BolgeXeber.Com » Analitika » Arzu Rəhimovdan ağlasığmaz addım

Arzu Rəhimovdan ağlasığmaz addım

11-07-2014, 16:15

Oxunub: 3 493

Xanlar Vəliyev xidmət rəisinin bu əməlinə necə reaksiya verəcək?

General-leytenantdan ağlasığmaz addım, köhnə binanı təmir edib yeni tikildiyi adı ilə sənədləşdiriblər.Arzu Rəhimovun Səfərbərlik və Hərbi Xidmətə Çağırış üzrə Dövlət Xidmətində (SHXÇDX) yaratdığı xoşagəlməz ab-hava göz qabağındadır. Respublika Hərbi Komissarlığının ləğv edilməsindən sonra gənclərin hərbi xidmətə çağırılması məsələsində olduqca ciddi problemlər meydana çıxmağa başladı. Vəzifələrinə ötəri münasibət bəsləyən xidmətin yerli şöbə və idarələrinin rəsmiləri xəstə çağırışçıları hərbi xidmətə göndərməklə və sağlam gəncləri nəyinsə müqabilində əsgərlikdən yayındırmaqla bu sahədə özbaşınalığın əsasını qoydular. General-leytenant Arzu Rəhimovun rəisi olduğu xidmət iki illik fəaliyyəti dövründə müsbət işlərlə yadda qala bilmədi.

