BolgeXeber.Com » Xəbərlər » “Niyə haqqım tapdalanır, niyə qərarlar icra edilmir?” - ŞİKAYƏT

“Niyə haqqım tapdalanır, niyə qərarlar icra edilmir?” - ŞİKAYƏT

12-06-2017, 12:39

Oxunub: 3 081 “ “Niyə haqqım tapdalanır, niyə qərarlar icra edilmir?” - ŞİKAYƏT

İcra məmuru qanunu kobud şəkildə pozdu”

İmişli rayon sakini Mahmud Qasımov “Cümhuriyət” qəzetinə müraciət edərək 18 ildir ki, şikayətinə obyektiv baxılmamasından gileylənib.İllərdir ki, məhkəmə qapılarında sürünən 79 yaşlı İmişli sakini ikiillik əmək haqqını tam olaraq ala bilmir.Bunun üçün müraciət etmədiyi, şikayətlənmədiyi instansiya qalmayıb.Amma problemi hələ də həll olunmamış qalır.Şikayəti ilə bağlı çıxarılan qərarlar isə icra edilmir.

“Niyə haqqım tapdalanır, niyə qərarlar icra edilmir?”

Mahmud Qasımovun sözlərinə görə, Kənd Təsərrüfatı Nazirliyinin Aqrar Sənayə Kombinatında dövlət texniki nəzarət müfəttişi vəzifəsində çalışıb. İşlədiyi iki il müddətində, yəni 1997-1999-cu illərdə aylıq əmək haqqını ala bilməyib:

“Əmək kitabçam olub, gündəlik işə davamiyyətə görə tərtib olunan cədvələ imza atmışam, rayon rəhbərlərinin Kənd Təsərrüfatı Nazirliyinin tapşırıqlarını yerinə yetirmişəm. Öz işimin öhdəsindən layiqincə gəlmişəm. 02.11. 97-ci ildən 11.11.99-cu ilə qədər, yəni idarə ləğv olunana qədər işləmişəm. Həmin iki ildə Kənd Təsərrüfatı Nazirliyinə illik hesabat təqdim etmişəm.Lakin bunların heç birini nəzərə almadılar. Bəlli olmayan səbəblərdən çalışdığım iki il müddətində əmək haqqımı vermədilər. Orada çalışan 15 nəfər mütəxəssisdən 14-ü aylıq əmək haqqını aldı, yalnız mənə verilmədi.Dəfələrlə haqqımı tələb etsəm də, buna məhəl qoyulmadı. Nə Kənd Təsərrüfatı Nazirliyi, nə də Aqrar Sənaye Kombinatının rəhbərliyi səsimi eşitdi. İndiyədək hüquqlarımın bərpa edilməsi üçün mübarizə aparıram.Amma qanun pozuntularına, saxtakarlıqlara qarşı tədbir görən yoxdur. Ağsaqqal adamı bu qədər incitmək olmaz axı... Niyə haqqım tapdalanır, niyə qərarlar icra edilmir?”.

Şikayətçi deyib ki, əməkhaqqını ala bilmədiyi üçün məcbur qalıb Səbail Rayon Məhkəməsinə müraciət edib: “Səbail Rayon Məhkəməsinin hakimi Ziya Əliyev 2000-ci ildə qərar qəbul etdi ki, əməkhaqqım 07.01.97-ci ildən 04. 08.98-ci ilə kimi Kənd Təsərrüfatı Nazirliyindən tutulub mənə ödənilsin.Həmin qərardan narazı olaraq Bakı Şəhər Məhkəməsinə müraciət etdim.Çünki Ziya Əliyev birtərəfli mövqe tutaraq şikayətimi tam əhatə etməyib. Kənd Təsərrüfatı Nazirliyi, Səbail Rayon hakimi və “qəhrəman məmurlar”ın səhlənkarlığı, qanunu pozmaları ucbatından bu oyun başıma gətirilib. Qeyd edim ki, 14.08.98-ci ildə Kənd Təsərrüfatı Nazirliyi İmişli Aqrar Sənaye Kombinatının baş direktorundan əlavə bizi həmin vəzifəyə bir daha təyin etmişdi. Milliyyətcə rus olan Bakı Şəhər Məhkəməsinin hakimi Tatyana Jedkova 2000-ci ilin 27 yanvarında qətnamə çıxardı ki, mənim əməkhaqqım 02.01.97-ci ildən 11.01.99-cu ilə qədər Kənd Təsərrüfatı Nazirliyindən tutulub mənə ödənilsin. Amma uzun müddət keçməsinə baxmayaraq ayrı-ayrı məmurların məsuliyyətsizliyi ucbatından Azərbaycan Respublikası Qanununun adından qüvvəyə minmiş qətnamə bu günə qədər tam icra olunmayıb.1997-1998-ci illərdə mənim əməkhaqqım 250 min manat olub. Həmin məbləği 2 il 11 günə vuranda 6 milyon 83 min manat edir. Onu da indeksasiya edəndə 1217 manat məvacibdir.

Bununla bağlı çoxsaylı instansiyalara müraciətlərdən sonra 05.09.2006-cı ildə mənə yalnız 1 illik əməkhaqqı, 2 milyon 810 min 800 manat, yəni 562 manat ödənildi. Bütün instansiyalarda hakimlərin ədalətsizliyinin şahidi oldum. Bu məsələ artıq bir neçə il əvvəl öz həllini tapa bilərdi. Amma bu yaşımda bu günə qədər məhkəmə çəkişmələrindəyəm”.

