BolgeXeber.Com » Analitika » Ekologiya və Təbii Sərvətlər Nazirliyi Sumqayıtda ağacların soyqırımı ilə bağlı yazımızdan sonra hərəkətə keçdi

Ekologiya və Təbii Sərvətlər Nazirliyi Sumqayıtda ağacların soyqırımı ilə bağlı yazımızdan sonra hərəkətə keçdi

15-10-2013, 08:25

Oxunub: 5 026

Ekologiya və Təbii Sərvətlər Nazirliyi Sumqayıtda ağacların soyqırımı ilə bağlı yazımıza reaksiya verdi

Sumqayıtın icra başçısı cəzalancaqmı?
Xatırladaq ki,dünən Bolgexeber.com-da “Sumqayıtda Nəsimi parkında çoxillilik şam ağacları benzin vurularaq yandırılıb-RƏZALƏT”adlı araşdırma yazı dərc olunmuşdur və həmin yazı bizə istinadla çoxsaylı mətbuat orqanlarında yayılmışdır. Bolgexeber.com bildirir ki,elə yazı çıxan gün-dünən Ekologiya və Təbii Sərvətlər Nazirliyi (ETSN)yazımıza reaksiya vermişdir və məqalədə əks olunmuş faktı təsdiqləmişdir. ETSN-dən Trend-ə verilən məlumata görə,Sumqayıt şəhərində, Mehdi Hüseynzadə adına stadionun arxasında ağacların yandırılıb sonradan kəsilməsi ilə bağlı mətbuatda yayılmış məlumat Ekologiya və Təbii Sərvətlər Nazirliyinin (ETSN) müvafiq qurumlarının əməkdaşları tərəfindən dərhal yerindəcə araşdırılıb.
Nazirliyin əməkdaşları tərəfindən əraziyə baxış keçirilərkən təxminən 800 kvadratmetr sahənin yandığı və burada 150 ədəd şam və sərv ağacının yandıqdan sonra kəsildiyi müəyyən edilib.
Araşdırma zamanı məlum olub ki, sözügedən ərazidə yanğın hadisəsi bir müddət əvvəl baş verib və FHN-in ərazi üzrə Dövlət Yanğından Mühafizə İdarəsinin əməkdaşları tərəfindən söndürülüb.
Yanğının baş vermə səbəbi və ağacların kəsilməsində təqsirkar şəxslərin müəyyən edilməsi məqsədilə ETSN tərəfindən hüquq-mühafizə orqanlarına rəsmi məktub göndərilib.
Sumqayıt şəhər İcra Hakimiyyətindən alınan məlumata görə, sözügedən əraziyə hər hansı bir obyektin tikintisi üçün icazə sənədi verilməyib və gələcəkdə də belə bir sənədin verilməsi nəzərdə tutulmayıb. Lakin yerli sakinlərdən verilən məlumatlara əsasən, ağacların kəsildiyi yer naməlum iş adamının marağındadır. ETSN bu ehtimala əsaslanaraq sözügedən ərazini mühafizəyə götürüb və həmin yer tör-töküntülərdən təmizlənərək orada nazirlik tərəfindən ağac əkilir.
Məsələni diqqətdə saxlayacayıq.
Köhnə Sumqayıtlı
Bolgexeber.com ***
14.10.13

Bolgexeber.com bildirir ki, bir neçə gün bundan əvvəl Sumqayıtın Nəsimi parkında, Mehdi Hüseynzadə adına stadionun arxasındakı şamlıqda 50-dən çox çoxillik şam ağacları üstünə benzin tökülərək yandırılıb və sonra kəsilib.Mənbə bildirir ki, ağaclar soyqırıma ,onların kəsildiyi yerdə restoran tikiləcəyi səbəbindən məruz qalıb. Bildiyiniz kimi mərhum prezident Heydər Əliyev demişdir ki, “bir ağacı kəsən sanki mənim bir qolumu kəsir”.Prezident İlham Əliyev də bir müddət əvvəl ağackəsənlərlə şəxsən özü məşğul olacağı barədə sərt bəyanat verib.

Ancaq Sumqayıtda məmurlar nə Heydər Əliyevin, nə də İlham Əliyevin bu sözlərinə məhəl qoymurlar.Xatırladaq ki, Sumqayıtda yaşıllıqların kütləvi surətdə vəhşicəsinə qırılması dəfələrlə baş verib.Hətta bir müddət əvvəl, aprelin 13-də Azərbaycan prospektində yerləşən Cəfər Cabbarlı adına klubun qarşısındakı parkda 100-ə yaxın yaşı 40-50 il olan zeytun və şam ağacları kəsilmişdir ki,ağacların bu soyqırımı bir neçə gün mətbuatın gündəmindən düşməmişdir.