Məhz bunun nəticəsidir ki, qanunsuz işlərə imza atan generalın adı ölkə mətbuatının gündəmindən düşmək bilmir. Artıq vəziyyət o həddə çatıb ki, bu sistemdə çalışan bir çox zabit generalın fəaliyyətinə açıq-aşkar şəkildə etirazlarını bildirir və işləmək istəmədiklərini dilə gətirirlər. Onların fikrincə, ölkənin keçmiş hərbi komissarı Əliağa Hüseynovun dövründə normal şərait var idi, eyni zamanda şəxsi heyət indiki kimi incidilmirdi. Qeyd edək ki, Səfərbərlik və Hərbi Xidmətə Çağırış üzrə Dövlət Xidməti yaranandan sonra qurumun yerli şöbə və idarələrinin yerləşdiyi binaların əsaslı təmiri, o cümlədən yeni binaların tikintisi məsələsinə də xüsusi diqqət ayrıldı. Belə ki, ölkə rəhbərliyi xidmətin işinin yüksək səviyyəyə çatdırılmasından ötrü büdcədən lazım olan qədər vəsait ayırır. Təəssüf hissi ilə qeyd etmək istəyirik ki, Arzu Rəhimov prezidentin etimadından istifadə edərək büdcədən ayrılan vəsaitləri başqa məqsədlərə sərf edir. Xatırladaq ki, qəzetimizin əvvəlki saylarında xidmətin Sumqayıt şəhər idarəsinin təmiri və Nizami rayon idarəsinin yeni binasının tikintisi zamanı dəhşətli maliyyə yeyintilərinə yol verilməsi barədə yazılar dərc etmişdik. Buna baxmayaraq, general-leytenant həmin məqalələrə heç bir reaksiya vermədi. Hörmətli xidmət rəisi bütün bunlara susmaqla münasibət bildirdi. Ki, susmaq da razılıq əlaməti kimi başa düşülür. Axı faktın qarşısında nə demək olar? Arzu Rəhimov nə qədər arqument gətirsə də belə fakt faktlığında qalır. Və çoxları xidmət rəisinin hansı qanunsuzluqlara zəmin yaratdığını yaxşı bilir. Ümumiyyətlə, Dövlət Miqrasiya Xidmətinin keçmiş rəisi ilə bağlı xəbərlər səngimək bilmir. SHXÇDX rəhbəri ilə bağlı yeni iddialar ortaya atılıb. Mötəbər mənbələrdən aldığımız məlumatlara görə, xidmətin Ağsu rayon şöbəsinin bir neçə ay öncə açılışı edilən binasının «tikintisi» zamanı kütləvi yeyintiyə yol verilib. Daha doğrusu, həmin binanın tikintisi sadəcə olaraq, göstərilib. Sual edirik: görəsən, belə işlərlə məşğul olan şəxs kimə arxayındır? Axı bu pulu ölkə başçısı cənab prezidentimiz ayırır. Hara baxır Xanlar Vəliyev, nədir bu yaranan susqunluq? Kimə verilir bu pullar ki, bunun da nəticəsində dövlət büdcəsindən ayrılan 1 700 000 manat vəsait göyə sovrulub: «Bu ilin fevral ayının 12-də Səfərbərlik və Hərbi Xidmətə Çağırış üzrə Dövlət Xidmətinin Ağsu rayon şöbəsi üçün yeni tikilən inzibati binanın açılış mərasimi keçirildi. Mərasimdə Səfərbərlik və Hərbi Xidmətə Çağırış üzrə Dövlət Xidmətinin rəisi, general-leytenant Arzu Rəhimov, Ağsu rayon İcra Hakimiyyətinin başçısı Ənvər Seyidəliyev çıxış etdilər. Arzu müəllim açılış mərasimində söylədiyi çıxışı zamanı prezident İlham Əliyevin 2012-ci ilin fevralın 13-də "Hərbi vəzifə və hərbi xidmət haqqında” Qanunun tətbiqi barədə imzaladığı fərmanla şəhər, rayon hərbi komissarlıqları ləğv edilərək onların əsasında Azərbaycan Respublikasının Səfərbərlik və Hərbi Xidmətə Çağırış üzrə Dövlət Xidmətinin yaradılmasının bu sahədə çalışan hər kəsə öz məsuliyyətini daha dərindən dərk etməyə imkan verdiyini dedi. O bildirdi ki, xidmətin yerli şöbələri üçün yeni inzibati binalar tikilir və ya mövcud binalar əsaslı təmir edilir. Xidmətin yerli şöbəsi üçün ilk inzibati bina Ağsu rayonunda tikilib. Ümumi sahəsi 2500 kvadratmetr olan üç mərtəbəli binada işçilərin normal fəaliyyəti üçün hər cür şərait yaradılıb. Binada 21 iş otağı, o cümlədən iclas zalı, çağırışçılarla iş bölməsi, səfərbərliyə hazırlıq və səfərbərlik bölməsi, qeydiyyat otağı, növbətçi, məxfi hissə, tibbi komissiya üçün 12 otaq fəaliyyət göstərir. Bu, Arzu Rəhimovun söylədiyi fikirlərdir. Əslində isə, xidmətin Ağsu rayon şöbəsi üçün yeni bina tikilməyib. Generalla icra başçısının açılışını etdiyi bina Dövlət Miqrasiya Xidmətinin Ağsu rayon şöbəsinə məxsus olub. Daha sonra şöbə ordan köçürüldüyündən bina boş qalıb. Arzu Rəhimov əlinə əlverişli məqamın düşdüyünü görüb həmin köhnə binanı təmir edib sənəd üzərində yeni bina tikdirdiyini göstərməklə büdcədən ayrılan 1 700 000 manat vəsaitin məsələsini həll edib. Çünki buna başqa ad qoymaq mümkün deyil. General aidiyyəti dövlət qurumlarından qorxub-çəkinmədən külli miqdarda vəsaiti şəxsi büdcəsinə yönləndirib. Yenə deyirəm xidmətin Ağsu rayon şöbəsi üçün heç bir yeni bina tikilməyib. Köhnə binanı təmir edib sənəd üzərində guya yeni tikildiyini qeyd etməklə külli miqdarda büdcə vəsaitini mənimsəyiblər.Bu konkret faktdır».

Buna nə sözünüz var, yoldaş general? Ölkə rəhbərliyi sizə və rəhbəri olduğunuz quruma etimad göstərdiyi halda, niyə belə işlərlə məşğul olursunuz? Axı yalan danışmaq, həqiqətə uyğun olmayan fikirlər bildirmək nəyə və kimə lazımdır?

