BolgeXeber.Com » Gündəm » MTN brilyant qaçaqmalçısını cinayət başında həbs etdi

MTN brilyant qaçaqmalçısını cinayət başında həbs etdi

23-06-2011, 17:15

Oxunub: 4 725

Ondan külli miqdarda brilyant tutuldu.

Milli Təhlükəsizlik Nazirliyi tərəfindən həyata keçirilmiş əməliyyat tədbirləri nəticəsində dövlətin qanunla qorunan hüquq və mənafelərinə ziyan vurulmasının qarşısı alınıb. Nazirliyin ictimaiyyətlə əlaqələr mərkəzindən Bolgexeber.com-a daxil olan məlumata görə, qaçaqmalçılıq yolu ilə gizli şəkildə 141,14 karat brilyant daşları Azərbaycana gətirmiş şəxs cinayət başında yaxalanıb.

Belə ki, Azərbaycan vətəndaşı Fərəcov Mayis Şahverdi oğlu və qeyriləri cinayət əlaqəsinə girərək qabaqcadan əlbir olan bir qrup şəxs halında külli miqdarda brilyant daşları Birləşmiş Ərəb Əmirliklərinin Dubay şəhərində alınmasını və qaçaqmalçılıq yolu ilə, yəni Azərbaycanın gömrük sərhədindən gömrük nəzarətindən gizli keçirib Azərbaycana gətirilməsini təşkil etiblər.

Müəyyən olunub ki, Mayis Fərəcov 2011-ci il iyunun 11-də Heydər Əliyev Beynəlxalq Hava Limanından təyyarə ilə Dubay şəhərinə getmiş və orada həmin brilyant daşları alaraq şampun qabının içərisində gizlədib. 2011-ci il iyunun 15-də Mayis Fərəcov təyyarə ilə Bakıya qayıtmış və əldə etdiyi brilyant daşları hava limanının gömrük məntəqəsindən qaçaq yolla gizli keçirib.

Mayis Fərəcov Azərbaycanın gömrük sərhədini keçdikdən sonra Hava Limanının avtomobil dayanacağında MTN əməkdaşları tərəfindən yaxalanıb. Mayis Fərəcovun üzəridnə hal şahidlərinin iştirakı ilə keçirilmiş baxış zamanı sonuncunun əlində olan sellofan paketdəki şampun qabının içərisində gizlətdiyi ümumi çəkisi 141,14 karat, qiyməti 43 min 240 manat dəyərində olan brilyant daşlar aşkar edilərək götürülüb.

Faktla bağlı MTN İstintaq Baş İdarəsi tərəfindən Cinayət Məcəlləsinin 206.3.2-ci (qabaqcadan əlbir olan bir qrup şəxs tərəfindən qaçaqmalçılıq) maddəsi ilə cinayət işi başlanılıb. Mayis Fərəcov təqsirləndirilən şəxs qismində cəlb olunaraq barəsində məhkəmənin qərarı ilə həbs qətimkan tədbiri seçilib. Hazırda istintaq-əməliyyat tədbirləri davam etdirilir.

Çox Oxunanlar