BolgeXeber.Com » Ölkə » 170 saylı məktəbdə bayram pulu yığılır - Şikayət var...

170 saylı məktəbdə bayram pulu yığılır - Şikayət var...

19-03-2015, 18:34
170 saylı məktəbdə bayram pulu yığılır - Şikayət var...Əlavə dərs saatlarının təyinatı və digər bu kimi bəhanələrlə il ərzndə hər bir müəllimin ödədiyi məbləğ təxminən 5-6 min manata çatdırılır

Cəmiyyətimizin rüşvət və korrupsiyadan təmizlənməsi ilk növbədə bu təzahürlərin ölkəmiz üçün necə bir bəla olduğunu aydın dərk edən və eyni zamanda özləri bu mərəzlərə hələ tutulmayan yeni, gənc nəslin formalaşmasını tələb edir. Əlbəttə ki, gənc nəslin təlim-tərbiyəsində, uşaqlarımızın gələcəkdə layiqli vətəndaş kimi cəmiyyətimizdə yer tutmalarında orta-ümumtəhsil məktəblərinin rolu çox önəmlidir və danılmazdır. Belə olduğu halda isə bu tədris müəssisələrində şagirdlərdə hələ uşaq yaşlarından rüşvətə alışqanlıq yaradılması, korrupsiya mərəzinin onların şüuruna və qanına yeridilməsi, cəmiyyətimiz üçun məsum bir gəncin narkotik maddələrə alışdırılması qədər və bəlkə də daha çox təhlükəlidir. Təəssüflər olsun ki, bu gün bir çox orta məktəblərdə “fond pulu”, “təmir pulu”, “məktəbin təsərrüfatına könüllü yardım” və sairə bu kimi gülünc adlar altında hələ də rüşvət yığımı davam edir. Redaksiyamıza daxil olan məlumatlarda da vurğulanır ki, bu kimi yığımların xüsusi intensivliyi ilə seçilən tədris müəssisələrindən biri də Bakının Sabunçu rayonunda yerləşən 170 saylı orta məktəbdir.

Qəzetimizin ötən saylarında biz 170 saylı məktəbdə müşahidə olunan bir çox neqativ hallara dair aldığımız məlumatlar əsasında hazırlanmış tənqidi materiallar dərc etmişik.Cəmiyyətimizin heç bir üzvü üçün sirr deyil ki, ölkədə fəaliyyət göstərən əksər orta məktəblərin direktorları rəhbərlik etdikləri müəssisələri tam avtoritar rejimdə idarə edərək özlərinin şəxsi kommersiya obyektləri səviyyəsinə çatdırmışlar. Bu baxımdan 170 saylı orta məktəbdə cərəyan edən hadisələr də bu tip müəssisələrdə yer almış özbaşnalıqlar və ciddi qanun pozuntuları haqda deyilənləri bir daha təsdiq edir. Ötən saylarımızda dərc etdiyimiz materiallarda da biz göstərmişdik ki, Nuranə Mirzəyevanın rəhbərlik etdiyi bu məktəbdə baş verən qanunsuzluqlar, şagird və valideynlərin hüquqlarının mütəmadi olaraq kobud şəkildə pozulması faktları bu müəssisənin fəaliyyətinin ayrılmaz hissəsinə çevrilmişdir. Redaksiyamıza daxil olan məlumatlarda da bildirilir ki, direktor bu məktəbə qəbul edilən hər uşağa görə valideynlərdən 200-250 manat məbləğində pul tələb edir. Əgər bu ilkin mərhələdə valideynlər hər hansı narazılıq və ya güzəşt tələbləri irəli sürmürlərsə, deməli gələcəkdə də onların bütün “ödənişləri” dinməzcə həyata keçirəcəklərini gözləmək olar. Sonrakı yığımlara gəlincə isə, mənbələrin iddialarına görə 170 saylı məktəbin ibtidai sinif şagirdləri üçün stabil olaraq 5 manat məbləğində aylıq yığım müəyyən edilmişdir.

Yuxarı siniflər üçün bu məbləğ artaraq 8-10 manat civarında müəyyənləşir. Həmçinin burada məktəbin müəllim heyəti üçün də müəyyən ödənişlər nəzərdə tutulmuşdur. Əlavə dərs saatlarının təyinatı və digər bu kimi bəhanələrlə il ərzndə hər bir müəllimin ödədiyi məbləğ təxminən 5-6 min manata çatdırılır.Qeyd olunduğu kimi, bu gün ölkənin təhsil sistemində müşahidə olunan geriləmələr orta təhsil sistemində yer almış bir çox özbaşınalıqlarda da öz təzahürünü aydın tapır. Təhsil sistemində dövlət tərəfindən həyata keçirilən əsaslı islahatlar müəyyən irəliləyişlərə zəmin yaratsa da, cəmiyyətdə gözlənilən nəticələr hələ də müşahidə olunmur. Təbii ki, bu vəziyyət heç də islahatlar paketinin effektsizliyi ilə şərtlənmir. Əksinə, bu istiqamətdə atılması nəzərdə tutulan addımlar az müddət ərzində Azərbaycanın təhsil sistemini ən qabaqcıl dünya standartlarına cavab verəcək səviyyəyə çatdırmağa sərrast hesablanmışdır. Lakin müəyyən subyektiv səbəblər bu prosesləri ləngidir. Eyni zamanda da, islahatların geniş tətbiqini əngəlləyən qüvvələr bununla məhz dövlət tədbirlərinin zəifliyini vurğulamaq istəyirlər. 170 saylı məktəbin fəaliyyətində müşahidə olunan nöqsanlar da məhz belə qüvvələrin müdaxiləsinin bariz nümunəsidir.Məktəbdə 8 martda kimlərin pul yığıb direktora çatdırmaları barədə redaksiyamıza yeni məlumatlar daxil olmuşdur. Eyni zamanda Novruz bayramında məktəbdə və rayonda keçiriləcək tədbirlər adıyla da pul yığılır. Ona görə də daha ətraflı növbəti sayımızda oxuya biləcəksiniz. bizimdovr.az