Bizimlə əlaqə | Reklam
BolgeXeber.Com » Bölgə » Qobustanlılar qazsız, susuz, yolsuz və işıqsız qalıblar

Qobustanlılar qazsız, susuz, yolsuz və işıqsız qalıblar

8-02-2014, 06:30
Oxunub: 4 290 Rayonu başlı başına buraxıblar

Qobustan rayonunun sakinləri nə edəcəklərini bilmirlər. Üzləşdikləri vəziyyətlə bağlı yerli İcra Hakimiyyətinə etdikləri şikayətlərə isə nə məhəl qoyan var, nə də onların dərdi ilə maraqlanan. Redaksiyaya müraciət edən bir qrup rayon sakini isə mövcud vəziyyətdən bezdiklərini dilə gətirirlər.

Camaat deyir ki, yaşadıqları rayonda sosial problemlər əndazəsini çoxdan aşıb. İndiyə qədər hər şeyin düzələcəyi ümidi ilə yaşasalar da, artıq buna inamları belə qalmayıb. Səbəb isə sadədir: Rayonun icra başçısı Adil Məmmədovun başı özünə qarışıb və bu səbəbdən də camaatın hansı vəziyyətdə yaşadığı vecinə də deyil.

Tia.az-a danışan rayon sakinləri qeyd edirlər ki, faktiki olaraq nə kəndlərə getmək üçün düz əməlli yolları var, nə qaz, nə işıq, nə də su təminatları qaydasındadır. Cəyirli, Təklə, Dərəkənd və Naburkənddə isə durum daha dözülməzdir. Onların bildirdiyinə görə, bu kəndlərə gedib çıxmaq özü bir zülm işdir. Üstəlik, vəziyyətlə bağlı dəfələrlə Adil Məmmədovun qəbuluna düşmək istəsələr də, bir nəticə hasil olmayıb.

Əksinə, hər dəfə üz tutduqları Qobustan İcra Hakimiyyətində onlara deyiblər ki, icra başçısı buralarda yoxdur və gələndə onlara xəbər ediləcək. Amma 6 aydır nə icra başçısı gəlib çıxır, nə də onların dərdinə əlac edən var. «Kəndlərin sosial problemlərini həll etmək üçün dövlət proqramı var. Lakin Adil Məmmədovun təşəbbüskarlıq göstərməməsi bizim acınacaqlı vəziyyətdə yaşamamıza səbəb olub.

İcra başçısının bu hərəkətləri camaat tərəfindən təqdir olunmur. Əksinə, üzləşdikləri dəhşətli vəziyyətlə bağlı Bakıya gedərək, sözlərini Prezident Aparatında demək istəyirlər. Qışın indiki vaxtında evlərdə qazın və işığın olmamasının necə dəhşətli bir şey olduğunu deməyə dəyməz. Di gəl, kimsə bununla maraqlanmır. Rayonu başlı başına buraxıblar. Nə şikayətə baxan var, nə də dərdimizə əlac qılan».
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]