Əsas dövlət xərcləri azad edilmiş Qarabağa və Şərqi Zəngəzura yönləndiriləcək

Əsas dövlət xərcləri azad edilmiş Qarabağa və Şərqi Zəngəzura yönləndiriləcək.

Azərbaycan Prezidenti cənab İlham Əliyev “Euronews” televiziyasına verdiyi müsahibədə ölkəmizin ötən dövr ərzində keçdiyi inkişaf yolu, iqtisadi potensialı və bu istiqamətdə perspektivlər haqqında fikirlərini ətraflı bölüşüb. Əsas məqamlardan biri də odur ki, bu gün Azərbaycan dünyada etibarlı tərəfdaş kimi qəbul olunur. Əlbəttə ki, bu uğura dövlətimizin düzgün, uzaqgörən və praqmatik siyasəti nəticəsində nail olunub. 

Mahiyyətində həm siyasi, həm də iqtisadi çalarlar olan suallara verilən məntiqli, əsaslandırılmış cavablar Azərbaycan gerçəkliklərini ifadə edir və bu səviyyədə ifadəetmə siyasi təfəkkürün  gemişliyinin təsdiqidir. “Euronews” televiziyasına verdiyi müsahibədə neft və qaz sektorunun Azərbaycanın iqtisadiyyatının əsas hissəsi olduğunu, belə də davam etdiyini, bu il neft hasilatının cüzi aşağı düşməsi səbəbindən iqtisadi artımın nisbətən zəiflədiyini, ümumi daxili məhsulun dörd dəfə artdığını, əsas dövlət xərclərinin azad edilmiş Qarabağa və Şərqi Zəngəzura yönləndiriləcəyini, keçmiş məcburi köçkünlərin mümkün qədər tez yerləşdirilməsi zərurətini,  2026-cı ilin sonunadək 140 min insanın yerləşdirilməsinin  planlaşdırıldığını, bunun üçün infrastruktura, yaşayış yerlərinin inşasına və sosial infrastruktura böyük vəsait yatırılmalı olduğunu qeyd edən Azərbaycan Respublikasının Prezidenti cənab İlham Əliyev verilən suala cavab olaraq bildirdi  ki, əhəmiyyətli inkişaf bərpaolunan enerji mənbələri ilə bağlıdır. Bu, birbaşa xarici investisiyaların əsas istiqaməti olacaq. Ötən ay regionun ən böyük, 230 meqavat gücündə olan və xarici investorlar tərəfindən tam maliyyələşdirilmiş günəş elektrik stansiyasının açılışı olub. Növbəti 5-6 ildə 10 qiqavat həcmində günəş və külək enerjisinin istehsalı planlaşdırılır.

Dövlətlərin siyasi münasibətləri iqtisadi münasibətlərlə davam edir və hər hansı dövlətin başqa bir dövlətə borcu olması təbiidir. Bir, yaxud bir neçə dövlətə borcu olan dövlətə neçə-neçə dövlət  də borclu olur. Yəni borc dövlətlər arasında iqtisadi münasibətlərə də bir vasitədir. Müsahibədə Azərbaycan Respublikasının Prezidenti cənab İlham Əliyev bu məqamla bağlı Azərbaycanın iqtisadi potensialının yüksəkliyini vurğulayıb: “Azərbaycan bir ay içində xarici borcunu ödəyə bilər. Dünyada bunu edə biləcək çox ölkə yoxdur. Əsas beynəlxalq aktorlarla yaxşı siyasi əlaqələri olan, özünü təmin edən iqtisadiyyat və ölkədəki siyasi sabitlik və birlik - bütün bu amillər onu göstərir ki, bizdə daxili risklər yoxdur”.

           Azərbaycan bəşəri dövlətdir. İkinci Qarabağ müharibəsində Zəfər qazandı. Bundan sonra regionda sülhün bərqərar olmasının ciddi tərəfdarıdır. Sülh birtərəfli olmur, ikitərəfli və çoxtərəfli olur. Azərbaycan Respublikasının Prezidenti cənab İlham Əliyev regionda müasir sülh posesi haqqında bildirdi ki,  “Azərbaycan sülh sazişi üçün əsas götürüləcək beş təməl prinsipi hazırlayıb: bir-birinin ərazi bütövlüyünün qarşılıqlı surətdə tanınması, gücdən istifadə etməmə, bir-birinə ərazi iddialarının olmaması, iki ölkə arasında kommunikasiyaların açılması və münasibətlərin normallaşması. Bütün bunlar beynəlxalq hüquqa əsaslanır”.

Bu müsahibə Azərbaycanın xarici siyasətinin nəyə söykəndiyinin, dövlət-xalq münasibətlərinin dönməzliyinə, dövlətin xalqı daha nurlu sabahlara aparacağına inamın müsahibəsi kimi dinlənildi.

Rüfət Əliyev,

Salyan rayon Qızılağac kənd inzibati  ərazi dariəsi üzrə nümayəndənin müavini,