BolgeXeber.Com » Sosial » Bakı məktəblərində yeni rüşvət üsulu

Bakı məktəblərində yeni rüşvət üsulu

23-11-2012, 10:40

Oxunub: 3 840

İbtidai siniflərdə əməlli başlı biznes quranlar var imiş

Redaksiyaya müraciət edən Bakı sakini Elza Kərimovanın narazılığı son zamanlar «bespredel» təsiri bağışlayan təhsil sistemindəndir. Belə ki, narazı vətəndaş başında Misir Mərdanovun dayandığı təhsilimizdəki aşkar rüşvətxorluqdan giley-güzar edir.

Övladının Bakı məktəblərinin birində təhsil aldığını bildirən şikayətçinin Dia.az-a yazdıqlarına görə, bu il ilk övladı məktəbin birinci sinfinə qədəm qoyub: «Təbii ki, bir ata-ana üçün övladın məktəbə getməsinin nə qədər sevincli olmasını hər kəs yaxşı başa düşər. Ən azından valideyn olanlar. Amma möhtərəm Misir müəllim orta məktəblərdə elə bir şərait yaradıb ki, sevincimizin ömrü uşaqlarımız üçün məktəb seçən ana qədər davam edir».

Ən yaxşı halda 100-150 manata uşaqların birinci sinfə götürüldüyünü bildirən valdiyen şikayətlənir ki, məktəb açılan gündən bu ana qədər uşağının kitabları, iş dəftərləri və digər xərcləri adı altında 1000 manata yaxın pulu çıxıb: «İndi o qədər peşman olmuşam… Gərək əvvəlindən uşağımı pullu məktəbə qoyaydım və bilərdim ki, cəmi bir dəfə xərcim çıxacaq və bunun da müqabilində övladımın təhsili normal olacaq. Amma bu məktəbdə pulu tələb etmələrinə baxmayaraq, təhsil barədə düşünən də yoxdur».

Övladının hələ orta məktəbə qədər yaxşı səviyyədə hazırlaşdığını, ayrı-ayrı hazırlıq kurslarına getdiyini bildirən valdiyen giley-güzar edir ki, amma bunun müqabilində övladı hər gün məktəbdən aşağı qiymətlərlə geri dönür: «Halbuki həmin dərsləri yaxşı bildiyini biz də bilirik. Amma məktəbdə aşağı qiymət alır. Səbəbini öyrənməyə çalışdıq və öyrəndik. Sən demə, ibtidai sinif müəlliməsi də özü üçün bir bazar açıb. Kim ki, ayı 80-100 manata qruppaya, yəni dərsdən sonra hazırlığa yazılırsa, həmin uşaqlara yaxşı qiymətlər verilir, evə gedib, evdə hazırlaşan uşaqlar isə hətta vunderkind olsalar belə, aşağı qiymət alırlar».

Artıq bununla bağlı təhsil nazirliyinə və korrupsiyaya qarşı mübarizə idarəsinə şikayət etməyə hazırlaşdığını bildirən valideyn onu da söylədi ki, bütün orta məktəblərdə durum eynidir: «Ona görə də bu məktəbdən çıxarıb, başqa bir məktəbə qoymağın özü də doğru deyil»…

Çox Oxunanlar