BolgeXeber.Com » Analitika » Kərəm Həsənovun dövlət çevrilişinə cəhddə əli olmuş səfirlə hansı əlaqəsi var?

Kərəm Həsənovun dövlət çevrilişinə cəhddə əli olmuş səfirlə hansı əlaqəsi var?

6-06-2014, 12:55
Oxunub: 3 725 Altan Karamanoğluna yaxın şirkətin komitə sədri ilə 76 milyon manatlıq tender oyununun ilginc tərəfləri üzə çıxıb

Azərbaycan məmurlarının bir çox hallarda pula görə atdıqları addımlar bəzən mahiyyəti və məzmumuna görə qəti başa düşülmür. Çünki biznes ortaqlığı, büdcə pullarının silinməsi prosesinə şərik edilmiş bəzilərinin hətta dövlət çevrilişinə cəhddə ya adı keçir, ya da iştirakı təsdiqlənir. Bu istiqamətdə apardığı araşdırmalar zamanı üzə çıxan ilginc məqam isə Əmlak Məsələləri Dövlət Komitəsinin sədri Kərəm Həsənovla bağlıdır.

Əldə edilən məlumatlara görə, Əmlak Məsələləri Dövlət Komitəsinin sədri Kərəm Həsənovun rəhbərliyi ilə bir müddət əvvəl kadastr işlərinin aparılması və xəritəçəkmə məsələləri ilə bağlı elan edilmiş tenderi Türkiyənin “Kutlubey Harita İnşaat Mühendislik Sanayi Ticaret A.Ş” şirkətinə verib. Bu tenderin dəyəri təqribən 76 milyon manat hesab olunur.

Lakin iki ilə qədər davam edən bu «şəriklilik» sonradan münaqişəyə çevrilib. Səbəb isə ortadakı pulların təkbaşına yeyilməsi istəyi olub. Elə buna görə də, Kərəm Həsənovun təşəbbüsü ilə ortalıq qarışıb və Türkiyədəki ortaqlar oyundan çıxarılıb. Tenderi “udmaq” üçün Kadastr Xidmətinin rəisi Ramiz Quliyevlə anlaşan ortaqları oyundan kənarlaşdırılıblar.

Həmin məlumatlarda qeyd olunur ki, “Kutlubey Harita İnşaat Mühendislik Sanayi Ticaret A.Ş” tenderi udmaq üçün xidmət tariflərini tenderə uyğun qruplaşdırıb. Bunun üçün də komitədəki adamlarına yüksək məbləğdə vəsait ödənilib. Bildirilir ki, tender elan edən təşkilat qalibləri özü müəyyənləşdirir, onların xidmətinə və tarifinə diqqət yetirir. Eyni zamanda, o da deyilir ki, bu xidmət və tariflər isə tenderi təşkil edən təşkilatın gizli silahıdır. Yəni, heç kimə göstərilmir. Çünki bu cür sənədlərin istənilən bir şirkətin əlinə keçməsi tenderin pozulması deməkdir.

Araşdırmalar zamanı məlum olub ki, komitənin adından bütün işləri, tenderin udulması prosesini qurumun kadastr direktoru Ramiz Quliyev aparıb. Şirkətin sahibi Altan Çətinqayanı komitənin sədr və müavinləri ilə də o tanış edib. Anlaşmadan sonra, qalib gəlmək üçün Türkiyə şirkəti Əmlak Komitəsinə külli miqdarda pul da verib.

Qeyd edək ki, “Kutlubey Harita İnşaat Mühendislik Sanayi Ticaret” Anonim Şirkətinin Bakı ofisinin rəhbəri Mustafa Çakırdı. Onu bu işdə, tenderin udulmasında yardım edən şəxs isə Türkmən Çayır adlı şəxsdir. Tərəflər arasında bir müddət öncə mübahisə düşəndə Türkmən Çayır mətbuata açıqlama verərək bir sıra mətləblərə aydınlıq gətirmişdi. O bildirmişdi ki, Azərbaycanda bu tenderin udulmasına qədərki bütün mərhələlər haqqında yetərincə bilgisi var. Üstəlik, onu da vurğulamışdı ki, bu layihənin bütün xərclərinə də şərikdir. «Azərbaycanda Kadastr İdarəsinin rəisi Ramiz Quliyev də daxil olmaqla, məsələ ilə bağlı bütün danışıqlar, yazışmalar, rəsmi və qeyri-rəsmi ödəmələrlə bağlı bilgim var. Biz Ramiz bəylə layihə haqqında söhbət başlayan gündən indiyə qədər birlikdə hərəkət etmişik. İndi Ramiz Quliyev və Altan Çətinkaya məni layihədən kənarlaşdırmaq düşüncəsindədirlər. Mən də təbii olaraq bu məsələyə etirazımı bildirirəm».

Həmin vaxt bütün sirləri açacağını bəyan edən Türkmən Çayırı razı salmaq üçün danışıqlar aparılıb və məsələ müsbət həllini tapıb. Çünki ortada Kərəm Həsənovun da adının hallanacağı kimi bir təhdid vardı. Məsələn, sözügedən şəxs öz açıqlamasında vurğulayırdı ki, tenderin udulması üçün konkret kimlərlə danışıqlar aparıldığını, rüşvətin miqdarını, nazir başda olmaqla digər şəxslərə bu rüşvətdən nə qədər pay düşdüyünü açıqlayacağını bəyan edirdi.

Bütün bu proseslərdən sonra dövlət büdcəsindən ayrılan milyonlarla pul Kərəm Həsənovla “Kutlubey Harita İnşaat Mühendislik Sanayi Ticaret” Anonim Şirkətinin rəhbəri Altan Çetinkayanın nəzarətində qalıb. Türkmən Çayır isə Türkiyədə turizm və inşaat sektorunda fəaliyyət göstərməkdədir.

Amma Türkmən Çayırın kimliyi də olduqca maraqlıdır. Məsələ belədir ki, bu şəxs Türkiyənin Azərbaycandakı ilk səfiri, mərhum Altan Karamanoğlunun mühafizə xidmətinin rəhbəri olub. Altan Karamanoğlunun isə 1995-ci ildə OMON hadisələrində adı nəinki hallanırdı, hətta qaldırılmış cinayət işində konkret təşkilatçı kimi çəkilirdi. Bu səbəbdən həmin dövrdə mərhum prezident Heydər Əliyev Türkiyə dövləti ilə danışıqlar apararaq, Karamanoğlunu «persona non qrata» elan etmişdi. Və ardından səfir ölkədən çıxarılmışdı.

OMON hadisələri ilə bağlı qaldırılmış cinayət işində Türkmən Çayırın adının keçib, keçməməsi hələlik bizə məlum deyil. Amma araşdırmalar zamanı belə bir məlumat üzə çıxıb ki, “Kutlubey Harita İnşaat Mühendislik Sanayi Ticaret” Anonim Şirkəti mərhum səfirə yaxınlığı ilə tanınır. Hətta onun bu şirkətdə əsaslı payının olduğu deyilir.

Məsələ ilə bağlı araşdırmamız davam edir. Yazıda adı keçən şəxslərin də mövqeyini dərc etməyə hazırıq. (Tia.az)