Bizimlə əlaqə | Reklam
BolgeXeber.Com » Şou-Biznes » Azərbaycan gözəlinin törətdiyi cinayətin təfərrüatları bilindi

Azərbaycan gözəlinin törətdiyi cinayətin təfərrüatları bilindi

21-06-2014, 14:20
Oxunub: 5 091 “Miss Azerbaijan 2014” gözəllik müsabiqəsinin qalibi Cavidan Qurbanovanın xuliqanlıq maddəsi ilə 4 il icbari iş alması və bu səbəbdən ölkə xaricinə çıxışına qadağa qoyulması haqda məlumat vermişdik.

Bolgexeber.com bildirir ki,Azərbaycan gözəlinin törətdiyi cinayətin təfərrüatları haqda azvision.az saytına ilginc məlumat daxil olub.

C.Qurbanova ilə eyni qrupda təhsil alan Fərid Mansurov özü saytla əlaqə saxlayaraq Azərbaycan gözəli ilə bağlı bəzi məlumatları diqqətə çatdırıb.

F.Mansurov bildirib ki, o, Bakı Dövlət Universitetinin Fizikia fakültəsində C.Qurbanova ilə bir qrupda təhsil alıb. Onun sözlərinə görə, C.Qurbanova ilə tələbə yoldaşı kimi münasibətləri normal olub. Ta 2011-ci ilin may ayının 31-nə kimi...

Həmin gün F.Mansurovla C.Qurbanova arasında mübahisə düşür. Mübahisə zamanı C.Qurbanova əlindəki qələmlə F.Mansurovun gözünə zərbə endirir.

“Cavidanla həmin gün aramızda kiçik mübahisə olmuşdu. Ondan yarım saat keçməmiş qələmlə şahidlərin yanında gözümə vurdu və qan töküldü. Bundan sonra mən 15 gün xəstəxanada yatdım. Ailəm məsələ ilə bağlı Yasamal rayon Polis İdarəsinə müraciət etdi. Lakin məsələ araşdırılmadı. Bununla bağlı biz daxili işlər naziri Ramil Usubova və Heydər Əliyev Fonduna müraciət etdik. Bundan sonra iş Yasamal rayon Məhkəməsinə göndərildi. 2011-ci ildən 2013-cü ilə qədər məhkəmədə cinayətlə bağlı qərar qəbul edildi və ona 4 il icbari iş verildi”.

F.Mansurov bildirib ki, o və ailəsi bu qərardan razı deyillər və Apellyasiya Məhkəməsinə müraciət edəcəklər.

Məlumat üçün qeyd edək ki, Fərid Mansurov məhkəmə sənədlərini təqdim edəcəyini bildirib.

C.Qurbanova barəsində hadisə ilə bağlı Cinayət Məcəlləsinin 221.3-cü maddəsi ilə (xuliqanlıq, silah və ya silah kimi istifadə olunan əşyalardan istifadə ilə törədildikdə) cinayət işi açılıb.

Qeyd edək ki, “Miss Azerbaijan 2014” gözəllik müsabiqəsinin qalibi Cavidan Qurbanovaya ölkədən kənara çıxmağa qadağa qoyulub. C.Qurbanovanın icbari iş almasından “Miss Azerbaijan 2014” müsabiqənin təşkilatçıları da xəbərsiz olub. Hazırda Azərbaycanı “Bəşəriyyət gözəli 2014” (Miss Universe 2014) müsabiqəsində kimin təmsil edəcəyi sual altındadır.
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]