BolgeXeber.Com » Bölgə » Biləsuvarda icra numayəndəsindən prezidentə şikayət

Biləsuvarda icra numayəndəsindən prezidentə şikayət

8-11-2013, 17:30

Oxunub: 4 312

Bolgexeber.com-un redaksiyasına Biləsuvar rayonu Ovçubərə kənd sakini Süleymanov Elməddin Mirsəməd oğlu tərəfindən prezidentə və bir sıra dövlət rəsmilərinə ünvanlanmış şikayət məktubunun surəti daxil olmuşdur.Məktubu olduğu kimi təqdim edirik:
“Möhtərəm prezident , hörmətli dövlət rəsmiləri, bu məktubu yazmağa vadar edən səbəb Biləsuvar rayon Ovçubərə kənd İcra nümayəndəsi Mikayılov Ağadin Baba oğlunun azğınlığı və özbaşınalığıdır.

Öncə sizə özüm haqqında qısa məlumat verirəm. Mən, Süleymanov Elməddin Mirsəməd oğlu Biləsuvar rayonunun Ovçubərə kəndində yaşayıram. Ailəliyəm, 4 övladım var. Heç bir yerdə işləmirəm. Həyat yoldaşım da heç bir yerdə işləmir. Dövlətimiz tərəfindən verilən ünvanlı sosial yardımla dolanırdıq. Üç ildən artıq idi ki, bu imtiyazdan yararlanırdıq. Bu il ünvanlı sosial yardımın sənədləşməsi kənd icra nümayəndəliyinə tapşırıldığından yenidən lazımı sənədlər almaq üçün kənd İcra nümayəndəsi olan Mikayılov Ağadin Baba oğluna müraciət etdim. O məni get-gələ salaraq həmin sənədləri mənə vermədi. Qardaşıma məxsus olan avtomobili mənim adıma çıxaraq mənə maşınım olduğu üçün sosial yardım düşmədiyini bəhanə gətirirdi. Mən məcbur olub Biləsuvar rayon İcra hakimiyyətinə ailəm və uşaqlarımla getməli oldum. 4 noyabr 2013-cü il tarixdə İcra hakimiyyətində vətəndaşların problemləri ilə bağlı iclasda iştirak edərək öz problemimi rayon rəhbərliyi qarşısında dedim. Icra hakiminin birinci müavini Akif Kazımov cənabları məsləhət bildi ki, mənim yaşadığım mənzilə , yaşayış tərzimə baxış keçirilsin. Əgər qanuna uyğun olarsa ünvanlı sosial yardım üçün lazım olan sənədlərin mənə verilməsinə köməklik ediləcəyini dedi.

Həmin günü Biləsuvar rayon İcra hakimiyyətindən iki nümayəndə yaşadığım mənzilə baxış keçirmək üçün gəlmişlər. Bu zaman əmək məzuniyyətində olan Ovçubərə kənd İcra nümayəndəsi Mikayılov Ağadin Baba oğlu və onun müavini Mikayılov Allahşükür də onlarla birlikdə olmuşdur. Mən evdə deyildim. Onları həyat yoldaşım qarşılayıb. Ağadin Mikayılov yaşadığım mənzilə baxış keçirmədən həyat yoldaşıma deyib ki, mənə Elməddin özü lazımdır. Evdən telefon nömrəmi alaraq mənə zəng etdi. Mənə telefonda dedi ki,hardasan? Dedim ki, qonşu kənd olan Ağalıkənd ərazisindəyəm. Dediki tez gəl kəndin girişində gözləyirəm səni.

Mən tez bir zamanda kəndə qayıdaraq onlarla küçəmizin baş tərəfində görüşdüm. Ağadin Mikayılov mənə dedi ay yaramaz sən nə üçün məndən rayon rəhbərliyinə şikayət edibsən? Mənə nə edəcəksən ki?... Sənin özün yoxe nəslin hamısı şikayət eliyə, hara gedirsən get, sənə sosial yardım üçün sənəd verən deyiləm. Gələn nümayəndələr isə kənarda durub sadəcə tamaşa edirdilər. Onunla mənim söhbətim mübahisəyə çevrildi. Mən onlara dedim ki, gəlin yaşadığım mənzilə gedək

