BolgeXeber.Com » Xəbərlər » Azərbaycan məmurları Londondakı mülklərini itirə bilər

Azərbaycan məmurları Londondakı mülklərini itirə bilər

30-09-2015, 11:51

Oxunub: 2 788 Azərbaycan məmurları Londondakı mülklərini itirə bilər

Londonda dəbdəbəli mülk və mənzillər almağa xüsusi maraq göstərən Azərbaycan məmurları və oliqarxları Britaniya paytaxtında yeni problemlə üzləşə bilər

Virtualaz.org saytı Britaniya KİV-lərinə istinadən xəbər verir ki, Londonun Kensinqton və Çelsi rayonlarının yerli hakimiyyət orqanlarının yeni mülklərin tikintisi, köhnə tikililərin bərpası və yenidənqurulması qaydalarına dəyişiklik etməyə hazırlaşması burada mülk sahibi olan və ya olmaq istəyən şəxslərin qarşısında yeni baryerlər qoya bilər. Məsələ burasındadır ki, yeni qaydalara görə, həmin mülklərin sahiblərinin bu evlərdə daimi yaşaması məcburi şərt olacaq.

“London rayonlarının yerli hakimiyyətləri tərəfindən hazırlanan hesabatda deyilir ki, Londondakı “Herrods” univermaqından cənub tərəfdəki küçələr “mülk al, çıx get” sxeminin müntəzəm tətbiq olunduğu ərazilərə çevrilib. Milyarderlər məhz bu ərazilərdəki daşınmaz əmlaka xeyli sərmayə yatırırlar. Bundan sonra isə evlərinin işığını söndürüb, qapılarını bağlayıb çıxıb gedirlər. Boş qalan bu evlər isə onlara ildən-ilə əlavə pullar qazandırır. Belə ki, bu ərazidə daşınmaz əmlak durmadan bahalaşır” - deyə Britaniya mətbuatı yazır.

Londonun bir çox ən bahalı və dəbdəbəli küçələrində hər 4 evin birində yaşayış var. Burada, məsələn, “Herrods” univermağı ilə üzbəüz küçədəki mənzillərin qiyməti isə 20 milyon funt-sterlinqdən başlayır. Həmin ev və mənzillərin sahibləri əsasən əcnəbilərdir.

Yada salaq ki, Bakıda yaşayan bir çox məşhur azərbaycanlılar da Londonun bu rayonunda daşınmaz əmlak alıblar.

Londonun dəbdəbəli evlər olan rayonlarının yerli hakimiyyətləri isə bu tendensiyanın qarşısını almağa çalışırlar. Onlar “mülk al, çıx get” sxeminin dəyişdirilməsinin vacib olduğunu bildirir. Çıxış yollarından biri kimi isə boş saxlanan ev və mənzillərə görə vergi yükünün artırılması göstərilir. Belə mülklərin sahiblərinə qarşı hətta məhkəmə iddialarının qaldırılması variantı ətrafında da müzakirələr gedir.
Bolgexeber.com

Çox Oxunanlar