“İcra məmuru qanunu kobud şəkildə pozdu”

Həmsöhbətimizin sözlərinə görə, haqqının tapdalanmasında bilavasitə iştirakçılardan biri də Səbail rayon İcra Şöbəsinin məmuru Toğrul Baxşəliyev olub:

“İcra məmuru Toğrul Baxşəliyev Səbail Rayon Məhkəməsinin hakimindən xahiş edib ki, bu işə xitam verilsin. Hakim də onun xahişini rədd elədi və icra haqqında qanuna müvafiq olaraq göstərdi ki, icraata o vaxt xitam verilir ki, tam məsələ həllini tapsın.Lakin bununla barışmayan Toğrul Baxşəliyev özbaşınalıq edərək qanunu kobud şəkildə pozdu və məhkəmə qərarına məhəl qoymayaraq, öz yanından sərbəst qərar çıxarıb işə xitam verilməsini təmin etdi.Bundan əlavə Bakı Apelyasiya Məhkəməsinin hakimi İlham Əsədov 2016-cı ilin 25 noyabrında işi ləğv etdi.Bu məsələdə daha bir saxtakar tapıldı.

4 saylı Regional Əmək Müfəttişliyindən mütəxəssis dəvət edildi.Həmin mütəxəssis ona görə nəzərdə tutulmuşdu ki, məsələni yoxlayıb, araşdırıb, təhlillər aparmalıdır.Regional Əmək Müfəttişliyinin əməkdaşı Əli Baxşiyev heç bir araşdırma aparmadan, hakimin ləğv olunmuş qərarına istinad edərək mənə 562 AZN ödənilməsini əsas tutub.Mənə ödəniləsi real məbləğ barədə isə heç bir fikir söyləmir.Nəhayət o da qanunun tələblərini kobud şəkildə pozaraq, birtərəfli mövqe tutur. Əslində ilk anda hiss etmişdim ki, Əli Baxşiyev də Kənd Təsərrüfatı Nazirliyini müdafiə edir. Vətəndaşın ümid yerlərindən biri olan Əmək Müfəttişliyinin nümayəndəsi də belə bir rəy verirsə, o zaman başqa sözüm qalmır.Mən artıq bilmirəm ki, kimə və hara üz tutdum.Vətəndaşı bu qədər incitmək olarmı?”

Mahmud Qasımov qeyd edib ki, 2017-ci ilin 24 fevralında Səbail Rayon Məhkəməsinin hakimi Elmar Rəhimov qanunun aliliyinə hörmət edərək məsələ ilə bağlı düzgün qərar çıxarır:

“Qərar mənim xeyrimə çıxarıldı. Həmin qərar əsasında Kənd Təsərrüfatı Nazirliyi heç bir hüquqi əsası olmadan saxta əməllərlə məşğul olaraq yenə də özbaşınalığa əl atır.Nazirliyin icra aparatının rəhbəri İlham Bayramov mənə məktubla cavab yazır ki, bizim iddiaçı qətnamədə icra olunan borcumuz yoxdur.Heç də belə deyil.Onlar bu məsələdən yayınmaq üçün yeni elm kəşf etdilər. Buna görə çox sag olsunlar. Belə professorlara sonsuz minnətdarlığımı bildirirəm.Deməli, fikir verin.Bu adamlar məbləği ödəməmək üçün 562 manatı iki yerə bölərək aylıq əməkhaqqımı yarı faiz azaldıblar.Bu qədər hərc-mərclik etmək olarmı?Daha sonra Bakı Apelyasiya Məhkəməsinin hakimi Saqi Məmmədov 2017-ci ilin 10 mayında qərardad çıxarır və Səbail Rayon Məhkəməsinin qərarını qüvvədə saxlayır.Yəni tam məbləğ ödənilməlidir.Burada təkcə əməkhaqqı deyil, bununla yanaşı məzuniyyət, ezamiyyə və digər müəyyən məvaciblər ödənilməlidir.

Bilirsiniz ki, Əmək Məcəlləsinin 172-ci maddəsinin 5-ci bəndinə uyğun olaraq idarə, müəssisə, təşkilat rəhbərinin səhlənkarlığı və məsuliyyətsizliyi üzündən ödənişlər vaxtında ödənilməyibsə, ümumi əməkhaqqının əlavə bir faizi əlavə olunmalıdır.22 dəfə məhkəmə prosesi keçirilib.Amma nə hakimə, nə də Kənd Təsərrüfati Nazirliyinin nümayəndəsinə bunları anlada bilmişəm.Yalan ayaq tutar yeriməz.Haqq-ədalət qələbə çalmalıdır.Mən göydə Allaha, yerdə ölkə başçısının idarəsinə inanaraq, Azərbaycan vətəndaşı, yaşlı nəslin nümayəndəsi olaraq belə anarxiyaya, xaosa yol verən məmurlar haqqında ciddi cəza tədbirlərinin görülməsini tələb edirəm.Dünyada vəhşi heyvanlara hər hansı zədə dəyəndə ona kömək edilir.18 ildir ki, məni bu yaşda süründürən “qəhrəmanlar”a deyəcək bir sözüm var. Mən bu işə fasilə verməyəcəyəm, mübarizəmi davam etdirəcəyəm və ədalətin bərpasına nail olacağıma çalışacağam.Respublikanın bütün ağsaqqalları adından müraciətim odur ki, bu məsələyə obyektiv baxılsın və haqlı qərar çıxarılsın”.

Şikayətçi onu da əlavə edib ki, əməkhaqqının tam təmin olunması ilə bağlı Prezident Administrasiyasının Hüquq-mühafizə orqanları ilə iş şöbəsinin müdiri Fuad Ələsgərova da rəsmi məktub ünvanlayıb. Məktubuna isə hələ cavab gəlməyib.

Çox Oxunanlar