BolgeXeber.Com » Gündəm » Bakıda keçmiş məhkumu güllələyən idmançı həbs edildi

Bakıda keçmiş məhkumu güllələyən idmançı həbs edildi

1-07-2011, 16:30
Oxunub: 2 425 O, silaha əl atmasının səbəni müstəntiqə danışıb...

Bakının Nəsimi rayonunda yerləşən kafedə silahlı insident törədən şəxs tutulub. Rayon Prokurorluğundan Bolgexeber.com xəbər portalına verilən məlumata görə, həmin şəxs peşəkar idmançı olan 28 yaşlı İlqar Əbdürrəhmanovdur. İ.Əbdürrəhmanov iyunun 29-da səhər saatlarında “Şamaxinka” adlanan ərazidə yerləşən “Arzular” kafesində 24 yaşlı Müslüm Əliyevi gülləliyib.

İ.Əbdürrəhmanov M.Əliyevi güllələməsini onu söyməsi ilə əsaslandırıb. İlkin dindirmə zamanı verdiyi ifadəsində göstərib ki, M.Əliyev sərxoş vəziyyədə onu söyüb. Buna görə də silaha əl atıb.

Zərərçəkmiş M.Əliyevlə bağlı məlumatlar əldə etmişik. Məlum olub ki, M.Əliyev əvvəllər də söyüşünün bəlasına düşüb. O, 2010-cu ilin fevralında Zaqatala şəhər avtovağzalında yolun kənarında dayanmış sürücünü söyüb və ona xəsarət yetirib.

Zaqatala rayon Məhkəməsinin hökmü ilə o, xuliqanlıq və qəsdən sağlamlığa az ağır xəsarət yetirmə maddələri ilə təqsirləndirilərək 1 il 9 ay müddətinə azadlıqdan məhrum edilib.

M.Əliyev güllələnəndən sonra da özünü dinc aparmayıb. Yaralı vəziyyətdə xəstəxanaya gətirilən zaman xəstəxanada həkimləri aldadıb. O, 1 saylı Şəhər Xəstəxanasında özünü Ruslan Ələkbərov kimi təqdim edib.