Hətta icra başçısı Eldar Əzizov bu hadisə geniş mətbuata yol açıb böyüyəndən sonra demişdir ki, guya icra hakimiyyətinin bundan xəbəri olmayıb, bəs Rusyada yaşayan hansısa biznesmen bu işi gizlincə gördürüb. Ancaq sağlam məntiqlə düşünəndə belə qənaətə gəlmək olar ki, ola bilməz ki, o hadisədən də , bir neçə gün bundan əvvəl baş verən yaşıl soyqırımdan da icra hakimiyyətinin və hüquq -müfahizə orqanlarının xəbəri olmasın. Birinci ona görə ki, Sumqayıt balaca şəhərdir və şəhərin bu başında nəsə ciddi şey baş verəndə, şəhərin o biri başında bu haqda artıq hamı mətbuatsız da xəbər tutur. Bundan başqa məlumdur ki, heç bir iş adamı şəhərin məsul adamlarının “xeyir duası”olmadan daşı -daş üstə qoya bilməz.

Mənbə bildirir ki, sadəcə şəhərdə satılası “xodovoy” boş yer artıq qalmadığından icra hakimiyyətində indi də girişiblər ağına-bozuna baxmadan ağacları bir ucdan qırmağa və onların yerini satmağa.Həmin yerləri satan məmurlar iş adamlarına özləri deyirlər ki, “ağacları gizlicə, qaranlıqda, tezbazar kəsin ki, mətbuat xəbər tutmasın”. Həmçinin həmin sahibkarlara bildirilir ki, Ekologiya və Təbii Sərvətlər Nazirliyinə özləri cavab versinlər və əgər məsələ böyüyərsə günah da ancaq onlarda görüləcək.

Ancaq bununla belə Sumqayıtda həmin yerlərin qiyməti 100 minlərlə ölçülür.Doğrudan da ağaclar özbaşına kəsilə bilməz. Çünki ən azından ağacı kəsən sahibkar bilir ki, onsuz da o həmin yerdə tikinti aparanda icra hakimiyyəti qarşısında və başqa dövlət qurumları qarşısında buna cavab verməli olacaq. Ümumiyyətlə mənbə bildirir ki, Sumqayıtda torpaqların satılması ilə bağlı məsələlərin başında birbaşa icra hakimiyyəti durur.Qeyd edək ki,ağacların soyqırımı mütəmadi olaraq baş verir.

Yol kənarındakı bütün ağacları kəsib boş yerləri ayrı-ayrı sahibkarlara satıblar və həmişə də aidiyyatı məmurlar cəzasız qalırlar. Eldar Əzizov da əvvəlki icra başçıları kimi .hətta onlardan daha da intensiv bu ənənəni davam etdirdiyindən şəhərdə yaşıllıq xeyli azalıb.Hətta yolların ortasında olan yerlərdə belə şəhərə gözəllik verən,şəhərin ekologiyasını qoruyan ağaclar qırılıb,boş yerlər isə qanunsuz olaraq milyonlarla manata ayrı-ayrı şəxslərə satılıb ki,həmin yolların ortasında indi şadlıq evləri,ticarət mərkəzləri tikilib.Biz əlbəttə tikintiyə qarşı,sahibkarlığın inkişafına etiraz etmirik,ancaq bunun şəhərin ziyanı hesabına edilməsinə qarşıyıq.

Çünki o ağacların dəyəri ,onların kəsilməsindən sonra əmələ gələn boş yerin qiymətindən pul ilə ölçülməz qədər dəyərlidir. Fikrimizcə şəhərin hər bir ağacı bir çox yerli məmurlardan daha dəyərlidir,çünki onlar ikincilərdən fərqli olaraq özlərinə yox,son nəfəsinədək şəhərə xidmət edirlər və şəhəri daha da gözəlləşdirib,onu təmizləyirlər. Dediyimiz məmurlar isə gəldi-gedərdirlər və onları şəhər yox,ancaq öz qazancları maraqlandırır.Onlardan fərqli olaraq isə mən Sumqayıtımı çox istəyirəm…

Ümid edirik ki, bu məsələ ilə bağlı Ekologiya və Təbii Sərvətlər Nazirliyi tez bir zamanda maraqlanacaq və şəhərə ,onun ağaclarına qarşı vəhşicəsinə münasibət bəsləyənləri təkcə cərimələməklə kifayətlənməyəcək.
Köhnə Sumqayıtlı
Bolgexeber.com

Çox Oxunanlar