Əgər ölkə rəhbərliyi məsləhət bilsəydi, Ağsuda hansısa köhnə binanı təmir edib xidmətin yerli şöbəsinin istifadəsinə vermək üçün göstəriş verərdi. Məgər, siz bunu bilmirsiniz? Bilmirdiniz ki, tutduğunuz qanunsuz əməlin üstü nə vaxtsa açılacaq. Amma sizi qınamıram. Xidmət yaranandan indiyə kimi imza atdığınız qanun pozuntularını Hərbi Prokurorluğun əməkdaşları yoxlamayıblar. Və buna görə də arxayın düşmüsünüz. «Gündəlik Bakı» qəzeti olaraq bu günə kimi SHXÇDX-də mövcud olan neqativ hallarla bağlı saysız-hesabsız faktları ortaya qoymuşuq. Buna baxmayaraq, Hərbi Prokurorluğun nümayəndələri Arzu Rəhimovun fəaliyyətini araşdırmırlar. Görəsən, niyə? Hərbi Prokurorluğun bu işdə marağı nədir ki, dövlət büdcəsinə ziyan vurmaqdan çəkinməyən generalın fəaliyyətini yoxlamır? Hörmətli Xanlar Vəliyev bilməlidir ki, bu gün Arzu Rəhimovun törətdiyi qanunsuzluqlara görə sabah onun da başı ağrıya bilər. Yəni yuxarı dairələrdə təmsil olunan şəxslər ona deyərlər ki, vaxtında bilirdin bu adam filan işlərlə məşğul olur niyə tədbir görmürdün. Odur ki, Xanlar müəllim xidmətin Ağsu rayon şöbəsinin «tikintisi» zamanı yeyintiyə məruz qalan 1 700 000 manatın izinə düşməli, həmçinin Arzu Rəhimovun fəaliyyətindəki digər nöqsanları araşdırmalıdır. Yenə təkrar edirik, bilmirdinizsə, deyirik bilin. Ümumiyyətlə, hərbi prokurorun bu məsələyə necə reaksiya verəcəyi çox maraqlıdır. Əminliklə söyləyə bilərik ki, Xanlar Vəliyevin təşkil etdirəcəyi yoxlamalardan sonra Arzu Rəhimovun həbsi məsələsi gündəmə gələ bilər. Gələn saylarımızda xidmətin Qəbələ, Füzuli rayon şöbələri və Nizami rayon idarəsi üçün yeni tikilən binalardakı maliyyə əməliyyatlarından söhbət açacağıq. Həmçinin Arzu Rəhimovun Azərbaycan Dövlət İqtisad Universitetində təhsil alan və oliqarxlara məxsus həyat yaşamağı xoşlayan oğlu Murad Rəhimovun paytaxtın hansı elit məkanlarında və kimlərlə istirahət etməsini, yol polisi əməkdaşlarına hansı formada cavab verməsini də yazacağıq. Bizi izləyin.

Qarşı tərəfin də cavab haqqını tanıyırıq.

P.S. Növbəti sayımızda oxuyacaqsınız: - Hansı generalın Fatmayı qəsəbəsində bağ evi mövcuddur? Həmin bağ evindəki iş otağının fotoları və burada gedən sövdələşmələrin, ağlasığmaz proseslərin məzmunu bizdə.

Ağsuda təhvil verilən binanın təmirinə Anar İsmayılov tərəfindən verilən 35 min manat + 76 min manat + 160 min manatın qaimələrini kim yazacaq? 1 milyon 700 min manat - 400 min manat guya binanın tikintisi üçün, 1 milyon 279 min manat təmir-tikinti, mebellər üçün. Bakı şəhərində həkim komissiyası üçün icarəyə götürülən klinikaya nə qədər icarə haqqı verilir? Görəsən, Azərbaycan hökumətinin Səfərbərlik və Hərbi Xidmətə Çağırış üzrə Dövlət Xidmətinə ayırdığı vəsaitlərlə həkim komissiyası üçün bina tikmək mümkün deyilmi?

«Şrek» ləqəbilə tanınan şəxs kimdir? Və ona bu ləqəbi kim verib? İsmayıllıdan Kürdəmirə transfer edilən şəxs kimə villa tikdirir? Rəsul Quliyevi xidməti uyğunsuzluğundan sonra nəyin müqabilində vəzifəyə gətirdilər? Mayın 31-də həbsdən buraxılan sürücünü Arzu Rəhimov necə qəbul edib? Bu və ya digər qandonduran faktları təfərrüatları ilə yüz minlərlə oxucularımız izləyəcək. Kim kimə şər, böhtan atır Arzu Rəhimov - biz sizə, yoxsa..? Bütün təfsilatı ilə danışılan faktlar yaxın günlərdə tərəfimizdən yuxarılara təqdim olunacaq.gundelik-baku

Çox Oxunanlar