BolgeXeber.Com » Gündəm » Şəmkirdə qan tökən məmur kimdir?

Şəmkirdə qan tökən məmur kimdir?

6-08-2014, 09:35

Oxunub: 2 478

Qan tökən idarə müdiri komitə sədrinin 1-ci müavininin bacanağı, deputatın yaxın qohumu çıxdı

Mi.az xəbər verir ki, ötən gün Şəmkirdə bələdiyyə sədrinin müavini Zakir Tağıyevi bıçaqla vuran rayon Maliyyə idarəsinin müdiri Nazim Məlikov Dövlət Statistika Komitəsi sədrinin 1-ci müavini, hazırda sözügedən komitənin sədri vəzifəsini icra edən Həmid Bağırovun bacanağıdır. Belə ki, Nazim Məlikovla Həmid Bağırov bacanaqdırlar, onların həyat yoldaşları xala qızıdırlar.

Həmid Bağırov Tibb Universitetinin rektoru, deputat Əhliman Əmiraslanovun qaynıdır. Yəni Nazim Məlikovun həyat yoldaşı isə Əhliman Əmiraslanovun xalası qızıdır.

Verilən məlumata görə, Nazim Məlikovun həmin vəzifəyə təyinatında Tovuzun icra başçısı işləyən zaman Həmid Bağırov müstəsna rol oynayıb. Maraqlıdır ki, bu ağır hadisəyə baxmayaraq, saxlanılan Nazim Məlikov elə həmin günü sərbəst buraxılıb.

Məlumatda bildirilir ki, sədr müavininə bıçaqla ağır xəsarətlər yetirən N.Məlikovun azadlığa buraxılması təkcə tutduğu vəzifədən irəli gəlməyib. İddiaya görə, onun sərbəst buraxılmasında Həmid Bağırovla deputat Əhliman Əmiraslanovun şəxsi nüfuz və əlaqələri əsas rol oynayıb.

Təəssüf ki, cəhdimizə rəğmən, Həmid Bağırovun mövqeyini öyrənmək mümkün olmayıb.

Amma Həmid Bağırovun qardaşı Musa Bağırov açıqlamasında bələdiyyə sədrinin müavinini bıçaqlayan Nazim Məlikovun qardaşının bacanağı olduğunu təsdiqləyib: «Bəli, onlar bacanaqdırlar. Nazim Məlikovu vaxtı ilə Həmid Bağırov vəzifəyə yerləşdirib. O vəzifəyə qədər Nazim çox imkansız adam olub. Hətta mənə 5 min borcu da vardı, onu zülmlə geri qaytardı…».

Xatırladaq ki, rəsmi yayılan məlumatda Şəmkirin Düyərli kəndində rayon Maliyyə İdarəsinin müdiri Nazim Məlikovun Düyərli kənd Bələdiyyəsinin sədr müavini Zakir Tağıyevi bel, kürək və baş nahiyyəsindən bıçaqladığı bildirilib: "Yaralı ağır vəziyyətdə Şəmkir Mərkəzi rayon Xəstəxanasına yerləşdirilib. Qanlı cinayət törədən Nazim Məlikov polis bölməsinə aparılıb. Sonradan o, sərbəst buraxılıb. İlkin məlumata görə, hadisəyə torpaq üstündə yaranan anlaşılmazlıq səbəb olub.

Qeyd edək ki, Nazim Məlikovun qanını tökdüyü Zakir Tağıyevlə qohumluq əlaqələri var və onun hadisəni törədərkən sərxoş olduğu bildirilir".

Çox Oxunanlar