Baxış keçirin. Bəs nə üçün gəlmisiniz? Onların yerinə yenə də kənd icra nümayəndəsi , əmək məzuniyyətində olan Ağadin Mikayılov dilləndi. Ay bala sənə dedimki sən sosial yardım üzünə həsrət qalacaqsan.Sosial yardım əvəzinə ( əlini qabağına apararaq ) bunu görərsən... Sonra təhqiramiz ifadələr, küçə söyüşləri işlədərək məni təhqir etməyə başladı.
Bir az da özündən çıxaraq mənə fiziki təsir göstərərək məni vurdu. Sifətimin sağ nahiyəsinə yumruq, sol böyrümə isə təpiklə zərbə vurdu. Mən onun bu hərəkətlərinə çaşıb qalmışdım. O isə zərbə endirməkdə davam edir, məni söyərək döyürdü. Yanındakı nümayəndələr bizi ayırmaq istəsələrdə bu səs-küyü eşidib həmkəndlilərim Hacı və Rahim adlı şəxslər də məni onun əlindən aldılar. O bizi ayrışdıran şəxsləri də təhqir etdi.

.Ağadin Mikayılov qabaqdan gəlmişdik edərək rayon polis şöbəsinə zəng etdi. Dedi gör sənə nə edəcəm. Səni şöbələrdə süründürəcəm. Atam da bu səs-küyü eşidib hadisə yerinə gəldi. O atama da məhəl qoymayıb ailəlikcə bizim ünvanımıza nəlayiq ifadələr işlətməyə başladı. Sonra hadisə yerinə polislər gəldi. Ağadin Mikayılov onların avtomobilinə əyləşərək elə orada ərizəsini yazdı. Ürəyi soyumadığından onların, hüquq mühafizə orqanının işçilərinin yanında da söyüşlə danışır, yenidən üzərimə hücum çəkirdi. Sanki polisləri görüb arxayınlaşaraq mənə təsir göstərmək istəyirdi. Mən isə rayon mərkəzinə, polis şöbəsinə gedərək şikayət etdim. İzahatımı orada verdim. Rayon mərkəzi xəstəxanasının əməkdaşının yanına gedərək həkim müayinəsindən də keçdim. Sabahısı gün yenidən Rayon İcra başçısının müavini Akif müəllimlə görüşərək hadisəni ona da danışdım. Dedimki əmək məzuniyyətində olan bir şəxs nə üçün məni təhqir etməli, sizin yolladığınız nümayəndələrə də məhəl qoymayan, vətəndaşı yersiz yerə təhqir edib döyən . Ağadin Mikayılov haqqında nə üçün tədbir görmürsünüz ? O da rayon polis şöbəsinə zəng edərək məsələni öyrəndi. Aldığım xəsarətləri öz gözü ilə gördü.

Cənab prezident , hörmətli dövlət rəsmiləri, mən bu gün tapdanmış vətəndaş hüquqlarımın, alçaldılmış şəxsiyyətimin , şərəf və ləyaqətimin harayını sizə edirəm. Azğınlaşmış, qudurmuş, heç kimə məhəl qoymayan bir dövlət məmuru nəyin ki vətəndaşları saymır,hətda fiziki zorakılığa məruz qoyur, təhqir edir. Axı bu gün bizim ali qanunlarımız, möhkəm dövlətçiliyimiz var. Necə olur ki biz sadə vətəndaşlar qanunun aliliyinə hörmət bəsləyir, qanuna tabe oluruq. Bu cür insanlar isə dövlətdən , hökümətdən yararlanaraq dövlətin yeganə mənbəyi olan vətəndaşı təhqir edir, döyür, hörmətdən salır? Bizim güvəndiyimiz isə yenə sizlərsiniz.

Odur ki, sonda sizdən xahiş edirəm bu şəxsin barəsində qanunun aliliyi çərçivəsində müfaviq ölçü götürülməsi barəsində yerli hüquq və icra orqanlarına göstəriş verəsiniz. Mənim kobudcasına pozulmuş hüqularım bərpa edilsin.
Hal-hazırda ailə vəziyyətim ünvanlı sosial yardım verilməyəndən bəri ağırdır. Mənim iki məktəbli və iki az yaşlı övladım var. Onları dövlətimizin biz kasıb insanlara, sadə vətəndaşlara verilən ünvanlı sosial yardım hesabına böyüdürdüm. İndi ailənin dolanışığını heç bilmirik necə edək. Ünvanlı sosial yardımın sənədlərinin mənə verilməsinə də köməklik etməyinizi xahiş edirəm”.
Hörmətlə: Süleymanov Elməddin Mirsəməd oğlu
Bolgexeber.com

Çox Oxunanlar