BolgeXeber.Com » Dünya » Gürcüstan əhalisinin sayı azalıb

Gürcüstan əhalisinin sayı azalıb

30-04-2019, 14:46

Oxunub: 2 847

Bu ilin yanvarın 1-nə olan məlumata əsasən, Gürcüstan əhalisinin sayı 3 mln. 723,5 min nəfər təşkil edib.

“Report”un yerli bürosu xəbər verir ki, bu barədə ölkənin Milli Statistika İdarəsinin hesabatında bildirilib.

İllik müqayisədə qonşu ölkə əhalisinin sayı 0,2% azalıb. Əhalinin 58,7%-i şəhərlərdə məskunlaşıb.

Gürcüstan əhalisinin təqribən üçdə bir hissəsi paytaxt Tbilisidə yaşayır. Azərbaycanlıların sıx yaşadıqları Kvemo Kartli bölgəsində isə əhalinin sayı 433,2 min nəfər təşkil edir ki, onların da 188,4 mini şəhər, 244,7 min nəfəri isə kəndlərdə yaşayır.

Yaş tərkibinə gəlincə 0-14 yaşlı şəxslər ümumi əhalinin 20,3%, 15-64 yaşlı şəxslər 64,9%, 65 və ondan yuxarı yaşlı şəxslər isə 14,8%-ni təşkil edib.

Gürcüstan əhalisinin 48%-ni kişilər, 52%-ni isə qadınlar təşkil edir. İllik müqayisədə kişilərin sayı dəyişməz qalaraq 1 mln. 790,9 min nəfər, qadınların sayı isə 0,3% azalaraq 1 mln. 932,6 min nəfər olub.

2018-ci ildə qonşu ölkədə doğulanda gözlənilən ömür uzunluğu 74 yaş təşkil edib. Bu göstərici kişilər üçün 69,7, qadınlar üçün isə 78,2 yaş olub.

Əhalinin orta yaşı isə 37 yaşa bərabərdir.

Çox Oxunanlar