kəndinin sakinləri iki aya yaxındır ki, su problemi ilə üzləşiblər

10 mindən çox sakini olan Günəşli sakinlərinin virtualaz.org saytına verdiyi məlumata görə, kəndin içindən keçən suvarma kanalları iyundan bəri quruyub. Su verilmədiyinə görə kəndlilərin işi olmazın dərəcədə çətinləşib.

“Böyük kənddir. 10 min nəfərdən artıq adamın yaşadığı kənddə yerli sakinlərin əsas dolanışıq mənbəyi əkin-biçindir, həyətyanı təsərrüfatdır. Su olmayanda isə təsərrüfatla məşğul olmaq mümkün olmur. Hazırda kənddə su yoxdur, kanallar qupqurudur. Belə quraqlıq olanda mal-qara, toyuq-cücə də tələf olur, əkin sahələri də yanıb məhv olur. Kəndə niyə su verilməməsinə izah verən yoxdur. Soruşanda da deyirlər ki, guya su qıtlığı var. Maraqlıdır ki, kənddən bir neçə kilometr aralıdakı əkin sahələrinə normal su verilir. Həmin əkin sahələri isə yerli məmurlara məxsusdur. Sadə camaata gələndə su qəhətə çəkilir” - deyə kənd sakinləri bildirib.

Məsələyə aydınlıq gətirmək üçün “Azərbaycan Meliorasiya və Su Təsərrüfatı” ASC ilə əlaqə saxladıq.

ASC-nin suvarma sistemlərinin istismarı şöbəsinin əməkdaşı Nəfisə İmanova virtualaz.org saytına açıqlamasında bildirdi ki, kənddə su problemi yoxdur: “Adıçəkilən kənddə su problemi yoxdur. Hər hansı problem olan kimi qaynar xəttə zəng edirlər və biz də problemi həll edirik. Bizə isə belə müraciət daxil olmayıb”.

Şöbə əməkdaşı eyni zamanda onu da vurğuladı ki, suyun verilib-verilməməyi barədə dəqiq məlumatı yoxdur: “Bunu ancaq rayondan öyrənəndən sonra deyə bilərik. Hər hansı problem olsaydı, burada şikayətçilər üçün açılan kitabda şikayətçi qeyd olunardı. İdarənin əməkdaşları da bir neçə gün əvvəl həmin rayonda idilər, ezamiyyətdən təzə gəliblər”.

N.İmanova bundan əvvəl həmin kənddən şikayətin daxil olmadığını da dedi: “Yenə də daha dəqiq məlumat üçün biz kəndlə əlaqə saxlayıb maraqlanacağıq”.

ASC nümayəndəsinin “orada elə problem olmaması” haqda dediklərinə hər hansı şərhimiz yoxdur. Çünki Günəşli sakinlərinin qurumuş kanalın çəkib redaksiyamıza, bizim də oxuculara təqdim etdiyimiz fotoları əslində hər şeyi deyir...
Bolgexeber.com

Çox Oxunanlar

Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00

[email protected]