BolgeXeber.Com » Xəbərlər » Dövlət Komitəsi: Ramazan təqvimi ilə bağlı pozuntular araşdırılacaq

Dövlət Komitəsi: Ramazan təqvimi ilə bağlı pozuntular araşdırılacaq

7-07-2016, 12:57

Oxunub: 3 058

Ramazan təqvimi ilə bağlı rəsmi din xadimləri tərəfindən pozuntuya yol verilməsi aşkar edilməyib

“Ramazan təqvimi ilə bağlı aşkarlanmış bəzi pozuntularla əlaqədar aidiyyatı dövlət qurumları tərəfindən araşdırmalar aparılıb onlara müvafiq qiymət, hətta lazım gəldikdə hüquqi qiymət veriləcək”.

Bunu Dini Qurumlarla iş üzrə Dövlət Komitəsinin sədr müavini Səyavuş Heydərov deyib.

S.Heydərov bildirib ki, Ramazan təqvimi ilə bağlı rəsmi din xadimləri tərəfindən pozuntuya yol verilməsi aşkar edilməyib: “Bu pozuntular ayrı-ayrı şəxslər tərəfindən qrup halında bir neçə yerlərdə baş verib. Həmin şəxslər məsciddən kənar birlikdə bayram namazı qılıblar və Qafqaz Müsəlmanları İdarəsi tərəfindən müəyyən olunmuş təqvimdən kənara çıxaraq başqa ölkələrin müəyyənləşdirdiyi təqvimə uyğun olaraq namaz qılıblar. Bu hal çox az miqdardadır. Ötən il ilə müqayisədə bu cür pozuntu hallarının sayı xeyli azalıb”.

S.Heydərov qeyd edib ki, bu cür pozuntu halları bir neçə rayonda aşkarlanıb və onların da qarşısı alınıb: “Həmin şəxslərlə müvafiq söhbətlər aparılıb. Bu şəxslər sözügedən halı anlaşılmazlıq kimi izah ediblər. Ancaq əlbəttə, onların dediklərinə inanmaq düzgün olmazdı, burada o insanların yad ideologiyaların təsirlərinə məruz qalmaları görünür. Hər ölkənin öz coğrafi mövqeyi, günün çıxması, batması vaxtı var. Niyə görə sən Azərbaycanda ola-ola gedib başqa bir ölkənin təqviminə uyğun ibadət edirsən?! Bu nə deməkdir?! Bu insanlar belə hərəkətləri ilə bizim vəhdətimizə ziyan vururlar. Bu gün bizim vəhdətimiz, tolerantlığımız dünyaya nümunədir. Nə qədər bu cür aşkarlanmış pozuntu faktları var, onların hər biri aidiyyatı qurumlar ilə birlikdə araşdırılacaq, əlbəttə, yeri gəlsə hüquqi qiymət veriləcək. Onlarla bağlı müəyyən tədbirlərin görülməsi planlaşdırılır”.

Çox Oxunanlar

Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00

[email protected]