BolgeXeber.Com » Müsahibə-Reportaj » Binəqədi prokuroru cinayətkarları niyə həbs etmir?

Binəqədi prokuroru cinayətkarları niyə həbs etmir?

2-07-2011, 01:15

Oxunub: 4 473

Fariz Quliyev: «Artıq bizdə belə bir əminlik yaranmağa başlayır ki, qardaşım oğlunu qəsdən öldürüblər»

Xəbər verdiyimiz kimi, bir müddət əvvəl Qarabağ müharibəsi əlili Faiq Quliyevin oğlu 9 yaşlı Firdovsi Quliyev Binəqədi rayonu ərazisində iki avtobusun arasında qalaraq dünyasını dəyişib. Bolgexeber.com bildirir ki, hadisənin baş verməsində günahkar olan avtobus sürücüləri isə bu gün azadlıqdadır. Lakin cinayətin baş verməsinə rəğmən, onların azadlıqda olmasının dəqiq səbəbləri bəlli deyil.

Dünən Bolgexeber.com-un əməkdaşları ilə danışan 9 yaşlı mərhumun əmisi Fariz Quliyev bildirib ki, cinayət işi qaldırılsa da, istintaq hərəkətlərinin aparılmaması onlarda müəmmalı fikirlər yaradıb. O bildirib ki, məsələni aydınlaşdırmaq məqsədi ilə ötən gün Bakı Şəhər Baş Polis İdarəsinin (BŞBPİ) rəisi Rafiq Abbasovla görüşüb. Görüş zamanı R.Abbasov Binəqədi rayon Polis İdarəsinə tapşırıq verərək, ekspertizasız sürücülərin həbs edilməsinin qanuni olduğunu bildirib.

F.Quliyev deyib ki, bu tapşırığın ardından Binəqədi rayonunda olub və yerli polislə məsələ ilə bağlı maraqlanıb. Lakin məlum olub ki, Binəqədi rayon prokuroru Mirələkbər Seyidov sürücülərin həbs olunması məsələsinə əhəmiyyət vermir. «Mənə dedilər ki, Binəqədi rayon prokurorluğu sürücülərin həbs edilməsinə imkan vermir. Hətta maneçilik törədir. Onun burada hansı maraqları olduğunu anlaya bilmirik. Axı bir prokurorun balaca uşağın ölümündə günahkar bilinən və törətdiyi cinayət əməli təsbit olunan sürücüləri himayə etməsini necə başa düşmək olar? Onun bu işdə hansı maraqları ola bilər? Artıq bizdə belə bir əminlik yaranmağa başlayır ki, həqiqətən də Qarabağ müharibəsi əlininin uşağını qəsdən öldürüblər. Əks təqdirdə, qanunun tələbləri yerinə yetirilərdi».

Mərhumun əmisi onu da deyib ki, onlar məsələni bu şəkildə qoymaq niyyətində deyillər. F.Quliyev bildirib ki, cinayətkarların tapılaraq, cəzalandırılmasını təmin etmək üçün sonadək mübarizə aparacaqlar. «Bizim tələbimiz odur ki, cinayəti törətmiş şəxslər azadlıqda gəzməməlidir və qanun qarşısında cavab verməlidirlər. Bunun üçün bütün dövlət instansiyalarına müraciət edərək, ədalətin bərpası üçün çalışacağıq».

Çox Oxunanlar