Bizimlə əlaqə | Reklam
BolgeXeber.Com » Sosial » Taksi sürücüləri aksiyalara başlayır

Taksi sürücüləri aksiyalara başlayır

6-10-2012, 07:50
Oxunub: 5 398 Onlar maaş və yanacağın verilməməsindən şikayətçidirlər; nəqliyyat müfəttişləri isə “nömrə açmaq” əməliyyatına başlayıblar

Bakıda “Baku Taxi Company” şirkətinin işçiləri yaxın günlərdə kütləvi aksiyalara başlayacaq. Bu barədə məlumat verən sürücülər bildirdilər ki, buna səbəb aylarla yığılıb qalan maaşlarını ala bilməmələri, üstəlik hər gün verilməli olan yanacağın səbəbsiz yerə kəsilməsidir. Sürücülər deyir ki, problemlərlə bağlı dəfələrlə “Baku Taxi Company” şirkətinə müraciət etsələr də, onların problemi ilə bağlı hər hansı bir iş görülməyib.
Sürücülərin sözlərinə görə, qarajlarda istifadəsiz maşınların sayı günü-gündən artır: “Buna səbəb isə, "London taksiləri" nin sürücülərinin avtomobillərdən imtina etməsidir. Gündəlik plan 28 manata qaldırılıb. Avtomobilin yanacağını öz cibimizdən alırıq. Üstəlik növbəti həftə texniki baxışa görə pul ödəyəcəyimizi deyirlər. Belə olan halda biz evimizə nə aparacağıq?"
Xəbər verdiyimiz kimi, Nəqliyyat Nazirliyinin əməkdaşları qanunsuz taksi fəaliyyəti ilə məşğul olan sürücülərə qarşı əməliyyat adı ilə paytaxtda reydlərə başlayıb. Taksi sürücülərindən “Yeni Müsavat” a daxil olan məlumatda deyilir ki, nəqliyyat müfəttişləri avtovağzal və avtobus dayanacaqlarında duran maşınların nömrəsini açaraq nəqliyyat vasitələrini cərimə meydançasına aparır.
Taksi fəaliyyəti ilə məşğul olmayan sıravi sürücülər də, bu vəziyyətdən şikayətçidirlər. Xüsusilə, “Binə” ticarət mərkəzinin qarşısında keçirilən reydlər nəticəsində dayanacaqda dayanan avtomobillərin nömrələri açılaraq aparılıb. Sürücülər deyir ki, gündəlik planı verə bilməyən müfəttişlər dayanacaqlarda duran avtomobillərin nömrəsini açaraq sürücülərin sənədlərini götürür, onları qanunsuz taksi fəaliyyəti ilə məşğul olmaqla günahlandırır.
Zərərçəkmiş sürücülər deyir ki, sənədlərini geri almaq üçün onlardan 100 manat istəyirlər: “Mülkü geyimli şəxslər yoldan keçən avtomobilləri saxlayaraq əyləşir bir qədər yol getdikdən sonra isə nəqliyyat müfəttişi olduqlarını deyərək sürücünün bütün sənədlərini zorla əllərindən alırlar. 4-5 nəfərlik qrup onlara tabe olmayan sürücülərə zor tətbiq edir, avtomobilin dövlət nömrə nişanlarını açır, cərimə adı ilə 100 manat aldıqdan sonra isə heç bir protokol yazmadan işi tamamlayırlar”.
Qeyd edək ki, məsələ ilə bağlı oktyabrın 3-də Nəqliyyat Nazirliyində departament rəhbərlərinin iştirakı ilə mətbuata qapalı toplantı keçirilib.
Axtarış sistemlərində qeydə alınmayan, aktiv keçid linki olmadan saytda yayımlanmış materialların köçürülməsi və yayımı qəti qadağandır! Qeyd olunan qaydalara əməl olunaraq başqa saytlarda yayımlanmış materiallara bildirilən fikirlərə görə sayt rəhbərliyi məsuliyyət daşımır!

Azərbaycan Respublikası, Bakı şəhəri

(+99470) 600 50 01

(+99450) 229 29 20

(+994 70) 734 50 00


[email protected]