Hacılı kəndində səyyar qəbul-görüşü keçirildi

Bolgə.TV xəbər verir ki, Bərdə Rayon İcra Hakimiyyətinin başçısının rayonun Hacılı kəndində səyyar qəbul-görüşü keçirildi

Görüşdə rayon İcra Hakimiyyətinin başçısı, aparatın məsul şəxsləri, hüquq-mühafizə orqanlarının, təhsil, səhiyyə, mədəniyyət, xidmət təşkilatlarının rəhbərləri, bələdiyyə, inzibati ərazi dairəsi üzrə nümayəndəliyin əməkdaşları və kənd sakinləri iştirak etmişlər.

Rayon İcra Hakimiyyətinin başçısı ölkə rəhbərinin tapşırıq və tövsiyələri əsasında respublikamızda aparılan sosial-iqtisadi islahatlar, əhalinin rifah halının yüksəlməsi istiqamətində, həmçinin Hacılı kəndində görülən işlər barədə vətəndaşlara ətraflı məlumat verdi.

Daha sonra RİH başçısı Vidadi İsayev görüşdə iştirak edən sakinlərin kəndin ərazisində 40 hektar sahədə pay torpaqlarının yay aylarında suvarılmasında çətinlik olduğu üçün 1 ədəd subartezian quyusunun qazılması, əkinə yararlı torpaq sahəsinin ayrılması, kəndin elektrik şəbəkəsinin kabelləşdirilməsi, fərdi yaşayış evinin təbii qaz və elektrik enerjisi ilə təmin olunması, kənddə internetin sürətinin zəif olduğu üçün rabitə şəbəkəsinin yenidən qurulması, Ünvanlı Dövlət Sosial Yardım alınmasına köməklik göstərilməsi, fərdi yaşayış evinin qarşısında məişət tullantıları üçün qutu qoyulması ilə bağlı müraciətlərini dinlədikdən sonra qaldırılan məsələlərin həlli istiqamətində müvafiq tədbirlərin görülməsi ilə əlaqədar aidiyyəti qurumlara müvafiq tapşırıqlar verdi.