Bizimlə əlaqə | Reklam
BolgeXeber.Com » İdman » Çempionlar Liqası: “Bavariya” “Barselona”ya 8 qol vurdu

Çempionlar Liqası: “Bavariya” “Barselona”ya 8 qol vurdu

15-08-2020, 11:05
Oxunub: 8 135 Bu gün UEFA Çempionlar Liqasında 1/4 final mərhələsinin növbəti oyunu keçirilib.
“Report”un məlumatına görə, yarımfinala 3-cü vəsiqə uğrunda matçda İspaniya “Barselona”sı ilə Almaniya “Bavariya”sı üz-üzə gəliblər. Görüş Münhen klubunun böyükhesablı qələbəsi ilə başa çatıb – 8:2.
Qarşılıqlı hücumlarla başlayan oyunda hesab erkən açılıb. Bundesliqa çempionunun heyətində Tomas Müller 4-cü dəqiqədə fərqlənib. Lakin almanların sevinci çox çəkməyib. Cəmi 3 dəqiqə sonra David Alaba topu öz qapısına göndərərək “Barselona”nın hesabı bərabərləşdirməsinə imkan yaradıb.
Bundan sonra kataloniyalılar bir neçə dəfə rəqibin qapısı qarşısında təhlükəli epizodlar yaratsa da, qolu “Bavariya” vurub. 22-ci dəqiqədə İvan Perişiç dəqiq zərbə ilə komandasını yenidən önə çıxarıb. Hücumlarını davam etdirən münhenlilər 6 dəqiqə sonra rəqibi növbəti dəfə meydanın mərkəzinə dəvət ediblər. Bu dəfə Serj Qnabri müdafiənin arxasına atılan topu qapıdan keçirib. 31-ci dəqiqədə isə Müller dubl edərək ilk hissədə yekun hesabı müəyyənləşdirib – 4:1.
Fasilədən sonra toparlanmağa çalışan “Barselona” 57-ci dəqiqədə Luis Suaresin qolu ilə fərqi azaltsa da, 6 dəqiqə sonra “Bavariya” 5-ci dəfə rəqibi məyus edib. Yozua Kimmix adını tabloya yazdırıb. 82-ci dəqiqədə Robert Levandovski 6-cı topu ispaniyalıların qapısına vurub. Bununla kifayətlənməyən “Bavariya” rəqibi daha 2 dəfə cəzalandırıb. Filippe Koutinyo 85 və 89-cu dəqiqələrdə fərqlənərək matçda son nöqtəni qoyub – 8:2.
Qeyd edək ki, “Bavariya” növbəti mərhələdə “Mançester Siti” (İngiltərə) – “Lion” (Fransa) cütünün qalibi ilə qarşılaşacaq. Yarımfinalın digər oyununda isə PSJ (Fransa) və “Leyptsiq” (Almaniya) komandaları münasibətlərinə aydınlıq gətirəcəklər. Oyunlar 18 – 19 avqust tarixlərində keçiriləcək.
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]